Read Hmong Njua Kalatias 5 Bible Online

Kalatias 5 - Hmong Njua bible

Kalatias 5

¹Nwgnuav peb muaj kev ywjpheej, rua qhov Yexus Khetos tub tso peb cov kws ua qhev dlim lawm. Yog le ntawd, mej yuavtsum muab sab rau ntseeg tsi xob pub leejtwg coj mej rov qaab moog ua qhev dlua.

²Mej ca le ua tuab zoo noog kuv tej lug! Kuv yog Paulus, kuv qha rua mej has tas yog mej kaam ua kevcai txav lawm, ces kuj ib yaam le mej suav has tas Yexus Khetos paab tsi tau mej.

³Kuv rov qaab qha dlua rua mej has tas tug kws ua kevcai txav lawm, tug ntawd yuavtsum coj lawv le Vaajtswv txuj kevcai txhua nqai huv tuabsi.

⁴Mej cov kws xyum ua lawv le Vaajtswv txuj kevcai kuas Vaajtswv suav has tas mej yog cov kws ncaaj nceeg, mej tub ncaim ntawm Yexus Khetos moog lawm, mej yuav tsi tau Vaajtswv txuj koob moov.

⁵Tabsis peb ca sab has tas Vaajtswv yeej suav has tas peb yog cov kws ncaaj nceeg, tub yog vim le nuav, peb txhaj ntseeg hab naj nub tog Vaajtswv tug Ntsujplig ua tug kws paab peb.

⁶Rua qhov peb cov kws tub nrug Yexus Khetos koom ib txujsa lawm, peb tsi suav has tas qhov kws ua kevcai txav yog qhov kws tseemceeb, tabsis peb suav has tas qhov tseemceeb yog qhov kws tug ntseeg muaj lub sab hlub lwm tug.

⁷Mej tub ua mej lub neej lawv le Vaajtswv txujlug kws yog qhov tseeb lawm! Leejtwg tuaj txwv tsi pub mej ua lawv le ntawd hab?

⁸Vaajtswv tug kws tub xaiv mej ca lawm, nwg yeej tsi txwv mej.

⁹Suavdlawg yeej ibtxwm has tas, “Ib qhov nyuas keeb xwb, yeej ua rua ib thoob ncuav su taagnrho.”

¹⁰Tabsis kuv tseem ca sab tau rua mej txhua tug kws nrug Yexus Khetos koom ib txujsa lawm has tas mej yuav tsi laam moog ntseeg lwm zaaj. Hab kuv paub has tas tug kws tuaj ua rua mej ntxhuv ntawd, txawm yog nwg yog leejtwg los Vaajtswv yeej yuav rau txim rua nwg.

¹¹Cov kwvtij, mej sim xaav saib yog kuv qha has tas suavdlawg yuavtsum ua kevcai txav, ces kuv yeej tsi raug kev tsimtxom le. Ua le caag kuv tseem tsua raug hab nua? Yog kuv qha le ntawd tag, ces zaaj kws kuv qha has txug Yexus Khetos tug ntoo khaublig yeej yuav tsi ua rua suavdlawg tu sab.

¹²Kuv xaav kuas cov tuabneeg kws tuaj ua rua mej ntxhuv sab ntawd, puab ca le muab puab saam.

¹³Cov kwvtij, qhov kws Vaajtswv tau xaiv mej ca lawm, tub yog nwg xaav kuas mej muaj kev ywjpheej. Tabsis mej tsi xob muab txujkev ywjpheej ntawd ua mej txuj hauv kev moog ua kev phem kev qas. Mej yuavtsum sis hlub hab ib tug txaus sab hlo paab ib tug.

¹⁴Rua qhov Vaajtswv txuj kevcai txhua nqai puavleej muab sau zog lug ua ib nqai has tas, “Mej yuavtsum hlub mej tej kwvtij zej zog ib yaam le mej hlub mej lub cev.”

¹⁵Tabsis yog mej ua le tej tsaj, mej ib tug ntxo ib tug hab ib tug ua limham rua ib tug, yog mej ua le ntawd mej ib tug yeej yuav ua rua ib tug raug kev puamtsuaj.

¹⁶Kuv qha rua mej le nuav: mej yuavtsum ca Vaaj Ntsujplig kaav mej lub neej, mej tsi xob ca mej lub sab kaav mej ib zag le.

¹⁷Rua qhov tuabneeg lub sab yeej tsi nyam tej kws Vaaj Ntsujplig nyam, hab Vaaj Ntsujplig yeej tsi nyam tej kws tuabneeg lub sab nyam, tuabneeg lub sab hab Vaaj Ntsujplig yeej ua yeebncuab.

¹⁸Yog Vaaj Ntsujplig coj mej kev, ces txuj kevcai yeej tsi muaj fwjchim kaav mej lawm.

¹⁹Suavdlawg yeej paub tej kws tuabneeg lub sab nyam ua, tej ntawd yog le nuav: kev ua nkauj ua nraug, kev phem kev qas hab ua dlog ua dlig,

²⁰pe dlaab pe mlom, ua neeb ua yaig, ua yeebncuab, sis tshe sis ntaus, sis khib, sis chim, xaav ua tug hlub, sis faib ua paab ua pawg,

²¹ntshaw luas tug, quav yeeb, quav tshuaj, quav cawv, qw ua nqaaj ua nqug, hab ua ntau yaam kws zoo le tej nuav. Yaav taag lug kuv tub ntuag mej ib zag lawm, tabsis nwgnuav kuv rov ntuag mej dlua ib zag has tas: cov tuabneeg kws ua tej ntawd, puab yeej yuav tsi tau Vaajtswv lub Tebchaws lug ua puab tug ib zag le.

²²Tabsis Vaaj Ntsujplig yuav ua rua tuabneeg muaj lub sab sis hlub, zoo sab, nyob kaaj sab lug, ua sab ntev, muaj lub sab dlawb sab zoo, zoo sab hlo paab lwm tug, ua sab ncaaj,

²³tsi khaavtheeb, hab paub tswj yug lub sab. Yeej tsi muaj ib txuj kevcai yuav txwv tej nuav hlo le.

²⁴Cov kws ntseeg Yexus Khetos, puab tub muab tej kev phem kws puab lub sab nyam ua huv tuabsi lug ntsa rua sau tug ntoo khaublig lawm.

²⁵Vaaj Ntsujplig tub pub txujsa rua peb lawm; peb yuavtsum ca nwg kaav taagnrho peb lub neej.

²⁶Peb tsi xob muab hlub, ib tug tsi xob ua rua ib tug chim lossis ib tug tsi xob khib ib tug.