Read Hmong Njua 1 Petus 5 Bible Online

1 Petus 5 - Hmong Njua bible

1 Petus 5

¹Kuv thov ntuag cov txwjlaug kws saib mej cov kws ntseeg Vaajtswv, kuv yog ib tug txwjlaug hab. Kuv yeej pum Yexus Khetos raug kev txomnyem, hab thaus Yexus rov qaab lug kuv yuav tau ntsejmuag ib yaam le nwg.

²Mej yuavtsum yug paab yaaj kws Vaajtswv muab tso rua mej saib. Vaajtswv tub pum zoo muab teg num ntawd rua mej ua lawm. Yog le ntawd, mej yuavtsum zoo sab hlo ua tsi xob laam tuav teg num ntawd. Mej yuavtsum muab sab rau ua tag tag, tsi xob pheej xaav txug tej nqe zug kws mej yuav tau xwb.

³Mej tsi xob yuam paab yaaj kws Vaajtswv muab tso rua mej saib, tabsis mej yuavtsum ua yaam ntxwv zoo rua puab xyum.

⁴Yog mej ua le ntawd, thaus tug Tswv yug yaaj kws yog tug thawj rov qaab lug, nwg yuav muab lub mom kub kws ci ntsaa ab moog ibtxhis ua nqe zug rua mej.

⁵Ib yaam nkaus le ntawd, mej cov kws yog tub hluas, mej yuavtsum noog cov yawm laug tej lug. Mej txhua tug yuavtsum txu mej lub fwjchim hab ib leeg paab ib leeg; rua qhov Vaajtswv txujlug has tas, “Vaajtswv tawmtsaam tug kws khaavtheeb, tabsis Vaajtswv pub koob moov rua tug kws txu fwjchim.”

⁶Yog le ntawd, mej yuavtsum txu mej lub fwjchim hab ca Vaajtswv tug kws muaj fwjchim kaav mej. Yog mej ua le ntawd thaus txug nub kws Vaajtswv teem ca lawm, mej yuav tau ntsejmuag.

⁷Vaajtswv yog tug kws naj nub tsomkwm mej, yog le ntawd mej ca le muab mej tej kev nyuaj sab huv tuabsi tso plhuav rua Vaajtswv.

⁸Mej yuavtsum ceevfaaj zuv zoo tsi xob nkeeg, rua qhov dlaab Ntxwgnyoog tug kws yog mej tug yeebncuab, nwg moog moog lug lug ib yaam le tug tsuv ntxhuav kws quaj nrhav tum tsaj noj.

⁹Mej yuavtsum muab sab rau ntseeg hab tawmtsaam dlaab Ntxwgnyoog, rua qhov mej tub paub lawm has tas, cov kwvtij ntseeg kws nyob thoob plawg huv qaab ntuj nuav, puab taabtom raug kev tsimtxom ib yaam le mej raug hab.

¹⁰Tabsis thaus mej raug kev tsimtxom ib nyuas ntu dlhau lawm, tom qaab ntawd Vaajtswv tug kws muaj koob moov nplua mag yuav paab kuas mej ua tau tuabneeg zoo kawg nkaus, hab kuas mej muab sab rau ntseeg Vaajtswv heev ntxiv. Nwg yuav txhawb mej tug zug kuas mej nyob ruaj nreeg. Nwg yog tug kws muaj lub sab hlub mej kawg nkaus le. Nwg yuav pub nwg tug tshwjchim ci ntsaa ab kws nyob moog ibtxhis rua mej cov kws tub nrug Yexus Khetos koom ib txujsa lawm.

¹¹Thov kuas Vaajtswv lub fwjchim muaj nyob moog ibtxhis le! Amees.

¹²Tug kws paab kuv xaa tsaab ntawv tuab tuab lu nuav yog Xilas, nwg yog ib tug kwvtij ntseeg kws muaj lub sab ncaaj nceeg. Kuv sau tsaab ntawv nuav tuaj txhawb mej zug hab qha rua mej paub has tas, Vaajtswv txuj koob moov zoo kawg nkaus le. Mej yuavtsum muab sab rau ua lawv le kuv tub qha rua mej lawm.

¹³Cov ntseeg kws nyob huv lub nroog Npanpiloos kws Vaajtswv tau xaiv lawm ib yaam le nwg xaiv mej, puab has noj qaab nyob zoo rua mej, hab kuv tug tub Malakaus los has noj qaab nyob zoo rua mej ib yaam nkaus.

¹⁴Mej ib leeg yuavtsum hlub ib leeg txhaj tsimnyog qhov kws mej yog cov ntseeg. Thov kuas txujkev thaajyeeb nrug mej txhua tug kws ntseeg Yexus Khetos lawm.