Read Hmong Njua 1 Xamuyees 20 Bible Online

1 Xamuyees 20 - Hmong Njua bible

1 Xamuyees 20

¹Tom qaab ntawd, Daviv txawm tsiv tawm ntawm lub zog Nayaus huv lub nroog Lamas moog cuag Yaunathaas. Nwg nug Yaunathaas has tas, “Kuv tau ua dlaabtsi? Kuv muaj txim dlaabtsi? Kuv tau ua txhum koj txiv qhov twg, nwg txhaj pheej xaav muab kuv tua povtseg?”

²Yaunathaas teb has tas, “Vaajtswv yuav tsi pub kuas koj tuag. Txhua zag kws kuv txiv yuav ua dlaabtsi, nwg yeej qha rua kuv ua ntej, tsi has yaam kws tseemceeb lossis tsi tseemceeb, nwg tsi npog ib yaam tseg le. Nyaj yuav tsi muaj le koj xaav!”

³Tabsis Daviv teb has tas, “Koj txiv paub has tas koj hlub kuv heev, tej kws koj txiv yuav ua, nwg tsi qha rua koj, nyob tsaam koj yuav ntxhuv sab heev. Kuv tuav tug TSWV kws muaj sa nyob lub npe qha rua koj has tas, kuv nyob tsi dleb ntawm txujkev tuag lawm!”

⁴Yaunathaas has tas, “Koj xaav kuas kuv paab koj dlaabtsi, kuv yeej txaus sab paab.”

⁵Daviv teb has tas, “Pigkig yog nub ua rooj noj rooj haus Hli Xab, kuv yuav tau nrug vaajntxwv noj mov ua ke. Tabsis thov ca kuv tsiv moog nkaum nraag laj, moog txug quasneeg yuav tsaus ntuj, kuv maam le rov lug.

⁶Yog koj txiv tsi pum kuv lug nyob ntawm rooj mov, ces koj has rua nwg tas, kuv tub thov koj ca kuv rov moog rua nraag lub nroog Npelehees lawm, rua qhov kuv txiv puab yuav tua tsaj hlawv fij rua tug TSWV lawv le naj xyoo ua.

⁷Yog koj txiv has tas, ‘Tau lawm,’ Ces kuv txhaj le yuav tso sab; tabsis yog nwg npautawg, ces koj paub has tas nwg yeej yuav muab kuv tua povtseg.

⁸Thov koj ua le kuv has nuav, hab ncu ntsoov tej lug kws koj cog tseg rua kuv lawm. Yog kuv ua txhum, koj ca le muab kuv tua povtseg xwb! Ua le caag koj yuav coj kuv moog rua koj txiv tua?”

⁹Yaunathaas teb has tas, “Koj tsi xob xaav le ko, yog kuv paub has tas, kuv txiv yuav muab koj tua povtseg tag, kuv puas khuv muab npog ca tsi qha rua koj paub?”

¹⁰Daviv nug has tas, “Yog koj txiv teb koj ua npautawg vog, leejtwg yuav tuaj qha rua kuv paub.”

¹¹Yaunathaas teb has tas, “Wb moog nraag laj.” Ces obtug txawm moog,

¹²hab Yaunathaas has rua Daviv has tas, “Thov tug TSWV kws yog cov Yixalayees tug Vaajtswv ua timkhawv rua wb! Pigkig hab quasneeg lub caij nuav kuv yuav nug kuv txiv saib, yog nwg ua zoo rua koj, kuv yuav qha rua koj paub.

¹³Yog nwg yuav ua phem rua koj, kuv tseem tsi qha rua koj paub hab paab kuas koj dlim, ces thov tug TSWV muab kuv tua povtseg. Thov tug TSWV nrug nraim koj ib yaam le yaav taag lug nwg nrug kuv txiv!

¹⁴Yog kuv tseem ua neej nyob, thov koj ncu ntsoov koj tej lug cog tseg hab ua zoo rua kuv. Tabsis yog kuv tuag lawm

¹⁵los thov koj ua sab dlawb sab zoo rua kuv tsev tuabneeg moog ib yaam le koj ua rua kuv. Thaus tug TSWV ua rua koj tej yeebncuab puamtsuaj taag lawm

¹⁶los thov kuas wb tej lug cog tseg nuav tseem nyob ruaj khov kho. Yog koj rhuav wb tej lug cog tseg nuav, tug TSWV yuav rau txim rua koj.”

¹⁷Yaunathaas kuas Daviv rov coglug tseg ib zag ntxiv has tas, nwg yuav hlub Yaunathaas, rua qhov Yaunathaas hlub Daviv ib yaam le nwg hlub nwg lub cev.

¹⁸Yaunathaas has rua Daviv has tas, “Pigkig yog nub ua rooj noj rooj haus Hli Xab, yog tsi pum koj moog, kuv txiv yeej yuav nug xwb.

¹⁹Yog quasneeg tseem tsi tau pum koj tshwm hab, ntshai kuv txiv yimfuab yuav nug heev; yog le ntawd, koj ca le tsiv moog nkaum ntawm qhov qub chaw, hab koj moog nkaum ntawm pawg pobzeb saab tom,

²⁰Ces kuv yuav muab neevnti tua peb nee moog rua ntawm pawg pobzeb ib yaam le kuv tua dlaim phaj.

²¹Kuv yuav kuas kuv tug tubkhai moog khaws cov xub lug. Yog kuv qha rua nwg has tas, ‘Cov xub poob rua ntawm koj saab tom nuav, koj ca le moog khaws lug.’ Qhov ntawd txhais has tas, koj ca le tawm lug, tsi muaj xwm dlaabtsi. Kuv coglug rua tug TSWV kws muaj sa nyob has tas, koj yuav tsi raug kev txhawj ntshai dlaabtsi.

²²Tabsis yog kuv qha rua kuv tug tubkhai has tas, ‘Cov xub poob rua ntawm koj saab tom u lawm.’ Ces koj ca le tsiv, rua qhov tug TSWV tub pum zoo ca koj moog lawm.

²³Tej lug kws wb cog tseg nuav muaj tug TSWV ua timkhawv has tas, wb ib tug yuav tsi rhuav ib tug tej lug moog ibtxhis le.”

²⁴Nub kws ua rooj noj rooj haus Hli Xab ntawd, Daviv txawm moog nkaum rua nraag laj lawm. Vaajntxwv Xa-ules tuaj rua ntawm rooj noj rooj haus,

²⁵hab nyob ntawm lub chaw kws nwg ibtxwm nyob npuas ntawm phaab ntsaa. Aneles nyob npuas nkaus vaajntxwv, hab Yaunathaas nyob ncaaj vaajntxwv xubndlag saab rooj tod, Daviv lub chaw tsi muaj tuabneeg nyob le.

²⁶Tabsis nub ntawd Xa-ules tsi has ib lus le, rua qhov nwg xaav has tas, “Tej zag yog muaj dlaabtsi ua rua Daviv lub cev tsi huv lawm, nwg txhaj tsi tuaj.”

²⁷Nub tom qaab los tsi pum Daviv tuaj nyob nwg lub chaw le, Xa-ules txhaj nug Yaunathaas has tas, “Ua caag naag mo hab nub nua tsi pum Daviv tuaj noj mov?”

²⁸Yaunathaas teb has tas, “Nwg thov kuv kuas ca nwg rov moog rua nraag Npelehees lawm.

²⁹Nwg has tas, ‘Thov ca kuv moog, rua qhov peb tsev tuabneeg tua tsaj fij ua rooj noj rooj haus huv lub nroog Npelehees, hab kuv tug tijlaug kuas kuv yuavtsum moog xwb, yog koj yog kuv tug phoojywg tag, thov koj tso kuv moog saib kuv cov kwvtij,’ vim le ntawd nwg txhaj tsi tuaj nyob ntawm nwg lub chaw noj mov.”

³⁰Xa-ules chim heev rua Yaunathaas hab tshev Yaunathaas has tas, “Nam tub tsi tsimtxaj nuav, nwgnuav kuv paub has tas, koj nrug Daviv ua ib nqaag, koj rhuav koj hab koj nam ntsejmuag nkaus xwb!

³¹Koj puas paub has tas, yog Daviv tseem ua neej nyob, koj yuav tsi tau ua vaajntxwv kaav lub tebchaws nuav le? Koj ca le moog coj Daviv lug ntawm nuav, kuv yuav muab nwg tua povtseg.”

³²Yaunathaas teb has tas, “Vim le caag koj txhaj yuav muab nwg tua povtseg, nwg tau ua txhum koj dlaabtsi?”

³³Thaus Yaunathaas has le ntawd, Xa-ules tsaa hlo muv nkaug Yaunathaas. Yaunathaas txhaj paub has tas, nwg txiv yeej xaav muab Daviv tua povtseg tag.

³⁴Yaunathaas txawm sawv tseeg ntawm rooj mov tawm npautawg vog moog lawm, hab nub ntawd nwg tsi noj ib yaam dlaabtsi le, nub ntawd yog nub xab ob. Yaunathaas ntxhuv sab kawg le, rua qhov nwg txiv ua phem heev rua Daviv.

³⁵Taagkig sawv ntxuv, Yaunathaas txawm moog cuag Daviv nraag laj, lawv le obtug tau teem tseg lawm. Nwg coj ib tug tub hluas nrug nwg moog

³⁶hab has rua tug tub hluas ntawd tas, “Koj dlha moog khaws cov xub kws kuv yuav tua moog.” Thaus tug tub hluas taabtom dlha moog, Yaunathaas txawm nqug neevnti tua cov xub moog ua ntej.

³⁷Thaus tug tub hluas moog txug ntawm qhov chaw kws cov xub poob, Yaunathaas hu has tas, “Cov xub poob rua tom u lawm!

³⁸Koj tsi xob nreg ntawm ko, koj ca le dlha tag moog!” Tug tub hluas ntawd khaws cov xub coj lug rua Yaunathaas.

³⁹Nwg tsi paub has tas sov Yaunathaas has le ntawd, yog nwg has dlaabtsi, tsuas yog Yaunathaas hab Daviv txhaj paub xwb.

⁴⁰Yaunathaas muab nwg raab neevnti rua tug tub hluas hab kuas nwg nqaa moog tsev.

⁴¹Thaus tug tub hluas rov moog tsev lawm, Daviv maam tawm ntawm pawg pobzeb saab tod lug, nwg lug txhus caug pe Yaunathaas peb zag, obtug sis qawg quaj hab sis nwj; Daviv mluag tshaaj Yaunathaas.

⁴²Yaunathaas has rua Daviv has tas, “Thov Vaajtswv nrug nraim koj. Thov tug TSWV ua timkhawv rua wb hab wb cov xeebntxwv has tas, wb hab puab yuav tsi rhuav tej lug kws wb cog tseg nuav moog ibtxhis le.” Ces Daviv txawm ncaim moog, hab Yaunathaas rov lug rua huv nroog lawm.