Read Hmong Njua Yausuas 12 Bible Online

Yausuas 12 - Hmong Njua bible

Yausuas 12

¹Cov Yixalayees tua yeej hab txeeb tau taagnrho lub tebchaws ntawm tug dlej Yauladees saab nubtuaj txij ndlua ntawm lub Haav Alenoos moog rua lub Haav Yauladees, hab moog rua peg lub Roob Helemoos kws nyob saab qaumteb. Puab tua yeej ob tug vaajntxwv,

²ib tug yog Xihoos kws ua vaajntxwv kaav cov Amaules nyob huv lub nroog Hesenpoos. Nwg kaav ib nraab tebchaws Nkile-as txij ndlua ntawm Alu-es (kws nyob ntawm lub Haav Alenoos), hab txij ndlua ntawm lub nroog kws nyob huv plawv lub haav ntawd moog txug rua ntawm tug Dlej Yanpus kws yog cov Amoos tug nrimteb;

³hab taagnrho lub Haav Yauladees, txij ndlua ntawm Havtxwv Kalilais saab qaabteb moog txug rua ntawm Npethes Yesimaus, (kws nyob ntawm Havtxwv Tuag saab nubtuaj), hab moog rua ntawm lub taw Roob Pikas.

⁴Hab puab tseem tua yeej Vaajntxwv Aunkas kws nyob huv lub tebchaws Npasaas, nwg yog tug vaajntxwv kawg ntawm tsaav tuabneeg Lefayees; nwg kaav lub nroog Asethas hab Edeles.

⁵Vaajntxwv Aunkas kaav taagnrho lub Roob Helemoos, Xalekas, hab taagnrho tebchaws Npasaas moog txug ndlua ntawm cov Nkesus hab cov Makhas tug nrimteb, hab ib nraab tebchaws Nkile-as moog txug rua ntawm lub nroog Hesenpoos kws Vaajntxwv Xihoos kaav.

⁶Ob tug vaajntxwv nuav, yog ob tug kws yaav taag lug Mauxes hab cov Yixalayees tua yeej. Tug TSWV tug tubkhai Mauxes muab lub tebchaws nuav faib rua xeem Lunpees, xeem Khas, hab ib nraab Xeem Manaxes ua puab tug moog le.

⁷Yausuas hab cov Yixalayees tua yeej taagnrho cov vaajntxwv kws nyob lub tebchaws ntawm tug dlej Yauladees saab nubpoob, txij ndlua ntawm Npankas kws nyob huv lub Haav Lenpanoos moog txug rua ntawm lub Roob Halaj kws nyob ze Edoos saab qaabteb. Yausuas muab lub tebchaws faib rua cov Yixalayees txhua xeem ua puab tug lawv le nuav:

⁸Tej pov roob, tej taw roob saab nubpoob, lub Haav Yauladees hab tej taw roob, tej ntaav zaag saab nubtuaj, hab saab qaabteb kws ua suabpuam. Lub tebchaws nuav yaav taag lug yog cov Hitis, cov Amaules, cov Kana-aas, cov Pelixes, cov Hivis hab cov Yenpus lub tebchaws.

⁹Cov Yixalayees tua yeej cov vaajntxwv kws kaav cov nroog nuav: Yelikaus, A-is, (kws nyob ze lub nroog Npethees,)

¹⁰Yeluxalees, Henploos,

¹¹Yamus, Lakhis,

¹²Ekiloos, Nkexes,

¹³Denpis, Nkedes,

¹⁴Haumas, Alas,

¹⁵Linas, Adulaas,

¹⁶Makedas, Npethees,

¹⁷Tapuas, Hefeles,

¹⁸Afes, Lasaloos,

¹⁹Madoos, Haxaules

²⁰Siloos, Meloos, Akhesas,

²¹Tanas, Menkidaus,

²²Kedes, Yaune-as (kws nyob huv Kalemees),

²³Daules, (kws nyob ntawm ntug havtxwv) Nku-ees kws nyob huv Kalilais)

²⁴hab Tilexas, taagnrho muaj peb caug ib tug vaajntxwv.