Read Hmong Njua Tshwmsim 17 Bible Online

Tshwmsim 17 - Hmong Njua bible

Tshwmsim 17

¹Tom qaab ntawd xyaa tug timtswv ceebtsheej kws nqaa xyaa lub taig, muaj ib tug txawm lug has rua kuv has tas, “Koj ca le nrug kuv moog, kuv yuav coj koj moog saib tug namndlav kws phem kawg nkaus, saib nwg yuav raug txim le caag. Tug namndlav ntawd yog lub nroog luj kws ua rua ntawm ob peb ceg dlej sis tshuam.

²Tej vaajntxwv kws nyob huv nplajteb nuav puavleej nrug tug namndlav kws phem kawg nkaus ntawd sis ntxag. Hab tej tuabneeg nplajteb tub haus tej cawv txiv maab kws yog tug quaspuj ntawd tej kev phem kev qas qaug lawm.”

³Vaaj Ntsujplig txawm lug kaav taagnrho kuv lub sab, ces tug timtswv ceebtsheej ntawd txawm coj kuv moog rua tom taj suabpuam. Thaus kuv moog txug tod, kuv pum ib tug quaspuj caij ib tug tsaj lab ploog; tug tsaj ntawd muaj ntau lub npe phem phem sau thoob plawg nwg lub cev. Nwg muaj xyaa lub taubhau hab kaum tug kub.

⁴Tug quaspuj ntawd naav ib cev tsoog tsho tsaamxem hab lab ploog. Nwg coj saw kub, coj tej qai zeb ci ci kws muaj nqes hab coj tej hlaws thoob plawg ib ce. Nwg txhais teg tuav rawv ib lub taig kub kws ntim puv nkaus tej kev phem kev qas kws nwg tau ua taag lug lawm.

⁵Muaj ib lub npe sau rua ntawd tug quaspuj ntawd lub hauvplaj kws tsi muaj tuabneeg paub lub ntsab lug, lub npe ntawd sau has tas, “Lub nroog Npanpiloos kws luj dlua ndlais, koj yog cov namndlav hab tej tuabneeg nplajteb kws ua phem ua qas leej nam.”

⁶Hab kuv pum tug quaspuj ntawd tub haus Vaajtswv cov tuabneeg cov ntshaav hab cov tuabneeg kws raug luas tua cov ntshaav qaug lawm, cov tuabneeg ntawd yog cov kws muab sab npuab Yexus. Thaus kuv pum tug quaspuj ntawd ua rua kuv xaav tsi thoob le.

⁷Tug timtswv ntawd nug kuv has tas, “Ua le caag koj txhaj xaav tsi thoob? Kuv yuav qha tug quaspuj ntawd hab tug tsaj kws muaj xyaa lub taubhau hab kaum tug kub kws tug quaspuj ntawd caij lub ntsab rua koj paub.

⁸Tug tsaj ntawd yaav taag lug nwg muaj sa nyob, tabsis nwgnuav nwg tub tsi muaj sa lawm; nwg yuav tawm huv lub qhov tub tub lug, hab nwg yuav moog raug kev puamtsuaj. Tej tuabneeg nplajteb kws tsi muaj npe sau thaus tsi tau tsim ntuj tsim teb rua huv phoo ntawv kws sau cov tuabneeg muaj txujsa nyob moog ibtxhis lawm tej npe, thaus puab pum tug tsaj ntawd, puab yuav xaav tsi thoob le, rua qhov yaav taag lug tug tsaj ntawd muaj sa, tabsis nwgnuav tsi muaj lawm, hab nwg tseem yuav rov tshwm lug.

⁹“Tug kws muaj tswvyim, nwg yeej yuav totaub zaaj nuav. Tug tsaj ntawd xyaa lub taubhau yog xyaa lub pov roob kws tug quaspuj ntawd nyob, hab xyaa lub pov roob ntawd yog xyaa tug vaajntxwv:

¹⁰Muaj tsib tug vaajntxwv tub poob fwjchim lawm, tshuav ib tug tseem kaav tebchaws, hab muaj ib tug tseem tsi tau lug kaav tebchaws; thaus nwg lug, nwg yuav kaav tebchaws ib ntus xwb.

¹¹Tug tsaj kws yaav taag lug muaj sa, tabsis nwgnuav tsi muaj sa lawm, nwg yog ib tug vaajntxwv kws yog tug yim kws nrug xyaa tug vaajntxwv ntawd ua ib paab, hab nwg yuav moog raug kev puamtsuaj.

¹²“Kaum tug kub kws koj pum ntawd yog kaum tug vaajntxwv kws tseem tsi tau lug ua vaajntxwv, tabsis puab yuav muaj fwjchim ib yaam le vaajntxwv, puab yuav nrug tug tsaj ntawd kaav tebchaws ib txoog teev xwb.

¹³Kaum tug vaajntxwv ntawd puavleej koom ib lub sab, hab puab muab tej fwjchim kws puab muaj tso rua tug tsaj ntawd.

¹⁴Puab yuav tawmtsaam tug Mivnyuas Yaaj, tabsis tug Mivnyuas Yaaj hab cov tuabneeg ncaaj nceeg kws tug Mivnyuas yaaj xaiv lug ua nwg cov thwjtim lawm, yuav tawmtsaam yeej cov vaajntxwv ntawd, rua qhov tug Mivnyuas Yaaj yog tug Tswv ntawm txhua tug tswv hab yog tug Vaajntxwv ntawm txhua tug vaajntxwv.”

¹⁵Tug timtswv ceebtsheej rov has rua kuv has tas, “Ob peb ceg dlej kws koj pum tug namndlav ntawd nyob rawv sau, yog pev txug txhua paab tuabneeg, txhua xeem tuabneeg, hab txhua tsaav tuabneeg tsi has cov kws has yaam lug twg huv tuabsi.

¹⁶Kaum tug kub hab tug tsaj kws koj pum puavleej yuav ntxub tug namndlav ntawd. Puab yuav txeeb txhua yaam kws nwg muaj huv tuabsi moog, hab ca nwg nyob labqaab; puab yuav noj nwg cev nqaj hab muab suavtawg hlawv nwg povtseg.

¹⁷Rua qhov Vaajtswv tshoov puab lub sab kuas puab xaav ua lawv le Vaajtswv lub sab nyam. Puab koom ua ib lub sab muab tug tsaj ntawd tsaa ua tug kws kaav puab moog txug thaus muaj tav lawv le tej kws Vaajtswv tau has tseg lawm.

¹⁸“Tug namndlav kws koj pum ntawd yog lub nroog luj dlua ndlais kws kaav taagnrho tej vaajntxwv kws nyob huv nplajteb nuav.”