Read Hmong Njua Cov Thawjtswj 5 Bible Online

Cov Thawjtswj 5 - Hmong Njua bible

Cov Thawjtswj 5

¹Nub ntawd Denpaulas hab Npalaj kws yog Anpinau-as tug tub txhaj hu zaaj nkauj nuav:

²Ua tug TSWV tsaug lauj! Cov Yixalayees ua sab tawv qhawv sis tua; Cov pejxeem txaus sab hlo moog ntaus rog;

³Tej vaajntxwv, mej ca le ua tuab zoo noog! Tej numtswv, mej ca le tig qhovntsej noog! Kuv yuav hu nkauj hab ntaus nkauj nogncaas qhuas cov Yixalayees tug Vaajtswv kws yog tug TSWV.

⁴Tug TSWV, thaus koj tawm sau Roob Xe-iles lug, thaus koj tawm tom taj nraag Edoos lug, lub nplajteb ua zug koog, hab naag laub lug sau nruab ntug lug. Tseeb tag, dlej yeej nchuav laub lug sau cov fuab lug;

⁵Tej ncov roob ua zug koog taabmeeg tug TSWV sau Roob Xinais, taabmeeg tug TSWV kws yog cov Yixalayees tug Vaajtswv.

⁶Anaj tug tub Sankas tam hab Ya-ees tam, tsi muaj tsheb neeg dlha thoob tebchaws lawm, Tej tuabneeg taug kev miv lawm xwb.

⁷Denpaulas, cov Yixalayees tej nroog muab tso tseg nphob xuav ca; Tej nroog ntawd nyob khoob lug moog txug nub kws koj lug kaav; koj zoo ib yaam le cov Yixalayees leej nam ntaag.

⁸Thaus cov Yixalayees moog teev luas tej vaajtswv, ces txawm muaj kev tsuv kev rog tuaj ntaus puab lub tebchaws! Mej plaub caug txheeb leej Yixalayees nuav, puas muaj ib tug nqaa dlaim thaiv nav ntaaj lossis nqaa muv?

⁹Kuv lub sab yeej nyob rawv nrug cov Yixalayees tej thawj tubrog, nrug cov tuabneeg kws txaus sab moog ntaus rog. Ua tug TSWV tsaug lauj!

¹⁰Mej cov kws caij tej neeg luav dlawb kws caij rawv sau lub eeb, hab mej cov kws moog kutaw, mej ncu ntsoov qha zaaj nuav rua suavdlawg!

¹¹Ua tuab zoo noog! Tej suab kws cov tuabneeg coob coob qw nrov ntshu nrooj ncig tej qhov tshij sis qha txug qhov kws tug TSWV hab cov Yixalayees muaj yeej. Ces tug TSWV tsaav tuabneeg tawm huv puab tej nroog tuaj.

¹²Ntaus thawj los mas! Denpaulas, ca le ntaus thawj los mas! Hu nkauj los mas! ntaus thawj ntxhas los mas! Anpinau-as tug tub Npalaj, ca le sawv moog tuaj tom hauv ntej, coj cov tuabneeg kws koj nteg tau tsiv moog los mas!

¹³Ces txhua tug tuabneeg kws ncaaj nceeg tuaj cuag puab tej thawjcoj; Tug TSWV tsaav tuabneeg kws tuaj cuag nwg; npaaj nrooj moog sis tua xwb.

¹⁴Puab nqeg peg xeev Efalayees tuaj rua huv haav, lawv xeem Npeenyamees hab cov pejxeem qaab. Cov thawj tubrog tuaj peg Makhis tuaj, cov numtswv tuaj peg xeev Xenpuloos tuaj.

¹⁵Xeem Ixakhas tej thawjcoj nrug Denpaulas tuaj; Yog lawm, Ixakhas hab Npalaj puab suavdlawg tuaj huv tuabsi; hab puab puavleej lawv nwg qaab moog rua nraag lub haav lawm. Tabsis xeem Lunpees has tsi sis hum, puab txhaj tsi tuaj.

¹⁶Vim le caag puab txhaj nrug paab yaaj nyob tuaj tom qaab? Yuav nkaum nkoog noog cov tswv yaaj lub suab cuab cov yaaj xwb los? Yog lawm, xeem Lunpees has tsi sis hum, puab txhaj tsi tuaj.

¹⁷Xeem Khas nyob tim tug Dlej Yauladees saab nubtuaj, hab xeem Daas nyob huv tej nkoj. Xeem Aseles nyob lawv ntug havtxwv, puab nyob ntawm ntug xwb.

¹⁸Tabsis xeem Xenpuloos hab xeem Nathalis txaus sab muab puab txujsa moog ntaus rog.

¹⁹Tej vaajntxwv sau nthwv tuaj sis tua rua huv lub nroog Tanas ntawm tug dlej Menkidaus; Cov Kana-aas tej vaajntxwv tuaj sis tua, tabsis puab nqaa tsi tau tej nyaj moog le.

²⁰Tej nubqub tua sau nruab ntug tuaj; Tej nubqub yaa sau nruab ntug tuaj tua Xixelas;

²¹Tug Dlej Kisoos fuam lug tshoob puab moog povtseg lawm, tug Dlej Kisoos yog tug dlej kws ntsawj ceev heev. Kuv yuav tawm moog, kuv lub sab ca le xyivfaab hlo.

²²Ces cov neeg yuav dlha raag ntwg lug, muab puab tej rau txauj aav nplawg nta.

²³Tug TSWV tug timtswv has tas, “Ca le foom tsi zoo rua lub nroog Melus! Lu lug foom kws yog kev ab kev dlaw yuav raug cov tuabneeg huv lub nroog ntawd. Vim puab tsi tawm moog ua tubrog paab tug TSWV tua cov yeebncuab.”

²⁴Ya-ees yog tug kws muaj moo tshaaj plawg tej quaspuj, nwg yog Henpeles kws yog tuabneeg Kenais tug quaspuj, nwg muaj moo tshaaj tej quaspuj kws nyob huv tej tsevntaub huv tuabsi.

²⁵Xixelas thov dlej haus, tabsis nwg muab mig nyuj rua Xixelas haus; Nwg laub mig nyuj rua huv lub taig kws zoo nkauj heev rua Xixelas haus.

²⁶Ya-ees ib saab teg nqaa tug tswg tsevntaub, hab ib saab teg nqaa raab rauj. Nwg ntaus hab tsoo Xixelas txhaa taubhau tawg kag; nwg npuj kag Xixelas taubhau tshaab plawg.

²⁷Xixelas ca le zuav zog txhus caug ndlua qaug ntawg rua ntawm Ya-ees kutaw, tuag xyaab leeg ca.

²⁸Xixelas nam tuaj tom qaab dlaim ntxaij ntawm qhovrais saib; saib ntsoov rua tim ncauj kev; nwg txhaj nug has tas, “Vim le caag tub lig heev lawm, tsi pum Xixelas lub tsheb neeg lug le ne? Vim le caag nwg tug neeg rov lug qeeb ua luaj le?”

²⁹Nwg ib tsoom quaspuj kws ntse heev teb nwg, hab nwg pheej has tujtawg tas,

³⁰“Puab tseem tsi tau pum tej kws moog fuab tau hab muab sis faib, puab muab tej hluas nkauj faib rua cov tubrog ib leeg ib tug lossis ob tug, puab muab tej ntaub kws kws kim kim faib rua Xixelas, hab muab tej ntaub kws txaij nraug zeeg lug rua puj vaajntxwv khab cejdlaab.”

³¹Tug TSWV, thov kuas cov yeebncuab tuag taag ib yaam le ntawd ntaag; tabsis thov kuas koj cov phoojywg ci ntsaa ab ib yaam le thaus lub nub nyavnyuas tawm tuaj!