Read Hmong Njua Yausuas 5 Bible Online

Yausuas 5 - Hmong Njua bible

Yausuas 5

¹Thaus cov vaajntxwv kws kaav cov Amaules kws nyob ntawm tug Dlej Yauladees saab nubpoob hab cov vaajntxwv kws kaav cov Kana-aas kws nyob lawv ntug Havtxwv Meditelanees nov xuv has tas, tug TSWV ua rua tug dlej Yauladees faib hlo ua kev qhuav qhawv rua cov Yixalayees moog, puab ntshai cov Yixalayees hab poob sab kawg le.

²Tug TSWV has rua Yausuas has tas, “Koj ca le muab cov pobzeb hauvsim tsoo kuas ntse le nav rag hab muab cov Yixalayees ua kevcai txav.”

³Yausuas txhaj muab cov Yixalayees ua kevcai txav sau lub pov roob kws hu ua Pov roob Kevcai Txav lawv le tug TSWV has.

⁴Thaus cov Yixalayees tawm nraag tebchaws Iziv lug, cov txivneej puavleej ua kevcai txav taag lawm. Tabsis plaub caug xyoo kws cov Yixalayees lug hlaa taj suabpuam, puab tsi tau muab cov mivnyuas tub ua kevcai txav le. Cov txivneej kws muaj noobnyoog ua taug rog kws lug nraag tebchaws Iziv lug tuag taag lawm, rua qhov puab tsi noog tug TSWV lug. Tej ntawd yog muaj lawv le tug TSWV tau has tseg has tas, yuav tsi pub puab moog pum lub tebchaws aav rog hab zoo qoob kws nwg coglug tseg rua puab cov yawmkoob lawm.

⁷Yausuas muab puab cov tub ua kevcai txav, rua qhov cov mivnyuas tam ntawd tseem tsi tau ua kevcai txav le.

⁸Tom qaab puab ua kevcai txav taag lawm, puab su moog txug thaus kws puab tej qhov txhaab zoo taag.

⁹Tug TSWV has rua Yausuas has tas, “Txawm yog mej ua luas qhev hab poob ntsejmuag thaus mej nyob nraag tebchaws Iziv los nub nua kuv pub kuas mej rov tau ntsejmuag.” Yog le ntawd puab txhaj le tis npe rua thaaj chaw ntawd hu ua Nkilenkas, naj nub nwgnuav luas tseem hu lub npe ntawd.

¹⁰Thaus cov Yixalayees tseem nyob ntawm Nkilenkas huv lub taj nraag kws ze lub nroog Yelikaus, lub hlis ntawd mo kaum plaub thaus yuav tsaus ntuj puab ua Kevcai Hlaa Dlhau.

¹¹Nub tom qaab yog thawj nub kws puab tau noj tej qoobloo kws puab ua tau huv lub tebchaws Kana-aas, yog cov ncuav tsi xyaw keeb hab tej mov kib.

¹²Txij nub ntawd Manas tsi poob sau ntuj lug hab cov Yixalayees tsi tau Manas noj le lawm. Xyoo ntawd puab noj tej qoobloo kws puab ua tau huv tebchaws Kana-aas lawm xwb.

¹³Thaus Yausuas puab moog ze lub nroog Yelikaus, nwg pum ib tug txivneej tuav rawv ib raab ntaaj sawv ntawm nwg hauv ntej. Yausuas txaav zog moog ze hab nug has tas, “Koj yog peb ib tug tubrog lossis koj yog yeebncuab?”

¹⁴Tug txivneej ntawd teb has tas, “Kuv tsi yog tog twg tubrog le. Kuv lug nuav yog lug ua tug TSWV paab tubrog tug thawj.” Yausuas txhus caug ndlua pe hab has tas, “Tug tswv, kuv yog koj tug tubkhai, koj xaav kuas kuv ua dlaabtsi?”

¹⁵Tug TSWV paab tubrog tug thawj has rua Yausuas has tas, “Ca le hle koj nkawm khau, vim thaaj chaw kws koj sawv ko, yog qhov chaw dlawbhuv.” Yausuas txawm ua le nwg has.