Read Hmong Njua Yausuas 17 Bible Online

Yausuas 17 - Hmong Njua bible

Yausuas 17

¹Muab feem aav ntawm tug Dlej Yauladees saab nubpoob faib rua Yauxej tug tub hlub Manaxes cov xeebntxwv ua puab tug lawv le puab tej tsev tuabneeg. Manaxes tug tub hlub Makhis kws yog Nkile-as txiv, nwg yog ib tug tubrog kws ua tau heev, yog le ntawd, puab txhaj muab cheebtsaam Nkile-as hab Npasaas ntawm tug dlej Yauladees saab nubtuaj rua Makhis.

²Muab feem aav ntawm tug Dlej Yauladees saab nubpoob faib rua xeem Manaxes kws tseem tsi tau aav lawv le puab tej tsev tuabneeg: Anpixes, Heles, Aliyees, Sekhees, Hefeles hab Semidas. Puab yog Yauxej tug tub hlub Manaxes cov xeebntxwv kws ua thawjcoj rua puab tej tsev tuabneeg.

³Manaxes tug tub yog Makhis, Makhis tug tub yog Nkile-as, Nkile-as tug tub yog Xelufehas, Xelufehas tsi muaj tub, tabsis nwg muaj tsib tug ntxhais: Nwg cov ntxhais yog Malas, Nau-es, Haunkelas, Milekas hab Tixas.

⁴Puab tsib leeg moog thov tug povthawj Ele-axas, Noos tug tub Yausuas hab cov thawjcoj has tas, “Tug TSWV tau has rua Mauxes kuas faib aav rua peb ua peb tug ib yaam le faib rua peb tej nug kwvtij.” Yog le ntawd, cov thawjcoj txhaj faib aav rua puab tsib leeg ntawd ib yaam le faib rua puab tej nug kwvtij.

⁵Yog le ntawd, xeem Manaxes txhaj tau aav tshaaj kaum feem ntxiv rua cheebtsaam Nkile-as hab Npasaas kws nyob ntawm tug Dlej Yauladees saab nubtuaj,

⁶rua qhov Manaxes cov xeebntxwv, tsi has cov ntxhais lossis cov tub puavleej muaj feem tau aav ua puab tug. Yog le ntawd, txhaj muab hlo cheebtsaam Nkile-as faib rua Manaxes cov xeebntxwv.

⁷Manaxes cheebtsaam aav tug nrimteb pib ntawm Aseles moog rua ntawm lub nroog Mimethas kws nyob ntawm Sekhees saab nubtuaj. Tug nrimteb nqeg moog rua saab qaabteb, moog txug ntawm cov tuabneeg Etapuas tug nrimteb.

⁸Feem aav kws nyob ibncig lub nroog Tapuas puavleej yog xeem Manaxes le, tabsis lub nroog Tapuas kws nyob ntawm tug nrimteb yog Efalayees cov xeebntxwv le.

⁹Tug nrimteb nqeg moog rua ntawm tug dlej Kanas. Txawm yog cov nroog kws nyob saab qaabteb ntawm tug dlej Kanas huv xeem Manaxes tug nrimteb los cov nroog ntawd puavleej yog xeem Efalayees le. Xeem Manaxes tug nrimteb lawv tug dlej Kanas saab qaumteb moog xaus rua ntawm Havtxwv Meditelanees.

¹⁰Xeem Efalayees nyob saab qaabteb, hab xeem Manaxes nyob saab qaumteb kws yog Havtxwv Meditelanees ua puab tug nrimteb saab nubpoob. Xeem Aseles nyob saab qaumteb nubpoob hab xeem Ixakhas nyob saab qaumteb nubtuaj.

¹¹Xeem Manaxes tau lub nroog Npes Saas hab lub nroog Inpelas hab tej zog kws nyob ibncig, hab lub nroog Daules, (lub nroog kws nyob ntawm ntug havtxwv), lub nroog Edaules, Tanas, Menkidaus hab tej zog kws nyob ibncig, huv xeem Ixakhas hab xeem Aseles cheebtsaam aav.

¹²Tabsis cov Manaxes tsi ntab cov tuabneeg kws nyob huv cov nroog nuav tsiv, cov Kana-aas txhaj tseem nrug puab nyob rua huv cov nroog ntawd.

¹³Txawm yog cov Yixalayees fuamvaam coob hab muaj zug txaus los puab tsi ntab cov Kana-aas tsiv, tabsis puab yuam kuas cov Kana-aas ua puab qhev.

¹⁴Yauxej cov xeebntxwv tuaj has rua Yausuas has tas, “Tug TSWV tub foom koob moov rua peb, peb fuamvaam coob heev lawm, ua le caag koj faib tuab thaaj aav rua peb xwb?”

¹⁵Yausuas teb puab has tas, “Yog mej muaj tuabneeg coob heev lawm, feem aav ua laaj roob kws faib rua xeem Efalayees tsi txaus mej nyob, mej ca le moog luaj hab ntuv thaaj haav zoov huv cov Pelixes hab Lefayees lub tebchaws ua nroog rua mej nyob.”

¹⁶Puab teb has tas, “Feem aav kws ua laaj roob dlaav tsi txaus peb nyob; tsi yog le ntawd xwb, cov Kana-aas kws nyob huv taj nraag tsi has cov kws nyob huv Npes Saas hab nyob huv tej zog ibncig hab cov kws nyob huv lub Haav Yexelees puavleej muaj tsheb neeg hlau.”

¹⁷Yausuas has rua xeem Efalayees hab xeem Manaxes Saab Nubpoob has tas, “Mej cov tuabneeg coob hab muaj zug heev lawm, yeej tsimnyog mej tau dlua ib feem aav ntxiv,

¹⁸feem aav kws ua laaj roob yuav yog mej le. Txawm yog feem aav ntawd tseem ua haav zoov los mej ca le moog luaj hab ntuv ua mej tug, taagnrho saab nuav moog rua saab tim u. Txawm yog cov Kana-aas muaj tsheb neeg hlau hab muaj zug heev los mej ca le muab puab ntab tsiv moog.”