Read Hmong Njua Cov Thawjtswj 11 Bible Online

Cov Thawjtswj 11 - Hmong Njua bible

Cov Thawjtswj 11

¹Yefethas yog ib tug tubrog kws sab tawv heev nyob huv xeev Nkile-as, nwg yog ib tug namndlav tug tub. Nwg txiv yog Nkile-as;

²Nkile-as tug quaspuj yug tau tub coob, hab thaus puab luj hlub tuaj lawm, puab muab Yefethas ntab tawm tsev. Puab has rua nwg tas, “Koj yuav tsi muaj feem nrug peb faib peb txiv tej qubtxeeg qubteg; rua qhov koj yog dlua ib tug nam yug.”

³Yog le ntawd, Yefethas txhaj tsiv nwg cov kwvtij moog nyob rua huv tebchaws Taunpas. Nwg moog yum tau ib paab tuabneeg lajlees, hab puab moog nrug nwg nyob ua ke.

⁴Tom qaab ntawd, muaj ib zag cov Amoos txawm moog ua rog rua cov Yixalayees.

⁵Thaus muaj tej xwm nuav tshwmsim tuaj, cov Nkile-as tej thawjcoj txhaj moog coj Yefethas huv tebchaws Taunpas rov qaab lug.

⁶Puab has rua Yefethas has tas, “Koj ca le rov lug ua peb tug thawjcoj, peb txhaj yuav tua yeej cov Amoos.”

⁷Tabsis Yefethas teb has tas, “Mej ntxub kuv heev, mej txhaj muab kuv ntab tawm huv kuv txiv tsev moog lawm. Ua caag nwgnuav mej raug kev nyuaj sab, mej tsua paub tuaj cuag kuv?”

⁸Puab teb Yefethas has tas, “Nwgnuav peb tig rov lug cuag koj, rua qhov peb xaav tau koj nrug peb moog tua cov Amoos, hab ua cov Nkile-as tug thawjcoj.”

⁹Yefethas has rua puab tas, “Yog mej coj kuv rov qaab moog tsev, moog tua cov Amoos, hab tug TSWV paab kuv tua yeej, mas kuv yuav ua tug kaav mej xwb.”

¹⁰puab teb has tas, “Peb pum zoo le ntawd ntaag. Thov tug TSWV ua timkhawv rua peb.”

¹¹Yog le ntawd, Yefethas txhaj nrug cov Nkile-as tej thawjcoj rov lug, hab cov pejxeem muab nwg tsaa ua tug saib puab hab ua puab tug thawjcoj. Yefethas qha tej kev kws nwg yuav tswjfwm suavdlawg taabmeeg tug TSWV huv lub nroog Mixepas.

¹²Yefethas txawm khaiv tuabneeg moog has rua cov Amoos tug vaajntxwv has tas, “Vim le caag koj yuav tsiv sab ua luaj rua peb? Vim le caag koj txhaj tuaj tua kuv lub tebchaws?”

¹³Cov Amoos tug vaajntxwv teb Yefethas has tas, “Thaus cov Yixalayees tsiv nraag tebchaws Iziv lug, puab txeeb taagnrho kuv tej aav kws nyob ntawm tug dlej Alenoos moog txug ndlua ntawm tug dlej Yanpaus hab ntawm tug dlej Yauladees lawm. Nwgnuav koj ca le thim tuabywv rov qaab rua kuv xwb.”

¹⁴Yefethas rov khaiv tuabneeg moog has rua cov Amoos tug vaajntxwv has tas,

¹⁵“Cov Yixalayees tsi tau lug txeeb lub tebchaws Mau-am lossis lub tebchaws Amoos, qhov ntawd tsi muaj tseeb le koj has.

¹⁶Tej xwm kws tshwmsim ntawd, yog le nuav: Thaus cov Yixalayees tsiv nraag tebchaws Iziv lug, puab hlaa taj suabpuam lug txug ntawm Havtxwv Akhanpas hab lug txug rua huv Kades.

¹⁷Ces puab txhaj khaiv tuabneeg moog thov cov Edoos tug vaajntxwv kuas pub puab taug kev huv nwg lub tebchaws lug, tabsis cov Edoos tug vaajntxwv tsi kaam puab lug. Dlua le ntawd, puab tseem thov cov Mau-am tug vaajntxwv ib yaam nkaus, tabsis nwg kuj tsi kaam le hab. Yog le ntawd cov Yixalayees txhaj lug nyob rua huv Kades.

¹⁸Ces puab txhaj lug hlaa taj suabpuam, zos kev ncig lub tebchaws Edoos hab lub tebchaws Mau-am moog txug thaus puab lug txug rua ntawm tebchaws Mau-am saab nubtuaj kws nyob ntawm tug dlej Alenoos saab tid, puab txhaj tsuam yeej nyob rua qhov ntawd, tabsis puab tsi tau hlaa tug dlej Alenoos, rua qhov yog cov Mau-am tug nrimteb.

¹⁹Cov Yixalayees tso xuv rua Xihoos kws yog cov Amaules tug vaajntxwv kws kaav lub nroog Hesenpoos has tas, thov koj tso cai rua peb taug kev huv koj lub tebchaws moog rua huv peb lub tebchaws.

²⁰Tabsis Xihoos tsi kaam cov Yixalayees taug kev huv nwg lub tebchaws moog. Nwg txhaj txhij taagnrho nwg cov tubrog moog tsuam yeej rua huv Yahaxes hab tua cov Yixalayees.

²¹Tabsis tug TSWV kws yog cov Yixalayees tug Vaajtswv tau paab cov Yixalayees tua yeej Xihoos hab nwg cov tubrog. Ces cov Yixalayees txhaj txeeb tau taagnrho lub tebchaws kws cov Amaules nyob ntawd.

²²Puab kaav taagnrho cov Amaules lub tebchaws txij ndlua ntawm tug dlej Alenoos saab qaabteb moog txug ndlua ntawm tug dlej Yanpaus saab qaumteb, hab txij ndlua ntawm taj suabpuam saab nubtuaj moog txug ndlua ntawm tug dlej Yauladees saab nubpoob.

²³Tub yog tug TSWV kws yog cov Yixalayees tug Vaajtswv muab cov Amaules ntab tawm hab ca rua nwg tsaav tuabneeg Yixalayees lug nyob.

²⁴Koj tseem xaav txeeb lub tebchaws nuav rov qaab hab los? Koj ca le kaav tej kws koj tug vaajtswv Khemaus muab rua koj lawm xwb. Tabsis Peb yuav kaav tej kws tug TSWV kws yog peb tug Vaajtswv muab pub rua peb lawm.

²⁵Koj xaav has tas, koj tseem txawj ntaus rog tshaaj cov Mau-am tug Vaajntxwv Xipulas tug tub Npalaj hab nua los? Nwg yeej ibtxwm tsi tau nrug cov Yixalayees sis caav dlua le los? Nwg yeej ibtxwm tsi tau nrug peb ua rog le los?

²⁶Cov Yixalayees tub kaav lub nroog Hesenpoos hab Alu-es hab tej zog miv kws nyob ibncig ob lub nroog nuav, hab taagnrho tej nroog kws nyob lawv tug ntug dlej Alenoos tau peb puas xyoo lawm, yog le caag koj tsi txeeb rov qaab thaus lub sijhawm ntawd?

²⁷Kuv tsi tau ua txhum rua koj qhov twg le, tsuas yog koj txhaj ua txhum rua kuv kws yog tuaj tua kuv lub tebchaws. Tug TSWV yog tug txav txim. Nub nua nwg yuav txav txim rua cov Yixalayees hab rua cov Amoos.”

²⁸Tabsis cov Amoos tug vaajntxwv tsi quavntsej Yefethas tej lug ntawd le.

²⁹Ces tug TSWV tug ntsujplig txawm lug kaav hlo Yefethas, nwg txhaj moog ncig thoob plawg Nkile-as hab Manaxes rov lug rua huv Mixepas, huv xeev Nkile-as, hab moog rua ntawm cov Amoos.

³⁰Yefethas coglug rua tug TSWV le nuav has tas: “Yog koj pub kuv tua yeej cov Amoos,

³¹thaus kuv ntaus yeej rog rov qaab lug, yog leejtwg xub tawm huv kuv lub tsev tuaj tog kuv, mas kuv yuav muab tug ntawd tua hlawv fij rua koj.”

³²Yog le ntawd, Yefethas txhaj hlaa dlej moog tua cov Amoos, hab tug TSWV tau paab nwg tua yeej lawm tag.

³³Nwg pib tua cov Amoos ntawm Alu-es moog txug ndlua ntawm cheebtsaam kws nyob puagncig lub nroog Meenithas, taagnrho muaj neeg nkaum lub nroog, hab moog txug ndlua ntawm Anpees Kelamees. Cov Amoos raug tua tuag coob kawg nkaus le, hab ua rua cov Amoos swb cov Yixalayees lawm.

³⁴Thaus Yefethas rov qaab lug txug tsev huv Mixepas, nwg tug ntxhais txawm npuaj nruag dlha seev cev tawm tuaj tog nwg. Yefethas muaj tuab tug ntxhais ntawd xwb.

³⁵Thaus Yefethas pum dlheev nwg tug ntxhais, Yefethas dlua Yefethas lub tsho hab has tas, “Kuv tug mivntxhais! Koj ua rua kuv nyuaj sab kawg nkaus le! Vim le caag koj ua rua kuv mob sab taag npaum le nuav? Kuv tau coglug ruaj heev rua tug TSWV lawm, kuv yuav thim tsi tau kuv tej lug ntawd le!”

³⁶Yefethas tug ntxhais has rua Yefethas has tas, “Yog koj tau coglug rua tug TSWV lawm tag, koj ca le ua rua kuv lawv le koj tau coglug tseg, rua qhov tug TSWV tub ua pauj rua koj cov yeebncuab kws yog cov Amoos lawm.”

³⁷Tabsis nwg thov nwg txiv has tas, “Thov koj ca kuv ua le nuav. Thov ca kuv nyob ywj sab ob lub hlis, kuas kuv tau nrug kuv tej phoojywg moog ncig ua si sau tej roob, hab quaj nyav qhov kws kuv yuav tuag thaus kuv tseem yog nkaujxwb.”

³⁸Yefethas txhaj ca nwg moog ua si tau ob lub hlis. Nwg hab nwg tej phoojywg nce moog rua peg tej ncov roob hab moog quaj nyav qhov kws nwg yuav tuag thaus nwg tsi tau yuav quasyawg hab tsi tau muaj mivnyuas.

³⁹Tom qaab ob lub hlis lawm, nwg rov lug cuag nwg txiv. Ces Yefethas txawm ua lawv le nwg tau coglug rua tug TSWV lawm, nwg tug ntxhais txhaj tuag thaus tseem yog nkaujxwb. Qhov nuav txhaj chiv ua ib txujkev quaj rua cov Yixalayees,

⁴⁰mas txhua lub xyoo, cov Yixalayees tej quaspuj txhaj muab plaub nub moog quaj nyav Yefethas tug ntxhais kws yog tuabneeg Nkile-as.