Read Hmong Njua Kalatias 1 Bible Online

Kalatias 1 - Hmong Njua bible

Kalatias 1

¹Kuv yog Paulus kws yog Vaajtswv ib tug timthawj. Qhov kws kuv tau ua Vaajtswv ib tug timthawj, tsi yog tuabneeg tsaa kuv ua lossis yog Vaajtswv kuas leejtwg tsaa kuv ua, tabsis yog Yexus Khetos hab Vaajtswv tug kws yog peb leej Txiv tug kws tsaa Yexus Khetos sawv huv qhov tuag rov qaab lug tsaa kuv ua timthawj.

²Cov kwvtij kws nrug kuv nyob, puab puavleej xaa lug noj qaab nyob zoo tuaj rua cov ntseeg txhua tug kws nyob huv Kalatias:

³Thov Vaajtswv tug kws yog peb leej Txiv hab tug Tswv Yexus Khetos foom koob moov rua mej, hab pub kuas mej tau zoo nyob kaaj sab lug.

⁴Yexus Khetos muab nwg txujsa lug txhwv peb lub txim, nwg ua le ntawd kuas peb dlim tam kws tuabneeg ua phem nuav. Qhov kws Yexus paab peb le ntawd yeej lawv le Vaajtswv tug kws yog peb leej Txiv lub sab nyam.

⁵Thov kuas Vaajtswv tau ntsejmuag moog ibtxhis le. Amees.

⁶Qhov kws mej tso Yexus Khetos tug kws hlub mej hab xaiv mej ca lawm tseg sai sai nuav, hab qhov kws mej moog noog lwm zaaj kws tsi yog Vaajtswv Txujmoo Zoo, mej ua le ntawd kuv xaav tsi thoob le.

⁷Qhov tseemceeb yeej tsi muaj “lwm zaaj kws yog Txujmoo Zoo le,” tabsis qee leej tuaj ua rua mej ntxhuv, rua qhov puab xaav hloov Yexus Khetos Txujmoo Zoo.

⁸Kuv qha rua mej has tas txawm yog peb lossis ib tug timtswv ceebtsheej lug qha lwm zaaj rua mej kws txawv Txujmoo Zoo kws peb tub qha rua mej lawm, ces tug ntawd yeej yuav poob rua huv ntuj tawg.

⁹Yaav taag lug peb tub qha zaaj nuav rua mej lawm, nwgnuav kuv yuav rov qaab qha dlua ib zag rua mej le nuav: yog leejtwg tuaj qha lwm zaaj rua mej kws txawv Txujmoo Zoo kws mej tub ntseeg lawm, ces tug ntawd yeej yuav poob rua huv ntuj tawg.

¹⁰Kuv has le nuav mej xaav has tas yog kuv has kuas tuabneeg qhuas kuv nua los? Tsi yog le ntawd! Tabsis kuv has kuas hum Vaajtswv sab xwb! Mej xaav has tas, kuv has kuas tuabneeg nyam kuv nua los? Yog kuv tseem ua le ntawd, ces kuv yeej ua tsi tau Yexus Khetos tug tubkhai.

¹¹Cov kwvtij, kuv xaav qha rua mej paub has tas, Txujmoo Zoo kws kuv naj nub qha yeej tsi yog tuabneeg txuj.

¹²Kuv tsi tau kawm zaaj nuav ntawm leejtwg, hab yeej tsi muaj tuabneeg qha rua kuv, tabsis tug kws qha Txujmoo Zoo ntawd rua kuv yog Yexus Khetos.

¹³Mej tub nov lawm has tas, thaus kws kuv tseem coj cov Yudais txuj kevcai, kuv tsimtxom cov tuabneeg kws ntseeg Vaajtswv heev kawg nkaus le, hab xaav muab cov ntseeg tua povtseg kuas taag huv tuabsi.

¹⁴Thaus kuv tseem coj cov Yudais txuj kevcai, peb cov kwvtij Yudais kws nrug kuv ib phaum, kuv yog tug kws coj zoo tshaaj, hab kuv yog tug kws coj peb cov yawmkoob tej kevcai nruj dlua suavdlawg.

¹⁵Tabsis Vaajtswv hlub kuv, nwg tub xaiv kuv ca huv nruab thab lug lawm. Hab Vaajtswv hu kuv lug ua nwg teg num,

¹⁶Vaajtswv pum zoo qha nwg tug Tub rua kuv paub, rua qhov nwg xaav kuas kuv moog qha Txujmoo Zoo kws has txug nwg tug Tub rua lwm Tsaav Tuabneeg,

¹⁷hab kuv tsi tau moog nraag lub nroog Yeluxalees, moog saib cov kws xub ua timthawj dlua kuv lawm. Tabsis kuv ca le moog nraag tebchaws Alanpias hab ca le rov qaab moog peg lub nroog Damaxes.

¹⁸Tom qaab ntawd tau peb xyoos kuv maam le moog saib Petus nraag lub nroog Yeluxalees, kuv moog nrug nwg nyob nraag tau kaum tsib nub;

¹⁹tabsis kuv tsi pum lwm tug timthawj le, tsuas pum Yakaunpaus kws yog tug Tswv tug kwv xwb.

²⁰Tej kws kuv sau tuaj rua mej nuav kuv has tseeb xwb. Muaj Vaajtswv nyob sau pum, kuv tsi dlaag mej.

²¹Tom qaab ntawd kuv txhaj moog peg tej nroog kws nyob huv cheebtsaam Xilias hab Kilikias,

²²thaus ntawd cov ntseeg kws nyob nraag lub xeev Yudas, puab tsi tau pum dlua kuv le.

²³Puab tsuas nov lwm tug has tas: “Tug tuabneeg kws thaus tsimtxom peb, nwgnuav nwg qha zaaj kws peb ntseeg kws yaav taag lug nwg pheej ua kuas puamtsuaj!”

²⁴Hab puab ua Vaajtswv tsaug, vim puab nov has tas kuv ua Vaajtswv teg num lawm.