Read Hmong Njua Efexaus 5 Bible Online

Efexaus 5 - Hmong Njua bible

Efexaus 5

¹Vim mej yog Vaajtswv cov mivnyuas kws Vaajtswv hlub, mej yuavtsum xyum ua mej lub neej lawv le Vaajtswv tug yaam ntxwv.

²Mej yuavtsum hlub lwm tug ib yaam le Yexus Khetos hlub peb, hab nwg muab nwg txujsa lug theej peb lub txhoj. Qhov ntawd zoo ib yaam le tej tshuaj tsw qaab kws luas muab fij rua Vaajtswv hab yog yaam kws Vaajtswv pum zoo yuav.

³Vim mej yog Vaajtswv tsaav tuabneeg lawm, tsi tsimnyog mej yuav ua nkauj ua nraug, ua kev phem kev qas hab ntshaw luas tug. Txawm yog mej yuav has txug xwb los tub tsi tsimnyog has.

⁴Hab tsi tsimnyog mej has tej lug vuabtsuab kws tshawv noog, hab tej lug kws tsi muaj qaabhau, mej ca le ua Vaajtswv tsaug zoo dlua.

⁵Kuv qha tseeb rua mej has tas, cov tuabneeg kws ua kev nkauj kev nraug, ua kev phem kev qas hab ua tuabneeg sab hlub, (rua qhov cov tuabneeg sab hlub zoo ib yaam le cov tuabneeg kws pe dlaab pe mlom.) Cov tuabneeg kws ua le ntawd, puab yuav tsi muaj feem moog nyob huv Yexus Khetos hab Vaajtswv lub tebchaws hlo le.

⁶Tsi xob pub cov tuabneeg kws has tej lug tsi muaj hauvpaug hauvntsis ntxag tau mej. Tub yog vim muaj tej kev phem kev qas kws suavdlawg ua, Vaajtswv txhaj yuav rau txim rua cov tuabneeg kws tsi noog Vaajtswv lug.

⁷Yog le ntawd, mej tsi xob moog nrug cov tuabneeg ntawd ua ke hlo le.

⁸Yaav taag lug mej yeej nyob huv qhov tsaus ntuj, tabsis nwgnuav mej cov kws ntseeg Vaajtswv, mej tub lug nyob huv qhov pum kev lawm. Yog le ntawd, mej yuavtsum ua mej lub neej kuas phim qhov kws mej yog cov kws nyob huv qhov pum kev.

⁹Tub yog qhov pum kev ntawd ua rua mej ua tau txhua yaam zoo, ua tuabneeg ncaaj nceeg hab has lug tseeb.

¹⁰Mej yuavtsum ua tuab zoo saib, saib mej yuav ua yaam twg txhaj le hum Vaajtswv sab.

¹¹Cov tuabneeg kws nyob huv qhov tsaus ntuj nyam ua tej kev phem kev qas, mej tsi xob moog nrug puab ua, rua qhov tej ntawd yeej tsi muaj nqes. Mej yuavtsum muab tej ntawd lug nthuav rua qhov pum kev.

¹²Tej kws puab ua nraim quas nkoog ntawd, txawm yog yuav has txug xwb los tub txaajmuag kawg le.

¹³Thaus muab ib puas tsaav yaam ntawd lug nthuav rua qhov pum kev lawm, suavdlawg yuav pum has tas tej ntawd zoo le caag.

¹⁴Rua qhov txhua yaam kws lug nyob huv qhov pum kev yuav ci ib yaam le qhov pum kev hab. Tub yog vim le ntawd txhaj muaj lug sau tseg has tas: “Tug tuabneeg kws pw tsaug zug, koj ca le tsim hab sawv huv qhov tuag rov qaab lug, hab ca Yexus Khetos ci rua koj pum kev.”

¹⁵Yog le ntawd mej yuavtsum ceevfaaj hab ua zoo. Tsi xob ua le cov tuabneeg ruag, tabsis mej yuavtsum ua le cov tuabneeg kws muaj tswvyim.

¹⁶Mej yuavtsum siv txhua lub sijhawm kuas muaj nqes, rua qhov naj nub nua tej tuabneeg ua phem kawg le.

¹⁷Mej tsi xob ua le cov tuabneeg ruag, tabsis mej yuavtsum ua tuab zoo saib saib Vaajtswv xaav kuas mej ua yaam twg.

¹⁸Mej tsi xob haus cawv txiv maab kuas qaug, rua qhov tej ntawd yuav ua rua mej ua tuabneeg tsi tsimtxaj. Mej yuavtsum ca Vaaj Ntsujplig kaav mej lub sab.

¹⁹Mej ib leeg yuavtsum qha ib leeg lawv le tej lug kws nyob huv Daviv phoo nkauj, tej zaaj nkauj qhuas Vaajtswv hab tej zaaj nkauj kws cov ntseeg hu ua Vaajtswv tsaug. Thaus mej hu tej zaaj nkauj ntawd, mej yuavtsum hu ntawm lub sab xyivfaab hlo.

²⁰Mej cov kws ntseeg Yexus Khetos, mej yuavtsum naj nub ua Vaajtswv tsaug rua txhua yaam lug ntawm Yexus Khetos lub npe.

²¹Vim mej yog cov kws fwm Yexus Khetos, mej ib leeg yuavtsum noog ib leeg lug.

²²Mej cov kws yog quaspuj, mej yuavtsum noog mej tej quasyawg lug, ib yaam le mej noog tug Tswv lug.

²³Rua qhov tug quasyawg yog tug kws muaj fwjchim kaav tug quaspuj, ib yaam le Yexus Khetos muaj fwjchim kaav cov ntseeg. Cov ntseeg yog Yexus Khetos lub cev, hab Yexus Khetos yog cov ntseeg tug Cawmseej.

²⁴Yog le ntawd mej cov kws yog quaspuj, nyag yuavtsum noog nyag tug quasyawg lug txhua lu, ib yaam le cov ntseeg noog Yexus Khetos lug.

²⁵Mej cov kws yog quasyawg, mej yuavtsum hlub mej tej quaspuj, ib yaam le Yexus Khetos hlub cov ntseeg, hab nwg muab nwg lub cevlug txhwv cov ntseeg.

²⁶Nwg muab dlej hab muab nwg txujlug lug ntxuav cov ntseeg kuas huv, nwg txhaj zoo muab puab pub rua Vaajtswv.

²⁷Nwg ua le ntawd nwg txhaj tau cov ntseeg kws zoo kawg nkaus, tsi muaj ib qhov txhum, tsi ceb tsi txoom hab tsi muaj ib qhov phem le lug ua nwg tug.

²⁸Cov quasyawg yuavtsum hlub puab cov quaspuj ib yaam le puab hlub puab lub cev. Tug kws hlub nwg tug quaspuj, tug ntawd yeej hlub nwg lub cev.

²⁹Yeej tsi muaj leejtwg yuav ntxub nwg lub cev. Tsuas muaj nwg yuav tu ntshis hab nrhav zaub nrhav mov lug yug nwg lub cev, ib yaam le Yexus Khetos ua rua cov ntseeg.

³⁰Rua qhov peb suavdlawg puavleej koom Yexus lub cev.

³¹Lawv le muaj lug sau ca rua huv Vaajtswv txujlug has tas, “Tub yog vim le nuav tug tub txhaj tso nwg nam nwg txiv tseg, hab moog nrug nwg tug quaspuj nyob, obtug yuav koom ua ib lub cev.”

³²Nqai nuav qha ib qhov tseemceeb rua peb. Lawv le kuv totaub, nqai nuav yog has txug Yexus Khetos hab cov ntseeg.

³³Tabsis nqai nuav kuj yog has txug mej hab. Txhua tug quasyawg nyag yuavtsum hlub nyag tug quaspuj ib yaam le nyag hlub nyag lub cev. hab txhua tug quaspuj nyag yuavtsum fwm nyag tug quasyawg.