Read Hmong Njua 1 Yauhaas 3 Bible Online

1 Yauhaas 3 - Hmong Njua bible

1 Yauhaas 3

¹Mej sim ua tuab zoo xaav saib leej Txiv hlub peb npaum le caag! Nwg hlub peb kawg nkaus le, nwg txhaj hu peb ua nwg cov mivnyuas, hab qhov tseeb peb yeej yog Vaajtswv cov mivnyuas tag. Tub yog vim le ntawd cov tuabneeg kws tsi paub Vaajtswv, puab txhaj tsi paub peb.

²Cov kwvtij kws kuv hlub, nwgnuav peb yog Vaajtswv cov mivnyuas lawm, tabsis peb tseem tsi tau paub tseeb has tas yaav tom ntej peb yuav zoo le caag. Peb tsuas paub has tas thaus Yexus Khetos rov qaab lug, peb yuav zoo le nwg, rua qhov peb yuav pum tseeb has tas nwg zoo le caag tag.

³Txhua tug kws ca sab rua Yexus Khetos yeej yuav tswj kuas nwg ua tau lub neej dlawbhuv ib yaam le Yexus Khetos kws yog tug dlawbhuv.

⁴Tug kws ua txhum, tug ntawd rhuav Vaajtswv txuj kevcai, rua qhov txujkev txhum yeej yog qhov kws rhuav txuj kevcai.

⁵Mej tub paub lawm has tas, qhov kws Yexus Khetos lug huv nplajteb nuav, tub yog nwg lug tuag theej tuabneeg suavdlawg lub txhoj, hab mej yeej paub has tas nwg tsi tau ua txhum ib qho le.

⁶Tug kws ca Yexus Khetos kaav nwg lub neej lawm, tug ntawd tsi nyam ua txhum; tabsis tug kws tseem nyam ua txhum, tug ntawd yeej tsi tau pum lossis paub Yexus Khetos le.

⁷Kuv cov mivnyuas, mej tsi xob pub leejtwg dlaag ntxag tau mej! Tug kws ua zoo, tug ntawd yog tug kws ncaaj nceeg ib yaam le Yexus Khetos yog tug ncaaj nceeg.

⁸Tug kws nyam ua txhum, tug ntawd yog dlaab Ntxwgnyoog mivnyuas, rua qhov dlaab Ntxwgnyoog yog tug kws ua txhum thaus chivkeeb lug lawm. Qhov kws Vaajtswv tug Tub lug huv nplajteb nuav, tub yog nwg lug rhuav dlaab Ntxwgnyoog teg num.

⁹Tug kws yog Vaajtswv mivnyuas lawm, tug ntawd yeej tsi nyam ua txhum, rua qhov nwg yog Vaajtswv cov noob; hab Vaajtswv yog nwg txiv, nwg txhaj tsi nyam ua txhum.

¹⁰Tug kws yog Vaajtswv mivnyuas hab tug kws yog dlaab Ntxwgnyoog mivnyuas, sis txawv le nuav: tug kws tsi nyam ua ncaaj nceeg lossis tsi hlub nwg kwv nwg tij, tug ntawd tsi yog Vaajtswv mivnyuas.

¹¹Tej lug kws has tas, peb ib leeg yuavtsum hlub ib leeg, tej lug nuav mej yeej nov thaus chivthawj lug lawm.

¹²Peb tsi xob ua le Ka-ees; Ka-ees ca dlaab Ntxwgnyoog kaav nwg lub sab, nwg muab nwg tug kwv Anpees tua povtseg. Vim le caag Ka-ees txhaj tua nwg tug kwv? Rua qhov nwg teg num phem, hab nwg tug kwv teg num zoo.

¹³Cov kwvtij, yog tej tuabneeg kws nyob huv nplajteb nuav ntxub mej, mej tsi xob poob sab.

¹⁴Peb paub has tas, peb tub dlim txujkev tuag lawm, nwgnuav peb muaj txujsa tshab; peb paub le nuav, rua qhov peb muaj lub sab hlub peb cov kwvtij. Tug kws tsi muaj lub sab hlub lwm tug, tug ntawd zoo ib yaam le tug tuabneeg kws tuag lawm.

¹⁵Tug kws ntxub nwg kwv nwg tij, tug ntawd ua txhum ib yaam le tug tuabneeg kws tua tuabneeg, mej tub paub lawm has tas tug tuabneeg tua tuabneeg yeej tsi tau txujsa ntev dlhawv moog ibtxhis le.

¹⁶Qhov kws peb paub txujkev hlub yog le nuav: Yexus Khetos muab nwg txujsa lug txhwv peb. Yog le ntawd tsimnyog peb yuavtsum zoo sab muab peb txujsa txhwv peb cov kwvtij hab.

¹⁷Yog tug npluanuj pum nwg kwv nwg tij txomnyem, tabsis nwg tsi quavntsej puab le, tug ntawd yuav ua le caag has tau has tas, nwg yog tug kws hlub Vaajtswv.

¹⁸Cov mivnyuas, peb tsi xob hlub luas ntawm lub ncauj lu lug xwb; tabsis peb yuavtsum paab puab, suavdlawg txhaj pum has tas peb muaj lub sab hlub tag tag.

¹⁹Yog le ntawd peb txhaj paub has tas, peb yog Vaajtswv tug kws yog qhov tseeb cov mivnyuas; yog le ntawd peb txhaj tsi ntshai moog cuag Vaajtswv,

²⁰rua qhov thaus peb lub sab qha has tas peb ua txhum, peb paub has tas Vaajtswv yog tug kws paub peb lub sab hab nwg yeej paub ib puas tsaav yaam huv tuabsi.

²¹Yog le ntawd cov kwvtij kws kuv hlub, yog peb lub sab tsi qha rua peb has tas peb ua txhum, thaus peb moog cuag Vaajtswv, peb yeej yuav tsi ntshai.

²²Peb thov yaam twg, nwg yuav pub yaam ntawd rua peb, rua qhov peb noog nwg lug hab ua tej kws hum nwg sab.

²³Nwg qha rua peb has tas kuas peb ntseeg nwg tug Tub Yexus Khetos, hab kuas peb ib leeg hlub ib leeg, lawv le tej lug kws Yexus Khetos tub qha rua peb lawm.

²⁴Tug kws ua lawv le Vaajtswv tej lug, tug ntawd yeej nrug Vaajtswv sis raug zoo, hab Vaajtswv nrug tug ntawd sis raug zoo, rua qhov Vaaj Ntsujplig tug kws Vaajtswv pub rua peb tub qha le ntawd rua peb paub has tas Vaajtswv nrug peb sis raug zoo lawm.