Read Hmong Njua Tshwmsim 19 Bible Online

Tshwmsim 19 - Hmong Njua bible

Tshwmsim 19

¹Tom qaab ntawd kuv nov ib lub suab nrov ib yaam le ib paab tuabneeg coob coob nyob sau ntuj lub suab has zum zawg has tas, “Ca le qhuas Vaajtswv! Qhuas nwg txujkev cawm dlim, nwg muaj tshwjchim ci ntsaa ab hab muaj fwjchim!

²Vaajtswv txav txim ncaaj nceeg hab nwg ua lawv le qhov tseeb! Vaajtswv rau txim rua tug namndlav kws dlaag ntxag tuabneeg nplajteb ua phem ua qas. Vaajtswv rau txim rua nwg, rua qhov nwg muab Vaajtswv cov tubkhai tua povtseg taag lawm.”

³Puab rov has nrov nrov has tas, “Ca le qhuas Vaajtswv! tej suavtawg kws kub lub nroog luj ntawd yuav cig ua nplaim ntswj pis yog hab nchu paa moog taag ibtxhis le!”

⁴Neeg nkaum plaub tug txwjlaug hab cov qhelunpees txawm txhus caug ndlua pehawm Vaajtswv tug kws nyob sau lub zwmtxwv. Puab has tas, “Amees! Ca le qhuas Vaajtswv!”

⁵Tom qaab ntawd muaj dlua ib lub suab has ntawm lub zwmtxwv tuaj has tas, “Vaajtswv cov tubkhai hab nwg cov tuabneeg, tsi has tug hlub tug yau kws fwm Vaajtswv, ca le qhuas Vaajtswv!”

⁶Ces kuv nov ib lub suab nrov zum zawg ib yaam le ib paab tuabneeg coob coob has lug, hab nrov ib yaam le dlej tsaws tsaag hlub hlub hab nrov ib yaam le suab xub nroo. Lub suab ntawd has tas, “Ca le qhuas Vaajtswv! Rua qhov tug Tswv kws yog peb tug Vaajtswv kws muaj Fwjchim Luj kawg nkaus, nwg yog Vaajntxwv!

⁷Peb ca le zoo sab hab xyivfaab hlo; peb ca le qhuas Vaajtswv lub fwjchim kws luj kawg nkaus! Rua qhov tub txug lub sijhawm kws tug Mivnyuas Yaaj ua tshoob, hab nwg tug nkauj nyaab tub tu cev txhij lawm.

⁸Luas muab ib cev tsoog tsho ntaub maag dlawb rua tug nkauj nyaab naav.” (Cev tsoog tsho ntaub maag dlawb yog pev txug tej num ncaaj nceeg kws Vaajtswv cov tuabneeg naj nub ua).

⁹Ces tug timtswv ceebtsheej has rua kuv has tas, “Koj ca le sau has tas, cov tuabneeg kws tug Mivnyuas Yaaj caw moog nrug nwg noj tshoob yog cov kws tau nyob kaaj sab lug.” Hab tug timtswv has dlua rua kuv has tas, “Tej lug nuav yog Vaajtswv tej lug tag.”

¹⁰Kuv txawm txhus caug ndlua ntawm tug timtswv ntawd kutaw yuav pe nwg, tabsis nwg has rua kuv has tas, “Tsi xob pe kuv! Kuv yog ib tug tubkhai ib yaam le koj, hab ib yaam le koj cov kwvtij txhua tug kws Yexus tau qha qhov tseeb rua puab lawm xwb. Koj ca le pehawm Vaajtswv xwb!” Rua qhov tej lug tseeb kws Yexus qha rua suavdlawg paub yog tej kws Vaajtswv qha rua cov kws cev Vaajtswv lug lawm.

¹¹Tom qaab ntawd kuv txawm pum rooj ntug ceebtsheej qheb, hab kuv pum ib tug txiv neeg dlawb nyob ntawd. Tug kws caij tug txiv neeg dlawb ntawd hu ua Ncaaj hab Tseeb; nwg yog tug kws rau txim hab yog tug kws ua tsuv ua rog ncaaj nceeg.

¹²Nwg ob lub qhovmuag ci ib yaam le nplaim tawg, hab nwg ntoo ntau lub mom kub. Muaj ib lub npe sau rua ntawm nwg lub cev, tabsis tsi muaj leejtwg paub lub npe ntawd, tsuas yog nwg tuab leeg txhaj paub xwb.

¹³Nwg lub tsho ntev lu ntshaav thoob plawg. Suavdlawg hu nwg lub npe has tas, “Vaajtswv Txujlug.”

¹⁴Cov tubrog sau ntuj ceebtsheej lawv nwg qaab lug, puab ib leeg caij ib tug txiv neeg dlawb, hab ib leeg naav ib cev tsoog tsho ntaub maag dlawb.

¹⁵Muaj ib raab ntaaj ntse ntse tawm huv nwg qhovncauj lug. Nwg yuav muab raab ntaaj ntawd tua txhua tsaav tuabneeg hab muab qws hlau kaav puab. Nwg yuav muab cov txiv maab kws nyob huv lub qhov tsuam txiv maab tsuam huv tuabsi. Lub qhov tsuam txiv maab pev txug Vaajtswv tug kws muaj Fwjchim Luj kawg nkaus txujkev chim hab txujkev txav txim.

¹⁶Muaj ib lub npe sau rua ntawm nwg lub tsho ntev hab ntawm nwg ib saab ncej qaab has tas, “Tug Vaajntxwv ntawm txhua tug vaajntxwv, hab tug Tswv ntawm txhua tug tswv.”

¹⁷Tom qaab ntawd kuv pum dlua ib tug timtswv ceebtsheej sawv sau lub nub, nwg has nrov nrov rua tej noog kws yaa sau nruab ntug has tas, “Mej ca le sau nthwv tuaj noj Vaajtswv rooj mov kws luj!

¹⁸Mej ca le tuaj hab noj cov vaajntxwv, cov thawjcoj, tej tubrog, tej neeg, hab cov tuabneeg kws caij neeg tej nqaj, hab noj txhua tsaav tuabneeg, tsi has cov kws ua qhev, cov kws tsi ua qhev, hab tsi has tug hlub tug yau tej nqaj huv tuabsi!”

¹⁹Kuv pum tug tsaj hab cov vaajntxwv huv nplajteb hab puab tej tubrog tuaj ua ke yuav ua rog rua tug kws caij tug txiv neeg dlawb hab nwg tej tubrog.

²⁰Luas nteg tau tug tsaj ntawd hab nteg tau tug cevlug cuav kws dlaag has tas nwg yog ib tug kws cev Vaajtswv lug. (Tug kws cevlug cuav ntawd yog tug kws ua tej txujci taabmeeg tug tsaj ntawd dlaag ntxag cov tuabneeg kws muaj tug tsaj ntawd lub cim nas rua ntawm puab lawm, hab cov tuabneeg kws pe tug mlom kws muaj yaam ntxwv zoo le tug tsaj ntawd.) Luas ca le muab tug tsaj hab tug cevlug cuav ntawd pov rua huv cov nplaim tawg leejfaaj kws cig ntswj pis yog.

²¹Raab ntaaj kws tawm huv tug kws caij tug txiv neeg dlawb ntawd qhovncauj lug txawm tua tug tsaj hab tug cevlug ntawd tej tubrog tuag taag huv tuabsi. Ces tej noog txawm sau nthwv tuaj muab cov tuabneeg kws tuag ntawd tej cev dlua pis rhe noj.