Read Hmong Njua Tshwmsim 15 Bible Online

Tshwmsim 15 - Hmong Njua bible

Tshwmsim 15

¹Tom qaab ntawd kuv pum dlua ib yaam txujci tseemceeb tshwm sau nruab ntug ua rua kuv xaav tsi thoob le. Kuv pum xyaa tug timtswv ceebtsheej nqaa xyaa yaam sub tawg sub ntshaa kws yog Vaajtswv txujkev txav txim zag kawg.

²Kuv pum ib yaam zoo le havtxwv kws ci le av kws muaj nplaim tawg xyaw. Hab kuv pum cov tuabneeg kws tawmtsaam yeej tug tsaj hab tug mlom kws muaj yaam ntxwv zoo le tug tsaj ntawd, hab kovyeej tug kws muaj cov lej xaamphaaj. Cov tuabneeg ntawd sawv ntawm ntug havtxwv kws ci le av, puab ib leeg nqaa ib lub nkauj nogncaas kws yog Vaajtswv muab rua puab,

³puab hu Mauxes tug kws yog Vaajtswv tug tubkhai zaaj nkauj, hab tug Mivnyuas Yaaj zaaj nkauj has tas: “Tug Tswv kws yog Vaajtswv, koj yog tug kws muaj fwjchim luj kawg nkaus, tej num kws koj ua puavleej tseemceeb hab zoo tshaaj plawg; Koj yog tug Vaajntxwv kws kaav taagnrho txhua lub tebchaws huv tuabsi. Tej kws koj ua, koj ua ncaaj ua nceeg hab lawv le qhov tseeb!

⁴Tug Tswv, puas muaj leejtwg kws tsi ntshai koj? Puas muaj leejtwg kws tsi fwm koj? Rua qhov koj tuab leeg txhaj yog tug kws dlawbhuv. Txhua tsaav tuabneeg yuav tuaj cuag koj hab pehawm koj; rua qhov suavdlawg pum has tas, koj ua koj teg num ncaaj nceeg.”

⁵Tom qaab ntawd kuv pum lub tuamtsev sau ntuj ceebtsheej lub qhovrooj qheb hlo, kuv pum lub Tsevntaub kws luas muab Vaajtswv Txujlug timkhawv tso rua huv.

⁶Ces xyaa tug timtswv kws nqaa xyaa yaam sub tawg sub ntshaa tawm huv lub tuamtsev tuaj rua saab nrau, puab ib leeg naav ib cev rig tsho ntaub maag dlawb dlawb hab ib leeg sa ib txuj hlaab kub sau qhovtsus.

⁷Plaub tug qhelunpees kws sawv vij Vaajtswv lub zwmtxwv, muaj ib tug txawm muab xyaa lub taig kub cev rua xyaa tug timtswv ntawd. Xyaa lub taig kub ntawm ntim puv nkaus Vaajtswv tug kws muaj sa nyob txujkev txav txim.

⁸Vaajtswv tug tshwjchim kws ci ntsaa ab hab Vaajtswv lub fwjchim nchu paa lug ib yaam le paa tawg puv nkaus huv lub tuamtsev. Thaus xyaa yaam sub tawg sub ntshaa kws xyaa tug timtswv ntawd nqaa lug tseem tsi tau dlua taag, tsi muaj leejtwg yuav moog tau rua huv lub tuamtsev le.