Read Hmong Njua Yausuas 1 Bible Online

Yausuas 1 - Hmong Njua bible

Yausuas 1

¹Thaus Mauxes kws yog tug TSWV tug tubkhai tuag lawm, tug TSWV has rua Noos tug tub Yausuas kws paab Mauxes has tas:

²“Kuv tug tubkhai Mauxes tuag lawm. Nwgnuav koj hab cov Yixalayees ca le sawbsim hlaa dlej Yauladees moog rua lub tebchaws kws kuv yuav muab rua puab,

³lawv le kuv tau coglug tseg rua Mauxes lawm has tas, ‘Txhua thaaj aav kws mej txhais kutaw moog tsuj, kuv yuav muab rua mej.’

⁴Mej tug nrimteb saab qaabteb txij ndlua ntawm taj suabpuam; saab qaumteb txij ndlua ntawm Roob Lenpanoos saab nubtuaj txij ndlua ntawm tug dlej Efalates; hab saab nubpoob, taagnrho tebchaws Hitis moog ti nkaus rua Havtxwv Meditelanees.

⁵Yausuas, thaus koj tseem ua neej nyob, yuav tsi muaj leejtwg tawmtsaam yeej koj. Kuv yuav nrug nraim koj ib yaam le kuv nrug Mauxes. Kuv yuav nrug nraim koj tsi tso koj tseg.

⁶Koj ua sab tawv qhawv tsi xob ntshai, rua qhov koj yog tug yuav coj cov tuabneeg nuav moog nyob lub tebchaws kws kuv coglug yuav muab rua puab cov yawmkoob.

⁷Koj yuavtsum ua sab tawv qhawv tsi xob ntshai leejtwg hab coj lawv le tej Kevcai kws kuv tug tubkhai Mauxes muab rua koj lawm. Koj tsi xob tso ib nqai tseg le, koj txhaj yuav kovyeej txhua qhov chaw kws koj moog.

⁸Thaus suavdlawg tuaj ua ke pehawm kuv, yuavtsum muaj tuabneeg nyeem kuv phoo kevcai rua suavdlawg noog. Koj yuavtsum naj nub naj mo kawm hab ua lawv le tej lug ntawd, koj teg num txhaj yuav tav hab vaammeej.

⁹Koj yuavtsum ncu ntsoov tej kws kuv has rua koj lawm, koj ua sab tawv qhawv tsi xob ntshai, tsi xob txhawj hab tsi xob poob sab, rua qhov kuv yog tug TSWV kws yog koj tug Vaajtswv, kuv yuav nrug nraim koj txhua qhov kws koj moog.”

¹⁰Yausuas has rua cov thawjcoj has tas,

¹¹“Mej ca le moog thoob plawg huv lub yeej hab has kuas cov pejxeem npaaj zaub mov kuas txaus, tshuav peb nub sau nuav mej yuav hlaa dlej Yauladees moog rua huv lub tebchaws kws tug TSWV kws yog mej tug Vaajtswv yuav muab rua mej.”

¹²Yausuas has rua xeem Lunpees, xeem Khas hab ib nraab xeem Manaxes has tas,

¹³“Mej yuavtsum ncu ntsoov tej lug kws tug TSWV tug tubkhai Mauxes qha rua mej lawm has tas, tug TSWV kws yog mej tug Vaajtswv yuav muab lub tebchaws ntawm tug dlej Yauladees saab nubtuaj ua mej tug.

¹⁴Ca mej quaspuj mivnyuas hab tej tsaj txhu nyob ntawm nuav. Tabsis mej cov tubrog ca le coj tej cuabyeej ua rog hlaa dlej ua mej cov kwvtij Yixalayees ntej moog paab puab ntaus tebchaws,

¹⁵moog txug thaus puab tua yeej hab txeeb tau lub tebchaws ntawm tug dlej Yauladees saab nubpoob kws tug TSWV kws yog mej tug Vaajtswv muab pub rua puab tsaiv. Thaus tug TSWV pub rua cov Yixalayees txhua xeem tau nyob kaaj sab lug lawm, mej maam le rov lug rua huv mej lub tebchaws kws nyob ntawm tug dlej Yauladees saab nubtuaj kws tug TSWV tug tubkhai Mauxes faib rua mej lawm.”

¹⁶Puab teb Yausuas has tas, “Peb yuav ua txhua yaam lawv le koj has, hab yuav moog txhua qhov kws koj khaiv peb moog.

¹⁷Peb yuav noog koj lug ib yaam le peb noog Mauxes lug, hab peb thov tug TSWV kws yog koj tug Vaajtswv nrug nraim koj ib yaam le nwg nrug Mauxes.

¹⁸Yog leejtwg tawv nyom tsi ua lawv le koj has, peb yuav muab tug ntawd tua povtseg. Txawm le caag los xij, koj yuavtsum ua sab tawv qhawv tsi xob ntshai le.”