Read Hmong Njua Tshwmsim 3 Bible Online

Tshwmsim 3 - Hmong Njua bible

Tshwmsim 3

¹“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Xaladis le nuav: “Tug kws muaj Vaajtswv xyaa tug ntsujplig hab muaj xyaa lub nubqub, nwg has tas kuv paub tej kws mej naj nub ua; kuv paub has tas mej lub moo nto quas lug has tas, mej yog cov kws muaj sa, tabsis qhov tseeb mej tub tuag lawm!

²Yog le ntawd, mej ca le tsim dlheev lug, hab yaam kws mej tseem tshuav tuag tsi tu sav, mej yuavtsum txhawb kuas rov muaj zug, rua qhov kuv pum has tas tej kws mej ua lawm, mej tseem ua tsi tau zoo lawv le Vaajtswv lub sab nyam.

³Yog le ntawd, mej yuavtsum ncu ntsoov tej kws mej nov hab mej kawm lug lawm. Mej yuavtsum coj lawv le tej ntawd, hab tso plhuav mej tej kev txhum tseg. Yog mej tsi tsim dlheev lug, kuv yuav lug saib mej ib yaam le tug tubsaab tuaj, mej yuav tsi paub lub sijhawm kws kuv lug.

⁴Mej cov kws nyob huv lub nroog Xaladis tsuas muaj ob peb leeg txhaj tsi tau ua rua puab tej rig tsho qas xwb, puab cov ntawd yuav tau naav cev rig tsho dlawb hab nrug kuv ua ke, rua qhov puab yeej tsimnyog tau lawm.

⁵Tug kws kovyeej, nwg yuav tau naav cev rig tsho dlawb, kuv yuav tsi rhu nwg lub npe huv phoo ntawv kws sau cov tuabneeg kws muaj sa ntev moog ibtxhis lawm tej npe. Hab kuv yuav taabmeeg qha rua kuv Txiv hab rua nwg cov timtswv has tas, tug ntawd yog kuv le.

⁶“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg!

⁷“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Filadeefias has tas, “Tug kws dlawbhuv hab ncaaj nceeg kws tuav Daviv tug yumsij, yog nwg qheb lawm, yeej tsi muaj leejtwg kaw tau, yog nwg kaw lawm, yeej tsi muaj leejtwg qheb tau, nwg has tas,

⁸kuv paub tej kws mej ua; hab paub has tas mej tsi muaj zug pistsawg los mej tseem coj lawv le tej lug kws kuv qha hab tsi tso kuv tseg. Kuv tub qheb lub qhovrooj rua ntawm mej xubndlag lawm, tsi muaj leejtwg yuav kaw tau.

⁹Mej ua tuab zoo noog kuv tej lug! Cov tuabneeg kws yog dlaab Ntxwgnyoog cov, puab dlaag has tas puab yog cov Yudais, tabsis qhov tseeb puab tsi yog, kuv yuav kuas puab lug txhus caug rua ntawm mej kutaw pe mej. Puab yuav paub has tas kuv hlub mej.

¹⁰Rua qhov mej ua lawv le tej lug kws kuv qha has tas, mej yuavtsum ua sab ntev, kuv yuav tsomkwm mej, tsi pub mej raug tej kev txomnyem kws yuav muaj lug thoob plawg huv qaab ntuj nuav. Tej kev txomnyem ntawd yog tej kws yuav lug sim tuabneeg nplajteb lub sab.

¹¹Tshuav tsi ntev nuav kuv yuav lug. Mej yuavtsum khaws tej kws mej muaj lawm ca zoo zoo, txhaj tsi muaj leejtwg txeeb tau mej lub mom kub.

¹²Kuv yuav tsaa tug kws kovyeej ua tug ncej zeb nreg kuv tug Vaajtswv lub tuamtsev, hab nwg yuav nyob huv moog ibtxhis le. Kuv yuav sau kuv tug Vaajtswv lub npe hab sau kuv tug Vaajtswv lub nroog lub npe rua ntawm nwg lub cev. Lub nroog ntawd yog lub nroog Yeluxalees tshab kws yuav lug ntawm kuv tug Vaajtswv kws nyob sau ntuj ceebtsheej lug. Kuv yuav sau kuv lub npe tshab rua ntawm nwg hab.

¹³“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg!

¹⁴“Koj sau tej kws kuv yuav qha rua koj nuav xaa moog rua tug timtswv kws saib pawg ntseeg huv lub nroog Laudikeyas has tas, “Tug kws muaj lub npe hu ua Amees tug kws ncaaj nceeg hab ua timkhawv tseeb, hab yog ib puas tsaav yaam kws Vaajtswv tsim lug lawm lub hauvpaug.

¹⁵Kuv paub tej kws mej tub ua lug lawm; kuv paub has tas mej tsi kub tsi txag. Yog mej yuav kub, ca le kub hlo, yog mej yuav txag ca le txag kag.

¹⁶Tabsis yog mej suv sem so xwb, tsi kub tsi txag, ces kuv yuav muab mej nti tawm huv kuv lub qhovncauj moog!

¹⁷Mej has tas, ‘Peb npluanuj, peb tsi pluag ib yaam dlaabtsi le.’ Tabsis mej tsi paub, mej tub tsi muaj ib yaam dlaabtsi le! Mej pluag, mej labqaab, hab mej dligmuag.

¹⁸Kuv txhaj has rua mej has tas, mej ca le tuaj yuav kuv cov kub kws yog cov tseem kub, mej txhaj le npluanuj. Mej ca le tuaj yuav cev rig tsho dlawb coj moog naav npug mej lub cev kws labqaab, mej txhaj tsi txaajmuag. Hab mej ca le tuaj yuav tshuaj moog rau mej qhovmuag, mej txhaj le pum kev.

¹⁹Kuv yeej tshev hab ntuag txhua tug kws kuv hlub, yog le ntawd mej yuavtsum muab sab rau ntseeg hab tso plhuav mej tej kev txhum tseg.

²⁰Mej sim noog saib, kuv sawv saab qhovrooj nrau hab khob; yog leejtwg nov kuv lub suab hab qheb qhovrooj, kuv yuav lug huv tug ntawd tsev. Kuv yuav nrug nwg noj mov hab nwg yuav nrug kuv noj mov.

²¹Kuv yuav pub tug kws kovyeej lug nrug kuv nyob ntawm kuv lub zwmtxwv, ib yaam le kuv Txiv kuas kuv lug nrug nwg nyob ntawm nwg lub zwmtxwv.

²²“Yog mej leejtwg muaj qhovntsej, ca le noog tej lug kws Vaaj Ntsujplig qha rua cov ntseeg!”