Read Hmong Njua 2 Timautes 2 Bible Online

2 Timautes 2 - Hmong Njua bible

2 Timautes 2

¹Kuv tug tub, koj yuavtsum ca sab rua Vaajtswv txuj koob moov kws Vaajtswv pub rua peb cov kws nrug Yexus Khetos sis raug zoo.

²Koj yuavtsum muab tej lug kws koj hab muaj ntau leej nov kuv qha lawm qha rua cov tuabneeg kws koj ca sab tau has tas, puab yuav txawj qha tej ntawd rua lwm tug.

³Koj yuavtsum nyaj kev txomnyem, rua qhov koj yog Yexus Khetos tug tubrog kws ncaaj nceeg.

⁴Rua qhov tug tubrog kws taabtom moog ntaus rog, nwg yeej ua lawv le nwg tug thawj tubrog lub sab nyam xwb, nwg yuav tsi moog ua laj ua teb hab ua laag ua luam ib zag le.

⁵Tug kws sis tw dlha, yog nwg tsi ua lawv le kevcai dlha, nwg yuav tsi tau nqe zug.

⁶Tug ua teb kws rau sab ntso ua, nwg yuav xub tau noj tej qoobloo kws nwg sau tau.

⁷Tej lug kws kuv has nuav, koj yuavtsum muab ua tuab zoo xaav, Vaajtswv yuav paab kuas koj totaub txhua lu huv tuabsi.

⁸Koj yuavtsum ncu ntsoov Yexus Khetos kws yog Daviv tug xeebntxwv kws Vaajtswv tsaa sawv huv qhov tuag rov qaab lug lawm, lawv le Txujmoo Zoo kws kuv qha.

⁹Tub yog vim kuv qha Txujmoo Zoo, kuv txhaj raug kev tsimtxom, hab raug luas muab saw hlau khi ib yaam le kuv yog tug tuabneeg ua phem. Txawm yog luas khi tau kuv lawm los xij, yeej tsi muaj leejtwg yuav khi tau Vaajtswv txujlug.

¹⁰Tub yog vim le ntawd, kuv txhaj ua sab ntev nyaj ib puas tsaav yaam kev txomnyem, rua qhov kuv hlub cov tuabneeg kws Vaajtswv tau xaiv ca lawm, hab xaav kuas puab lug ntseeg Yexus Khetos, puab txhaj dlim puab lub txim ib yaam le peb, hab puab txhaj tau Vaajtswv txuj koob moov hab tug tshwjchim kws ci ntsaa ab moog ibtxhis.

¹¹Muaj ib lu lug tseeb kws has le nuav: “Yog peb nrug nwg tuag lawm, peb yuav tau nrug nwg sawv huv qhov tuag rov qaab lug.

¹²Yog peb ua taug sab ntev, peb yuav tau nrug nwg kaav. Yog peb tso nwg tseg, nwg yeej yuav tso peb tseg hab.

¹³Txawm yog peb tsi ua ncaaj los nwg tseem ua ncaaj. Rua qhov nwg tsi rov dlaag nwg ib zag le.”

¹⁴Koj yuavtsum qha zaaj nuav rua cov ntseeg hab ntuag puab kuas puab tsi xob sis caav sis tshe txug tej nyuas lug kws suavdlawg has, tej ntawd tsi muaj qaabhau dlaabtsi. Tej lug sis caav sis tshe ntawd yuav ua rua cov tuabneeg kws noog yuam kev xwb.

¹⁵Koj yuavtsum xyum ua koj lub neej kuas hum Vaajtswv sab, hab muab sab rau ua koj teg num tag tag, koj txhaj yuav tsi txaajmuag. Hab koj yuavtsum qha lawv le Vaajtswv txujlug.

¹⁶Koj tsi xob ua le cov tuabneeg kws naj nub has ua dlog ua dlig, tej ntawd tsi muaj qaabhau dlaabtsi, tsuas muaj yuav ua rua suavdlawg tso Vaajtswv tseg zuj zug xwb.

¹⁷Tej lug kws puab has ntawd yuav fuam luj ib yaam le lub qhov txhaab kws qawj tub zuj zug. Cov xwbfwb kws has tej lug ntawd muaj ib tug yog Himena-us, ib tug yog Filetus.

¹⁸Ob tug qha tsi lawv le Vaajtswv txujlug. Obtug qha has tas, cov ntseeg tub sawv huv qhov tuag rov qaab lug lawm. Obtug qha le ntawd, ua rua cov ntseeg qee leej tsi muab sab rau ntseeg lawm.

¹⁹Tabsis tug ncej kws Vaajtswv muab txhus ca lawm yeej nyob khov kho. Muaj lug sau ca rua ntawm tug ncej ntawd has tas, “Vaajtswv yeej paub txhua tug kws yog Vaajtswv mivnyuas.” Hab has tas tug kws has tas, nwg yog Vaajtswv mivnyuas, tug ntawd yuavtsum tso nwg tej kev txhum tseg.

²⁰Nyob huv cov tuabneeg kws npluanuj tej tsev, muaj taig nyaj taig kub, hab taig zeb taig aav. Tej taig nyaj taig kub, puab muab lug siv thaus muaj qhua tuaj, tabsis thaus tsi muaj qhua tuaj, puab siv tej taig zeb taig aav xwb.

²¹Yog leejtwg tso nwg tej kev phem kev qas huv tuabsi tseg, Vaajtswv yuav muab ib teg num tseemceeb rua nwg ua, rua qhov nwg zoo sab muab nwg lub sab hab lub cev huv tuabsi rua Vaajtswv kaav, hab tog ntsoov saib Vaajtswv yuav khaiv nwg moog ua teg num twg.

²²Koj tsi xob ua sab heev ib yaam le cov hluas ibtxwm ua. Koj yuavtsum ua tuabneeg ncaaj nceeg hab muab sab rau ntseeg, hlub lwm tug hab nrug suavdlawg sis raug zoo. Koj yuavtsum ua zoo le cov tuabneeg kws ua hum Vaajtswv sab ua. Puab yog cov kws naj nub thov Vaajtswv paab puab.

²³Koj tsi xob ua le cov tuabneeg kws naj nub has tej zaaj kws tsi muaj hauvpaug hauvntsis, rua qhov koj tub paub lawm has tas, tej ntawd yuav ua rua suavdlawg muaj lug sis caav sis tshe xwb.

²⁴Tug kws ua Vaajtswv tug tubkhai yuavtsum tsi xob nrug luas sis caav sis tshe, nwg yuavtsum hlub txhua tug, muab sab rau qha, ua sab ntev,

²⁵hab ua tuab zoo ntuag cov kws thuam nwg. Yog nwg ua le ntawd, tej zag Vaajtswv yuav pub kuas cov tuabneeg ntawd muaj sijhawm tso puab tej kev txhum tseg, hab ua lawv le Vaajtswv txujlug.

²⁶Hab puab yuav ncu dlheev has tas, puab tub maag dlaab Ntxwgnyoog lub vuj hlua lawm, hab dlaab Ntxwgnyoog pheej yuam kuas puab ua lawv le dlaab Ntxwgnyoog lub sab. Thaus puab ncu le ntawd, puab yuav tsiv dlim.