Read Hmong Njua 1 Yauhaas 2 Bible Online

1 Yauhaas 2 - Hmong Njua bible

1 Yauhaas 2

¹Cov mivnyuas, kuv sau tsaab ntawv nuav tuaj qha mej, mej txhaj le yuav tsi ua txhum; tabsis yog leejtwg ua txhum, peb muaj ib tug thov leej Txiv paab peb, tug ntawd yog Yexus Khetos tug kws ncaaj nceeg;

²hab Yexus Khetos yog tug kws tuag theej peb lub txhoj Vaajtswv txhaj zaam peb tej kev txhum, tsi yog zaam peb tej kev txhum xwb, tabsis nwg zaam txhua tsaav tuabneeg huv nplajteb nuav tej kev txhum huv tuabsi hab.

³Yog peb ua lawv le Vaajtswv tej lug qha, txhaj yog peb paub nwg tseeb lawm.

⁴Yog ib tug has tas, “Kuv tub paub Vaajtswv lawm,” tabsis tug ntawd tsi ua lawv le Vaajtswv tej lug, ces tug ntawd dlaag xwb, nwg yeej tsi paub qhov tseeb le.

⁵Tabsis tug kws ua lawv le Vaajtswv tej lug, tug ntawd txhaj yog tug kws hlub Vaajtswv tag. Tub yog vim le nuav, peb txhaj paub tseeb has tas peb nrug Vaajtswv sis raug zoo tag.

⁶Yog leejtwg has tas, “Kuv tub nrug Vaajtswv sis raug zoo lawm,” tug ntawd yuavtsum ua nwg lub neej kuas zoo le Yexus Khetos lub.

⁷Cov kwvtij kws kuv hlub, txuj kevcai kws kuv sau tuaj rua mej nuav tsi yog txuj tshab; tabsis yog txuj qub kws mej ibtxwm coj thaus chivkeeb lug lawm. Txuj kevcai qub ntawd yog txuj kws mej tub nov lawm.

⁸Txawm yog le caag los txuj kevcai kws kuv sau tuaj rua mej nuav yeej yog txuj tshab, rua qhov mej saib rua ntawm Yexus Khetos hab ntawm mej, mej yeej pum has tas txuj kevcai nuav yog txuj tshab. Vim qhov tsaus ntuj taabtom yuav dlhau moog, hab qhov pum kev taabtom ci ntsaa ab lug lawm.

⁹Tug kws has tas, “Kuv nyob huv qhov pum kev,” tabsis nwg tseem ntxub nwg kwv nwg tij, tug ntawd tseem nyob huv qhov tsaus ntuj.

¹⁰Tug kws hlub nwg kwv nwg tij, tug ntawd yog tug kws nyob huv qhov pum kev, hab nwg yuav tsi ua ib yaam dlaabtsi rua lwm tug ua txhum.

¹¹Tabsis tug kws ntxub nwg kwv nwg tij, tug ntawd nyob huv qhov tsaus ntuj; nwg moog kev ib yaam le tug kws maub mo ntuj, hab nwg tsi paub has tas nwg taabtom moog txug qhov twg, rua qhov qhov tsaus ntuj plooj nwg lub qhovmuag lawm.

¹²Cov mivnyuas, kuv sau tej nuav tuaj rua mej, rua qhov Vaajtswv tub zaam txim rua mej txhua tug kws Yexus Khetos tuag theej lawm.

¹³Kuv sau tej nuav tuaj rua mej cov kws ua txiv, rua qhov mej tub paub tug kws ibtxwm muaj sa nyob thaus chivkeeb lug lawm. Kuv sau tej nuav tuaj rua mej cov kws yog tub hluas, rua qhov mej tub tawmtsaam yeej dlaab Ntxwgnyoog lawm.

¹⁴Cov mivnyuas, kuv sau tej nuav tuaj rua mej, rua qhov mej tub paub leej Txiv lawm. Kuv sau tej nuav tuaj rua mej cov kws ua txiv, rua qhov mej tub paub tug kws ibtxwm muaj sa nyob thaus chivkeeb lug lawm. Kuv sau tej nuav tuaj rua mej cov tub hluas, rua qhov mej muaj zug heev; Vaajtswv txujlug nyob huv mej lub sab, hab mej tub tawmtsaam yeej dlaab Ntxwgnyoog lawm.

¹⁵Mej tsi xob hlub lub nplajteb lossis ca sab rua ib yaam dlaabtsi kws nyob huv lub nplajteb. Yog mej hlub lub nplajteb lawm, mej yeej yuav tsi hlub leej Txiv tug kws hlub mej.

¹⁶Txhua yaam kws yog nplajteb le, tsi has tej kws tuabneeg lub sab ntshaw, tej kws tuabneeg lub qhovmuag pum hab xaav yuav, hab txhua yaam huv nplajteb kws tuabneeg qhuas has tas yog yaam kws tseemceeb; tej ntawd puavleej yog nplajteb le xwb, tsi muaj ib yaam kws yog leej Txiv le.

¹⁷Lub nplajteb hab txhua yaam huv nplajteb kws tuabneeg ntshaw taabtom yuav dlua moog; tabsis tug kws ua lawv le Vaajtswv lub sab nyam, tug ntawd yuav nyob moog ibtxhis le.

¹⁸Cov mivnyuas, tub yuav txug lub sijhawm kawg! Mej tub nov lawm has tas tug kws ua yeebncuab rua Yexus Khetos yuav lug; nwgnuav tub muaj ntau leej ua yeebncuab rua Yexus Khetos lawm. Yog le ntawd peb txhaj paub has tas, tub yuav txug lub sijhawm kawg.

¹⁹Puab cov ntawd tub ncaim peb moog lawm, rua qhov puab tsi yog peb cov; yog puab yog peb cov tag, puab yeej yuav nrug peb nyob. Tabsis qhov kws puab ncaim peb moog, tub ua rua suavdlawg paub has tas, puab yeej tsi yog peb cov.

²⁰Tabsis Yexus Khetos tub khaiv Vaaj Ntsujplig tug Dlawbhuv lug nrug mej nyob lawm, yog le ntawd mej txhua tug txhaj paub qhov tseeb.

²¹Qhov kws kuv sau tsaab ntawv nuav tuaj rua mej, tsi yog vim mej tsi paub qhov tseeb; tabsis vim mej tub paub lawm, hab mej paub has tas tug kws paub qhov tseeb, nwg yeej tsi dlaag ib zag le.

²²Yog le ntawd leejtwg yog tug kws has dlaag? Tug kws has dlaag, tub yog tug kws has tas Yexus tsi yog tug Mexiyas. Tug kws has le ntawd yog Yexus Khetos tug yeebncuab, rua qhov nwg tsi kaam ntseeg leej Txiv hab leej Tub.

²³Tug kws tsi ntseeg leej Tub, tug ntawd yeej tsi ntseeg leej Txiv. Tug kws ntseeg leej Tub, tug ntawd yeej ntseeg leej Txiv ib yaam nkaus hab.

²⁴Yog le ntawd, mej yuavtsum khaws tej lug kws mej nov thaus u lug lawm ca rua huv mej lub sab. Yog mej ncu ntsoov tej kws mej nov thaus u lug lawm, mej yeej yuav naj nub nrug leej Tub hab leej Txiv sis raug zoo.

²⁵Qhov nuav yog lawv le tej lug kws Yexus Khetos coglug tseg rua peb has tas, nwg yuav pub txujsa ntev dlhawv moog ibtxhis rua peb.

²⁶Tej kws kuv sau tuaj rua mej nuav, yog kuv has txug cov tuabneeg kws xaav ntxag kuas mej yuam kev.

²⁷Tabsis Yexus Khetos tub khaiv Vaaj Ntsujplig tug Dlawbhuv lug nrug mej nyob lawm. Yog Vaajtswv tug Ntsujplig tub nyob huv mej lub sab lawm, tsi taag yuav muaj tuabneeg qha mej. Rua qhov Vaajtswv tug Ntsujplig qha txhua tsaav yaam rua mej, hab tej kws nwg qha rua mej ntawd puavleej tseeb xwb, tsi muaj ib qho dlaag le. Yog le ntawd, mej yuavtsum ua lawv le tej kws Vaaj Ntsujplig qha rua mej, hab ca Yexus Khetos kaav mej lub sab moog le.

²⁸Cov mivnyuas, mej yuavtsum ca Yexus Khetos kaav mej lub neej, yog mej ua le ntawd thaus txug nub kws nwg rov qaab lug, mej hab peb txhaj le yuav tsi ntshai hab thaus peb pum nwg peb yuav tsi txaajmuag rua nwg.

²⁹Mej yeej paub has tas Yexus Khetos yog tug kws ncaaj nceeg; yog le ntawd tsimnyog mej yuav paub has tas txhua tug kws ua ncaaj nceeg yeej yog Vaajtswv cov mivnyuas.