Read Hmong Njua Yausuas 7 Bible Online

Yausuas 7 - Hmong Njua bible

Yausuas 7

¹Tug TSWV tsi pub cov Yixalayees muab ib yaam khoom dlaabtsi kws tug TSWV has kuas muab rhuav kuas puamtsuaj huv tuabsi huv lub nroog Yelikaus lug yuav, tabsis muaj ib tug txivneej npe hu ua Akhaas tsi noog tug TSWV lug, yog le ntawd tug TSWV txhaj chim rua cov Yixalayees. (Akhaas yog Kamis tug tub hab yog Xanpedis tug xeebntxwv kws yog Zelas cuab kwvtij hab yog xeem Yudas.

²Yausuas tso tuabneeg tawm huv Yelikaus moog soj lub nroog A-is kws nyob ntawm Npethees saab nub tuaj ze Npethavees, hab kuas puab moog soj thoob plawg lub tebchaws ntawd. Thaus puab moog soj thoob lawm,

³puab rov lug qha rua Yausuas has tas: “Lub nroog A-is tsi yog nroog luj, tsi xob ca taagnrho peb cov tubrog moog tua lub nroog ntawd. Tsuas tso ob txheeb lossis peb txheeb leej tubrog moog tua xwb.”

⁴Yog le ntawd puab txhaj tso kwvyees le peb txheeb leej tubrog Yixalayees moog tua, tabsis puab swb hab thim rov lug.

⁵Cov tubrog huv lub nroog A-is caum puab tua ntawm lub roojvaag nroog tuaj txug ntawm thaaj chaw khawb pobzeb. Puab raug caum tua nqeg haav, ua rua cov Yixalayees tuag kwvyees le peb caug rau leej, puab qaug zug hab ntshai kawg le.

⁶Yausuas hab cov Yixalayees cov thawjcoj dlua puab tej rig tsho, hab nyuaj sab kawg. Puab txhus caug khoov ti nkaus huv aav, taabmeeg tug TSWV lub Phijxaab ib nub tsaus ntuj, puab tsuab moov aav rua sau puab taubhau, qha has tas puab nyuaj sab kawg le.

⁷Yausuas has tas, “Tug TSWV kws kaav ib puas tsaav yaam! Vim le caag koj coj peb hlaa tug dlej Yauladees lug. Puas yog koj coj peb lug cob rua cov Amaules txhais teg kuas peb raug puamtsuaj taag? Ua caag tsi ca peb nyob tuabywv saab ntug dlej Yauladees tim u?

⁸Tug TSWV, nwgnuav cov tubrog Yixalayees raug yeebncuab tua swb thim lug lawm, kuv yuav has le caag rua puab?

⁹Cov Kana-aas hab tej tuabneeg kws nyob huv lub tebchaws nuav yuav nov tej xwm nuav. Puab yuav tuaj vij hab muab peb txhua tug tua huv tuabsi. Yuav ua le caag koj lub npe txhaj tsi raug luas txobthuam?”

¹⁰Tug TSWV has rua Yausuas has tas, “Ca le sawv! Ua le caag koj yuav dlaa huv aav le nuav?

¹¹Cov Yixalayees ua txhum! Puab tsi noog kuv lug, puab tsi ua lawv le tej lug cog tseg kws kuv kuas puab ua, puab tau muab tej khoom kws kuv has kuas muab rhuav kuas puamtsuaj. Puab ua tubsaab, puab dlaag, hab puab nqaa tej khoom ntawd lug zais xyaw puab cov lawm.

¹²Tub yog vim le nuav, cov tubrog Yixalayees txhaj tua tsi yeej puab cov yeebncuab. Puab swb hab thim rov lug, rua qhov puab raug foom kuas puamtsuaj lawm! Yog mej tsi muab tej khoom kws kuv has kuas mej tsi xob muab ntawd povtseg, kuv yuav tsi nrug mej nyob lawm!

¹³Koj ca le sawv! Muab cov tuabneeg ua kevcai ntxuav kuas huv hab coj puab tuaj cuag kuv. Koj has kuas puab ca le npaaj, pigkig tug TSWV kws yog cov Yixalayees tug Vaajtswv muaj lug yuav has rua puab: ‘Cov Yixalayees, mej muab tej khoom kws kuv kuas muab rhuav puamtsuaj huv tuabsi qee yaam lawm! Mej yuav tua tsi yeej mej cov yeebncuab moog txug thaus mej muab tej khoom ntawd tshem tawm ntawm mej moog!’

¹⁴Koj ca le has rua puab tas, pigkig sawv ntxuv puab txhua xeem yuav tau tuaj sawv ntawm hauv ntej ib xeem zuj zug; kuv hu xeem twg, xeem ntawd sawv lug ib cuab zuj zug, kuv hu cuab twg cuab ntawd sawv lug ib tsev tuabneeg zuj zug, hab kuv hu tsev twg, tsev ntawd sawv lug ib tug zuj zug.

¹⁵Yog xaiv tau tug twg hab tej khoom kws nwg muab nyob ntawm nwg, mas yuav muab tej kws nwg nyag lug, nwg tej qhov txhua chaw hab nwg tsev tuabneeg hlawv huv tuabsi povtseg, rua qhov nwg tsi noog kuv lug hab nwg ua rua cov Yixalayees poob ntsejmuag.”

¹⁶Nub tom qaab thaus sawv ntxuv, Yausuas txhaj coj cov Yixalayees txhua xeem tuaj, hab kuas ib xeem zuj zug sawv lug rua tom hauv ntej, ces puab txawm rhu ntawv tau xeem Yudas npe.

¹⁷Nwg txhaj coj xeem Yudas ib cuab zuj zug lug, ces puab rhu tau cuab Xelas npe. Ces nwg coj cuab Xelas ib tsev zuj zug lug, puab rhu tau Xanpedis tsev tuabneeg npe.

¹⁸Nwg coj Xanpedis tsev tuabneeg ib tug zuj zug lug, puab rhu tau Akhaas kws yog Kamis tug tub lub npe, Akhaas yog Zelas tug tub Xanpedis tug xeebntxwv hab yog xeem Yudas.

¹⁹Yausuas has rua Akhaas has tas, “Kuv tug tub, koj ca le qha tseeb rua tug TSWV kws yog cov Yixalayees tug Vaajtswv hab leeg koj tej kev txhum. Nwgnuav koj ca le qha rua kuv saib, koj tau ua dlaabtsi? Koj tsi xob zais le.”

²⁰Akhaas teb has tas, “Muaj tseeb tag, kuv tau ua txhum rua tug TSWV kws yog cov Yixalayees tug Vaajtswv lawm. Kuv tau ua le nuav:

²¹Tej khoom kws peb moog txeeb tau ntawd, kuv pum ib lub tsho Npanpiloos kws zoo nkauj heev, hab pum tsib choj nyaj dlawb hab ib dlaim kub nyaav kwvyees ib choj. Kuv ntshaw cov khoom ntawd heev, kuv txhaj muab lug ca lawm. Kuv muab faus rua huv kuv lub tsevntaub hab muab cov nyaj tso rua huv qaab.”

²²Yog le ntawd, Yausuas txhaj khaiv ob peb leeg txivneej moog rua huv Akhaas lub tsevntaub, hab pum cov khoom ntawd faus rua huv, hab cov nyaj nyob huv qaab tag.

²³Puab nqaa cov khoom ntawd huv Akhaas lub tsevntaub lug rua Yausuas hab cov Yixalayees saib hab muab tso taabmeeg tug TSWV.

²⁴Yausuas hab cov Yixalayees txawm coj Akhaas, coj cov nyaj, coj lub tsho, coj dlaim kub hab nwg quaspuj mivnyuas, nwg cov nyuj, nwg cov neeg luav, nwg cov yaaj, nwg cov tshis, nwg lub tsevntaub hab nwg tej khoom txhua yaam moog rua huv lub Haav Covnyom.

²⁵Yausuas has rua Akhaas has tas, “Ua caag koj yuav coj tej kev ntxhuv sab le nuav lug rua peb? Nub nua tug TSWV yuav coj kev covnyom lug rua koj!” Ces taagnrho cov Yixalayees txawm muab pobzeb ntaus Akhaas, ntaus nwg quaspuj mivnyuas tuag taag huv tuabsi, hab muab puab hlawv nrug nwg tej khoom kub nyab taag dlu lug.

²⁶Puab muab pobzeb pov rua sau Akhaas teeb ua ib pawg luj heev. Pawg pobzeb ntawd tseem nyob lug txug naj nub nua. Yog le ntawd, txhaj muab thaaj chaw ntawd hu ua lub Haav Covnyom. Tug TSWV txhaj tsi chim rua puab lawm.