Read Hmong Njua 1 Yauhaas 1 Bible Online

1 Yauhaas 1 - Hmong Njua bible

1 Yauhaas 1

¹Peb sau zaaj kws has txug Txujlug kws cawm tuabneeg txujsa qha rua mej paub; Txujlug ntawd yeej nyob thaus chivkeeb lug lawm. Peb nov nwg tej lug, peb qhovmuag pum nwg hab peb txhais teg tau tuav nwg lawm.

²Thaus tug kws cawm tuabneeg txujsa ntawd lug peb puavleej pum nwg, peb txhaj has txug nwg zaaj hab qha txujsa ntev dlhawv moog ibtxhis rua mej. Txujsa ntawd yeej nrug leej Txiv nyob hab leej Txiv tub qha txujsa ntawd rua peb lawm.

³Peb qha tej kws peb pum hab peb nov lawm rua mej, kuas mej txhaj tau lug nrug leej Txiv hab nwg tug Tub Yexus Khetos sis raug zoo, ib yaam le peb tub nrug nwg sis raug zoo lawm.

⁴Peb sau le nuav tuaj rua mej, kuas peb txujkev zoo sab puv npo.

⁵Zaaj nuav yog zaaj kws Vaajtswv tug Tub qha rua peb, peb txhaj qha zaaj nuav rua mej has tas: Vaajtswv yog qhov pum kev, hab tsi muaj ib qhov tsaus nyob huv nwg hlo le.

⁶Yog peb has tas, peb tub nrug Vaajtswv sis raug zoo lawm, tabsis peb tseem ua peb lub neej ib yaam le cov kws nyob huv qhov tsaus ntuj ua, yog le ntawd tej kws peb has lossis tej kws peb ua puavleej dlaag huv tuabsi.

⁷Tabsis yog peb nyob huv qhov pum kev ib yaam le Vaajtswv tug kws nyob huv qhov pum kev, peb ib leeg yeej nrug ib leeg sis raug zoo hab Vaajtswv tug Tub Yexus Khetos cov ntshaav tub ntxuav peb tej kev txhum huv tuabsi lawm.

⁸Yog peb has tas peb tsi muaj txhum, peb rov dlaag peb xwb, hab peb yeej tsi paub qhov tseeb hlo le.

⁹Tabsis yog peb leeg peb tej kev txhum rua Vaajtswv, Vaajtswv yog tug ncaaj nceeg, nwg yuav ua lawv le nwg tau coglug tseg; nwg yuav zaam peb tej kev txhum, hab nwg yuav ntxuav peb tej kev txhum huv tuabsi moog.

¹⁰Yog peb has tas peb tsi tau ua txhum, peb has le ntawd kuj ib yaam le peb has tas Vaajtswv yog tug dlaag, hab peb yeej tsi ntseeg nwg tej lug le.