Read Hmong Njua Cov Thawjtswj 15 Bible Online

Cov Thawjtswj 15 - Hmong Njua bible

Cov Thawjtswj 15

¹Tom qaab ntawd Xaaxoos rov moog saib nwg tug quaspuj thaus lub caij kws taabtom hlais nplej, nwg caab ib tug thaav tshis hab moog saib nwg tug quaspuj. Nwg taij nwg yawmtxiv has tas, “Kuv xaav moog huv kuv tug quaspuj lub txaaj.” Tabsis yawmtxiv tsi pub Xaaxoos moog huv le.

²Nwg has rua Xaaxoos has tas, “Kuv saib zoo le koj ntxub nwg heev, yog le ntawd kuv txhaj muab nwg txis rua koj tug phijlaaj yuav lawm. Tabsis nwg tug nam hluas tseem zoo nkauj tshaaj nwg hab, koj ca le yuav nwg tug nam hluas.”

³Xaaxoos teb has tas, “Zag nuav kuv ua phem rua cov Filitees los kuv yuav tsi txhum dlaabtsi le lawm!”

⁴Yog le ntawd nwg txhaj moog nteg tau peb puas tug maa caab lug, hab muab cov maa ntawd cov kutwv khi, ob tug ua ib ke, hab ib nkawm maa twg nwg muab ib teg tsau khi rua.

⁵Ces nwg tis tawg rua cov tsau, hab tso cov maa ntawd dlha moog rua huv cov Filitees tej teb npleg. Nwg ua le nuav tsi yog suavtawg kub tej nplej kws tub hlais tau lawm xwb, tabsis tseem kub tej nplej kws tsi tau hlais huv tej teb, hab tej vaaj txiv ntoo roj taag huv tuabsi lawm hab.

⁶Cov Filitees sis nug zum zawg has tas, “Leejtwg yog tug ua le nuav?” Txawm muaj tuabneeg qha rua puab has tas, “Xaaxoos yog tug ua, rua qhov nwg yawmtxiv kws nyob huv lub nroog Teenas muab Xaaxoos tug quaspuj qua rua Xaaxoos tug phijlaaj yuav lawm.” Yog le ntawd, cov Filitees txhaj moog muab tug quaspuj ntawd hab nwg txiv hlawv kub nyab taag huv tuabsi.

⁷Xaaxoos has rua puab tas, “Tub yog vim mej ua le nuav ntaag! Kuv coglug tseg has tas, kuv yuav tsi tso mej tseg moog txug thaus kws kuv ua pauj rua mej taag lawm tsaiv!”

⁸Xaaxoos ntaus hab tua puab tuag coob kawg le. Ces nwg txawm tsiv moog nkaum rua huv lub qhov tsua nraag lub pobtsuas Etaas lawm.

⁹Cov Filitees tuaj tsuam yeej nyob huv xeev Yudas, hab tuaj tua lub nroog Lehis.

¹⁰Cov Yudas nug puab has tas, “Vim le caag mej txhaj tuaj tua peb?” Puab teb has tas, “Peb tuaj nteg Xaaxoos moog kaw, peb yuav ua rua nwg ib yaam le nwg tau ua rua peb lawm.”

¹¹Yog le ntawd, cov Yudas peb txheeb leej txhaj moog rua huv lub qhov tsua nraag lub pobtsuas Etaas hab has rua Xaaxoos has tas, “Koj tsi paub has tas, cov Filitees yog cov kws ua num ua tswv kaav peb nua los? Ua caag koj tseem ua le nuav rua peb hab?” Nwg teb has tas, “Kuv ua rua puab ib yaam le puab tau ua rua kuv lawm xwb.”

¹²Puab has rua Xaaxoos has tas, “Peb tuaj ntawm nuav yog tuaj nteg koj khi coj moog cob rua cov Filitees.” Xaaxoos teb puab has tas, “Mej puas coglug rua kuv has tas, mej yuav tsi tua kuv povtseg le?”

¹³Puab teb has tas, “Peb tsuas tuaj khi koj hab coj koj moog cob rua puab xwb, peb tsi tua koj le.” Yog le ntawd, puab txhaj muab tau ob txuj hlua tshab lug khi Xaaxoos hab coj nwg tawm huv qhov tsua lug.

¹⁴Thaus nwg lug txug huv lub nroog Lehis, cov Filitees dlha nroo ntwg tuaj ntsauv nwg, hab qw ntshu nrooj rua nwg. Taamsim ntawd tug TSWV tug ntsujplig ua rua nwg muaj zug heev, hab nwg ntag ua rua ob txuj hlua kws khi nwg ob txhais npaab hab ob txhais teg tu taag ib yaam le hlawv tej xuv.

¹⁵Nwg txawm pum ib tug pobtxhaa puabtsaig neeg luav kws tseem tshab khiv, nwg khaws nkaus lug ntaus cov txivneej ntawd tuag lawm ib txheeb leej.

¹⁶Yog le ntawd Xaaxoos txhaj hu ib zaaj nkauj has tas, “Kuv muab tug pobtxhaa puabtsaig neeg luav nuav ntaus tuag ib txheeb leej txivneej; vim tug pobtxhaa puabtsaig neeg luav nuav, kuv txhaj muab puab pov ua tsheej pawg.”

¹⁷Dlhau ntawd, nwg txawm muab tug pobtxhaa puabtsaig povtseg lawm. Tub yog muaj tej nuav tshwmsim puab txhaj tis npe rua qhov chaw ntawd hu ua Lamas Lehis.

¹⁸Xaaxoos nqhes dlej heev, nwg txhaj thov tug TSWV has tas, “Koj tau pub rua kuv muaj yeej luj kawg nkaus; kuv nqhes dlej heev kuv yuav tuag, hab koj yuav ca cov Filitees kws tsi ntseeg koj nteg tau kuv los?”

¹⁹Vaajtswv txhaj qheb hlo ib lub qhov aav khoob lug huv lub nroog Lehis hab dlej txhawv huv lub qhov ntawd tuaj. Xaaxoos haus cov dlej ntawd, ua rua nwg rov muaj zug tuaj. Luas txhaj tis npe rua lub qhovdlej ntawd hu ua Hakaules. Naj nub nua lub qhovdlej ntawd tseem nyob huv lub nroog Lehis.

²⁰Lub sijhawm kws cov Filitees kaav lub tebchaws ntawd, Xaaxoos ua tug coj cov Yixalayees tau neeg nkaum xyoo nkaus.