Read Hmong Njua Henplais 13 Bible Online

Henplais 13 - Hmong Njua bible

Henplais 13

¹Cov ntseeg ib tug yuavtsum hlub ib tug ib yaam le kwvtij sis hlub.

²Mej yuavtsum ncu ntsoov hu tej qhua lug su huv mej tej tsev. Muaj qee leej hu tau cov timtswv ceebtsheej los puab tub tsi paub has tas, yog cov timtswv.

³Mej yuavtsum ncu ntsoov cov tuabneeg kws raug kaw huv tsev lojcuj, ib yaam le mej nrug puab raug kaw, hab mej yuavtsum ncu ntsoov cov tuabneeg kws raug kev tsimtxom, ib yaam le mej nrug puab raug.

⁴Txujkev sis yuav yog ib qho kws tseemceeb, tsimnyog mej txhua tug yuavtsum saib taug qhov ntawd. Tug quasyawg hab tug quaspuj, ib tug yuavtsum ncaaj nceeg rua ib tug, rua qhov Vaajtswv yuav rau txim rua cov tuabneeg kws ua txhum kev nkauj kev nraug, hab rua cov tuabneeg kws ntxag luas quaspuj luas quasyawg.

⁵Mej tsi xob qaug rua nyaj rua kub, mej muaj npaum le caag mej ca le zoo sab rua tej kws mej muaj, rua qhov Vaajtswv has tas, “Kuv yuav tsi tso koj tseg lossis kuv yuav tsi muab koj povtseg ib zag le.”

⁶Yog le ntawd peb tsi xob ntshai, peb ca le has tas: “Tug Tswv yog tug kws paab kuv, kuv yuav tsi ntshai. Leejtwg yuav ua le caag tau rua kuv?”

⁷Mej yuavtsum ncu ntsoov txug cov thawj kws yaav taag lug puab ua cov saib mej, hab qha Vaajtswv txujlug rua mej. Mej yuavtsum ua tuab zoo xaav saib thaus puab ua puab lub neej zoo le caag hab puab tuag le caag. Mej yuavtsum muab sab rau ntseeg ib yaam le puab.

⁸Yexus Khetos, nwg yeej zoo nwg le qub, naag mo hab nub nua nwg zoo le caag, nwg yeej zoo le ntawd moog ibtxhis le.

⁹Mej tsi xob ca tej tuabneeg kws qha txawv txawv ntxag tau mej yuam kev. Qhov kws mej lub sab muaj zug tub yog vim Vaajtswv foom koob moov rua mej, tsi yog vim mej caiv tsi noj yaam nuav yaam u. Tej kevcai ntawd yeej paab tsi tau cov tuabneeg kws xyum coj lawv le ntawd.

¹⁰Cov povthawj kws ua num huv cov Yudais lub tsevntaub, puab tsi muaj cai noj tej kws luas coj tuaj fij theej txhoj sau lub thaaj.

¹¹Cov Yudais tug Povthawj Hlub naj zag tua tsaj nqaa ntshaav moog theej txhoj huv Chaav kws Dlawbhuv Kawg Nkaus, tabsis nwg muab tug tsaj ntawd nqaa moog hlawv saab ntug yeej nrau.

¹²Tub yog vim le ntawd, luas txhaj coj Yexus moog tua saab ntug nroog nrau. Yexus tuag le ntawd tub yog nwg muab nwg cov ntshaav ntxuav suavdlawg lub txim huv tuabsi moog.

¹³Yog le ntawd, peb ca le tawm moog cuag nwg saab ntug yeej nrau hab nrug nwg tiv kev txaajmuag.

¹⁴Rua qhov huv nplajteb nuav yeej tsi muaj ib lub nroog kws yuav nyob moog ibtxhis rua peb nyob, tabsis peb taabtom tog lub nroog kws Vaajtswv ua rua peb nyob yaav tom ntej nuav.

¹⁵Yog le ntawd, peb cov kws ntseeg Yexus peb yuavtsum naj nub ua Vaajtswv tsaug. Peb ua le ntawd, ib yaam le peb muab tej kws hum Vaajtswv sab fij rua Vaajtswv sau lub thaaj. Kuv has le nuav yog kuv has tas, peb lub qhovncauj yuavtsum naj nub ua Vaajtswv tsaug.

¹⁶Mej yuavtsum ncu ntsoov ua num zoo hab ib tug paab ib tug, rua qhov tej ntawd hum Vaajtswv sab.

¹⁷Mej yuavtsum noog cov thawj kws saib mej tej lug hab ua lawv le puab has. Puab naj nub saib mej, puab tsi nkeeg hab tsi dlhuav le, rua qhov puab yuavtsum qha tej num kws puab ua rua Vaajtswv. Yog mej noog puab lug, puab yuav kaaj sab lug ua puab tej num. Yog mej tsi noog puab lug, puab yuav nyuaj sab xwb, puab yuav paab tsi tau mej hlo le.

¹⁸Thov mej naj nub thov Vaajtswv paab peb, rua qhov peb paub tseeb has tas peb tsi tau ua txhum, peb naj nub xaav ua tej num zoo xwb.

¹⁹Kuv thov mej kub sab lug thov Vaajtswv kuas nwg yuav khaiv kuv rov tuaj saib mej sai sai.

²⁰Vaajtswv tub tsaa peb tug Tswv Yexus sawv huv qhov tuag rov qaab lug lawm. Tub yog vim Yexus tuag, nwg txhaj ua tau tug Tswv Yug Yaaj kws muaj fwjchim luj. Nwg cov ntshaav ua lub cim nas rua Vaajtswv tej lug cog tseg kws yuav nyob moog ibtxhis.

²¹Thov Vaajtswv tug kws paab mej tau zoo nyob kaaj sab lug, pub txhua tsaav yaam zoo kws mej yuavtsum muaj rua mej, mej txhaj ua tau lawv le Vaajtswv lub sab nyam. Hab thov Vaajtswv tshoov peb cov kws ntseeg Yexus Khetos lub sab kuas peb ua tej kws hum Vaajtswv sab. Thov kuas Yexus Khetos tau ntsejmuag moog ibtxhis le! Amees.

²²Cov kwvtij, kuv thov mej ua sab ntev noog tej lug kws kuv sau tuaj ntuag mej nuav, rua qhov kuv yeej sau tsi ntau pistsawg tuaj rua mej.

²³Kuv has rua mej paub has tas, luas tub tso peb tug kwv Timautes tawm huv tsev lojcuj lawm. Yog nwg tuaj txug sai, kuv yuav coj nwg nrug kuv tuaj saib mej.

²⁴Thov mej has peb tej lug noj qaab nyob zoo rua mej cov thawjcoj hab cov ntseeg Vaajtswv txhua tug huv tuabsi.

²⁵Thov Vaajtswv foom koob moov rua mej suavdlawg.