Read Hmong Njua 1 Timautes 1 Bible Online

1 Timautes 1 - Hmong Njua bible

1 Timautes 1

¹Kuv yog Paulus kws yog Yexus Khetos tug timthawj. Vaajtswv tug kws yog peb tug Cawmseej hab Yexus Khetos tug kws peb ca sab rua, tsaa kuv ua ib tug timthawj.

²Timautes, kuv sau tsaab ntawv nuav tuaj rua koj. Kuv hlub koj ib yaam le koj yog kuv tug tub, rua qhov koj hab kuv wb ntseeg ib yaam nkaus. Thov Vaajtswv tug kws yog peb leej Txiv hab peb tug Tswv Yexus Khetos foom koob moov rua koj hlub koj hab paab kuas koj tau nyob kaaj sab lug.

³Kuv xaav kuas koj nyob tuabywv huv lub nroog Efexus. Kuv tub xub ntuag koj le ntawd thaus kuv yuav moog rua peg lub xeev Makedaunias. Rua qhov muaj qee leej txivneej kws nyob huv lub nroog Efexus qha tej zaaj kws tsi tseeb, yog le ntawd, koj yuavtsum txwv tsi xob pub puab qha.

⁴Koj yuavtsum kuas puab muab tej lug nruag hab puab cov yawmkoob tej npe kws sau ca rua huv ntawv kws puab has tsi paub taag ntawd tso tseg, rua qhov tej ntawd yuav ua rua suavdlawg muaj lug sis caav sis tshe xwb, paab tsi tau kuas suavdlawg ua hum Vaajtswv sab. Tsuas yog peb ntseeg Yexus xwb peb txhaj ua tau hum Vaajtswv sab.

⁵Kuv has le nuav tub yog kuv xaav kuas mej muaj lub sab dlawb sab zoo hab muaj lub sab ncaaj nceeg, hab ntseeg Vaajtswv tag tag, mej txhaj yuav txawj sis hlub.

⁶Muaj qee leej tsi totaub tej kws kuv has nuav, puab txhaj yuam kev moog has tej zaaj kws tsi muaj hauvpaug hauvntsis lawm.

⁷Puab xaav ua xwbfwb qha Vaajtswv txuj kevcai, tabsis tej zaaj kws puab muaj sab tawv qha ntawd puab tsi totaub, tsi has tej lug kws puab has, hab tej ntsab lug los puab yeej tsi paub.

⁸Peb paub has tas Vaajtswv txuj kevcai yeej zoo, tabsis yuavtsum yog peb paub coj lawv le txhaj zoo.

⁹Mej yuavtsum ncu ntsoov has tas tej kevcai tsi yog rhawv lug qha cov tuabneeg ncaaj nceeg, tabsis yog rhawv lug rua cov tuabneeg ua txhum kevcai, cov tuabneeg tsi noog lug, cov tuabneeg tsi fwm Vaajtswv, cov tuabneeg txhum, cov tuabneeg tua nam tua txiv, cov tuabneeg tua tuabneeg,

¹⁰cov tuabneeg kws nyam ua kev nkauj kev nraug, cov tuabneeg kws txivneej ntxag txivneej, cov tuabneeg nyag tuabneeg, cov tuabneeg has lug dlaag hab ua timkhawv tsi tseeb lossis ua txhua yaam tsi lawv le Vaajtswv txujlug qha.

¹¹Txujlug ntawd muaj nyob huv Txujmoo Zoo kws Vaajtswv tug kws muaj fwjchim tau muab rua kuv qha.

¹²Kuv ua peb tug Tswv Yexus Khetos tsaug, rua qhov nwg pub rua kuv muaj sa muaj zug ua num. Kuv ua nwg tsaug, rua qhov nwg suav has tas tsimnyog kuv ua nwg teg num, nwg txhaj tsaa kuv ua.

¹³Txawm yog yaav taag lug kuv thuam nwg, kuv tsimtxom nwg hab kuv ua saib tsi taug nwg los Vaajtswv tseem hlub kuv, rua qhov thaus ntawd kuv tsi tau ntseeg hab tsi paub, kuv txhaj ua le ntawd rua nwg.

¹⁴Peb tug Tswv Yexus Khetos foom koob moov ntau kawg rua kuv hab paab kuas kuv muab sab rau ntseeg hab hlub lwm tug. Tej ntawd yog tej kws Vaajtswv pub rua txhua tug kws nrug Yexus Khetos koom ib txujsa.

¹⁵Qhov kws suavdlawg has tas, Yexus Khetos lug huv nplajteb nuav yog nwg lug paab cov tuabneeg kws muaj txim kuas puab dlim puab lub txim. Qhov nuav yog qhov kws tseemceeb, tsimnyog suavdlawg ca sab hab txais yuav. Kuv yog tug muaj txim luj dlua cov tuabneeg kws muaj txim huv tuabsi,

¹⁶tabsis Vaajtswv tseem hlub kuv. Qhov kws Vaajtswv hlub kuv le ntawd, tub yog Vaajtswv qha rua suavdlawg paub has tas, txawm yog kuv muaj txim luj dlua suavdlawg los Yexus Khetos tseem ua sab ntev rua kuv hab. Yexus Khetos ua le ntawd yog nwg ua yaam ntxwv qha rua cov tuabneeg kws yaav tom ntej yuav lug ntseeg nwg hab yuav tau txujsa ntev moog ibtxhis, kuas puab paub has tas Yexus tseem ua sab ntev rua puab ib yaam le Yexus ua rua kuv lawm.

¹⁷Suavdlawg yuavtsum fwm Vaajtswv hab ua rua nwg tau koob meej moog ibtxhis le. Nwg yog tug Vaajntxwv kws muaj tshwjchim luj dlua ndlais. Nwg muaj sa nyob moog ibtxhis tsi txawj tuag. Nwg tuab leeg xwb txhaj yog Vaajtswv, hab peb qhovmuag tsi pum nwg! Amees.

¹⁸Kuv tug tub Timautes, tej lug kws kuv qha koj nuav yog lawv le tej lug kws yaav taag lug cov tuabneeg kws paub tej kws yuav muaj lug yaav tom ntej nuav tub has txug koj lawm. Koj yuavtsum muab tej lug ntawd lug ua ntaaj ua rag, koj txhaj yuav tawmtsaam yeej yeebncuab.

¹⁹Koj yuavtsum muab sab rau ntseeg hab muaj lub sab ncaaj sab nceeg. Muaj qee leej puab tsi ua lawv le puab lub sab qha, puab txhaj tso Vaajtswv tseg lawm.

²⁰Cov tuabneeg ntawd ib tug yog Himena-us hab ib tug yog Alexaades. Kuv tub muab obtug tso rua dlaab Ntxwgnyoog lawm. Kuv ua le ntawd, kuas obtug tsi xob thuam Vaajtswv.