Read Hmong Njua Cov Thawjtswj 18 Bible Online

Cov Thawjtswj 18 - Hmong Njua bible

Cov Thawjtswj 18

¹Thaus lub sijhawm ntawd, cov Yixalayees tsi tau muaj vaajntxwv. Thaus ntawd xeem Daas tseem pheej moog nrhav chaw rua puab nyob, rua qhov puab tsi tau muaj ib thaaj aav twg huv tsaav tuabneeg Yixalayees rua puab nyob ua puab tug le.

²Yog le ntawd, cov Daas txhaj xaiv tau tsib tug txivneej kws sab tawv heev sawv cev ntawm txhua tsev tuabneeg huv xeem Daas hab tso puab tawm huv lub nroog Xaulas hab Eta-aus moog ncig hab soj lub tebchaws. Thaus puab tuaj txug rua ntawm lub laaj roob Efalayees, puab moog su huv Mikhas tsev.

³Thaus puab moog su tau ntev loo rua huv lawm, puab ncu tau tug tub hluas Levis lub suab has lug, ces puab txawm moog cuag nwg hab nug has tas, “Koj tuaj ua dlaabtsi ntawm nuav? Leejtwg coj koj tuaj?”

⁴Nwg teb has tas, “Mikhas khaiv kuv ua ntau yaam, nwg ndlav kuv ua nwg ib tug povthawj.”

⁵Puab has rua nwg tas, “Thov koj paab thov Vaajtswv saib txujkev kws peb moog ntawd puas yuav muaj kev vaammeej rua peb?”

⁶Tug povthawj teb has tas, “Mej tsi xob nyuaj sab txug ib yaam dlaabtsi le, tug TSWV yuav tsomkwm mej thaus mej taabtom taug kev moog.”

⁷Yog le ntawd, tsib tug txivneej ntawd txhaj sawv kev moog rua huv lub nroog La-isas lawm. Puab moog pum cov tuabneeg huv muaj zoo vaaj zoo tsev nyob kaaj sab lug ib yaam le cov tuabneeg Xidaunias. Puab nyob thaajyeeb lug, puab cov tuabneeg nyob ntsag tu, tsi muaj kev sis caav sis tshe nrug leejtwg; puab muaj txhua yaam kws puab xaav tau. Puab nyob dleb heev ntawm lub nroog Xidaunias, hab puab yeej tsi cog phoojywg nrug leejtwg le.

⁸Thaus tsib tug txivneej ntawd rov lug txug rua huv lub nroog Xaulas hab Eta-aus, puab cov kwvtij tuaj nug puab zum zawg has tas, “Mej puas pum dlaabtsi coj lug pav qha rua peb?”

⁹Puab teb has tas, “Mej ca le tuaj, peb yuav moog tua lub nroog La-isas. Peb moog pum tej aav hab lub nroog ntawd zoo kawg nkaus le. Tsi xob ua ib yaam dlaabtsi nyob ntawm nuav le lawm. Maaj ceev nrooj! Ca le moog hab txeeb kuas tau taagnrho lub nroog ntawd.

¹⁰Thaus mej moog txug ntawd lawm, mej yuav ntsib cov tuabneeg kws nyob tsi ntshai dlaabtsi. Lub tebchaws ntawd luj heev; nyob huv lub tebchaws ntawd muaj txhua yaam kws tuabneeg xaav yuav xaav tau. Vaajtswv tub muab lub tebchaws ntawd cob rua mej lawm.”

¹¹Yog le ntawd, xeem Daas txhaj txhij tau rau pua leej tubrog hab npaaj cuabyeej ua rog tawm huv lub nroog Xaulas hab Eta-aus moog txeeb lub tebchaws ntawd.

¹²Puab moog tsuam yeej rua ntawm lub nroog Kili-as Ye-alees saab nubpoob huv xeev Yudas. Tub yog vim le ntawd txhaj tseem muab qhov chaw ntawd hu ua Daas lub Yeej lug txug naj nub nua.

¹³Puab txhaj sawv kev qhov ntawd moog txug rua ntawm Mikhas lub tsev peg lub laaj roob Efalayees.

¹⁴Ces tsib tug txivneej kws puab tub xub moog soj lub tebchaws hab ncig saib lub nroog La-isas lawm, txhaj has rua puab cov kwvtij tas, “Mej puas paub huv lub tsev nuav muaj ob tug mlom nyaj, ib tug yog txaug hab ib tug yog nchuav? Nyob rua huv tseem muaj lwm yaam mlom hab muaj ib tug mlom efaus. Mej sim xaav saib peb yuav ua le caag?”

¹⁵Yog le ntawd, puab txhaj moog rua huv Mikhas tsev, yog lub tsev kws tug tub hluas Levis nyob, hab nug tug hluas Levis saib nwg puas noj qaab nyob zoo.

¹⁶Thaus lub sijhawm ntawd, cov Daas rau pua leej tubrog kws npaaj rawv cuabyeej sis tua, tub sawv nreg nroog ntawm roojvaag tog lawm.

¹⁷Ces tsib tug kws moog soj lub tebchaws ntawd, ca le ncaaj nraim moog rua huv tsev hab muab kag tug mlom ntoo kws vuam nyaj, tej mlom huv tsev, hab tug mlom efaus nqaa tawm lug, thaus kws tug povthawj tseem nrug rau pua leej txivneej kws nqaa rawv cuabyeej ua rog sawv ntawm roojvaag.

¹⁸Thaus cov txivneej moog huv Mikhas tsev hab muab tug mlom txaug kws vuam nyaj, tug efaus, Mikhas tsev tuabneeg tej mlom hab tug mlom nchuav nqaa lug, ces tug povthawj nug puab has tas, “Mej ua dlaabtsi le ko?”

¹⁹Puab has rua nwg tas, “Ua tuabywv tsi xob has lug! Koj ca le nrug peb moog ua peb tug povthawj hab ua peb txiv. Koj ua povthawj rua ib tsev nyuas tuabneeg tseem zoo dlua le koj ua rua cov Yixalayees ib xeem hab los?”

²⁰Qhov nuav ua rua tug povthawj ntawd zoo sab heev. Yog le ntawd, nwg txhaj nqaa taagnrho cov mlom nrug puab moog lawm.

²¹Puab tso puab tej mivnyuas, tej tsaj txhu hab txhua yaam moog ua puab ntej.

²²Puab taug kev ntawm Mikhas tsev moog tau ntev loo, Mikhas maam le hu nwg tej kwvtij zej zog moog caum puab qaab. Puab moog caum cuag cov Daas,

²³hab puab qw ntsoog qeeg rua cov Daas. Cov Daas tig hlo lug nug Mikhas has tas, “Peb ua txhum koj dlaabtsi, koj yuav coj tuabneeg coob ua luaj tuaj caum peb?”

²⁴Mikhas teb has tas, “Mej tub coj kuv tug povthawj hab nyag tej mlom kws kuv ua taag lug lawm los sav! Tshuav dlaabtsi txhaj tseem yog kuv le? ua le caag mej tseem muaj cai nug kuv has tas, ‘Peb ua txhum koj dlaabtsi, koj yuav coj tuabneeg coob ua luaj tuaj caum peb?’ ”

²⁵Cov Daas has rua Mikhas has tas, “Zoo dlua le koj tsi xob has ib lu lug ua rua peb chim, nyob tsaam cov tuabneeg nuav tig lug tua koj. Ces koj hab koj tsev tuabneeg yuav tuag taag.”

²⁶Ces cov Daas txawm moog lawm. Mikhas pum puab yeej muaj zug tshaaj nwg, nwg txhaj ua ib sab rov lug tsev lawm.

²⁷Puab coj txhua yaam kws Mikhas ua, hab nwg tug povthawj nrug puab moog tua cov tuabneeg kws nyob thaajyeeb lug hab tsi ntshai dlaabtsi huv lub nroog La-isas. Puab muab ntaaj tua cov tuabneeg tuag taag hab muab tej vaaj tse hlawv huv tuabsi povtseg.

²⁸Tsi muaj leejtwg tuaj paab puab, vim puab nyob nrug dleb ntawm lub nroog Xidoos, hab puab tsi nrug leejtwg cog phoojywg le. Lub nroog La-isas nyob huv lub haav kws ze lub nroog Npelehaus.

²⁹Puab txhaj muab lub nroog La-isas hloov dlua npe hu ua Daas, lawv le puab yawmkoob Daas kws yog Yakhauj tug tub lub npe.

³⁰Cov Daas muab tug mlom ntawd moog teeb rua puab pe, puab tsaa Nkesoos tug tub Yaunathaas kws yog Mauxes tug xeebntxwv ua tug povthawj, hab Yaunathaas cov xeebntxwv puavleej tau ua puab cov povthawj moog txug thaus kws puab raug luas nteg coj moog lawm.

³¹Cov Daas tug mlom kws Mikhas ua ntawd, txij thaus lub Tsevntaub kws yog qhov chaw pehawm Vaajtswv tseem nyob huv lub nroog Silaus.