Read Hmong Njua 1 Xamuyees 21 Bible Online

1 Xamuyees 21 - Hmong Njua bible

1 Xamuyees 21

¹Daviv moog cuag tug povthawj Ahimelej kws nyob huv lub nroog Naus. Ahimelej tawm tshee nyo tuaj ntsib Daviv hab nug has tas, “Ua caag koj tuab leeg tuaj xwb, tsi muaj leejtwg nrug koj tuaj le?”

²Daviv teb has tas, “Vaajntxwv kuas kuv tuaj ua ib qhov num, hab nwg kuas kuv tsi xob qha tej kws nwg khaiv kuv tuaj ua nuav rua leejtwg paub le. Kuv tub teem kuv cov tuabneeg rua ib qhov chaw kuas puab tuaj ntsib kuv lawm.

³Koj puas muaj dlaabtsi noj? Thov muab tsib lub ncuav rua kuv lossis koj muab dlaabtsi los tau.”

⁴Tug povthawj teb has tas, “Kuv tsi muaj tej ncuav kws noj tau le, tsuas muaj cov ncuav kws muab fij rua tug TSWV lawm xwb; yog koj cov tuabneeg tsi tau nrug quaspuj pw, mas kuv txhaj muab rua koj.”

⁵Daviv teb has tas, “Qhov tseeb, puab yeej tsi nrug quaspuj pw le. Thaus kuv cov tuabneeg tawm moog ua num lawm, peb yeej caiv kuas peb yog tuabneeg huv; nub nua peb tuaj ua num, mas peb hajyam caiv zoo.”

⁶Yog le ntawd, tug povthawj txhaj muab cov ncuav kws tub muab fij rua tug TSWV lawm rua Daviv, rua qhov nwg tsuas muaj cov ncuav kws tub muab fij rua Vaajtswv, hab tshem tawm sau lub rooj kws yuav muab cov ncuav tshab hloov lawm xwb.

⁷(Nub ntawd Dau-es kws yog Xa-ules tug thawj tubkhai yug tsaj kws yog tuabneeg Edoos, tuaj nyob ntawd hab, rua qhov nwg tuaj cuag tug TSWV.)

⁸Daviv nug Ahimelej has tas, “Koj puas muaj ib raab muv lossis ib raab ntaaj rua kuv? Kuv tsi coj muv lossis ntaaj tuaj le, rua qhov vaajntxwv khaiv kuas kuv ca le tuaj taamsim, kuv txhaj nqaa tsi tau tuaj.”

⁹Ahimelej teb has tas, “Kuv muaj Nkauli-am kws yog tuabneeg Filitees tug kws koj tua tuag huv lub Haav Elas raab ntaaj kws muab ntaub qhwv tso rua tom qaab lub efaus. Yog koj xaav tau raab ntawd los coj raab ntawd moog, rua qhov tsi muaj dlua lwm raab lawm.” Daviv teb has tas, “Tsi muaj dlua lwm raab ntaaj zoo tshaaj raab ntawd lawm, thov muab raab ntawd rua kuv.”

¹⁰Yog le nub ntawd, Daviv txawm tsiv Xa-ules moog cuag Vaajntxwv Akhises kws kaav lub nroog Nkas lawm.

¹¹Vaajntxwv Akhises cov numtswv has rua Vaajntxwv Akhises has tas, “Tug nuav puas yog Daviv kws ua vaajntxwv kaav nwg lub tebchaws? Tug txivneej nuav yog tug kws cov quaspuj hu nkauj hab seev cev qhuas has tas, ‘Xa-ules tua tuag quas txheeb leej, tabsis Daviv tua tuag quas vaam leej!’ ”

¹²Daviv khaws tej lug ntawd rua nruab sab, hab ntshai Vaajntxwv Akhises kws kaav lub nroog Nkas kawg le.

¹³Daviv ua txuj ua le tug tuabneeg vwm, thaus luas cheem nwg, nwg laam tau laam kes ntawm tej roojvaag nroog, hab ua quavncaug nrug quas zig ntawm nwg tej fwjtxwv.

¹⁴Yog le ntawd, Akhises has rua nwg cov tubkhai has tas, “Mej saib, nwg vwm lawm! Ua caag mej tseem coj nwg tuaj cuag kuv hab?

¹⁵Kuv tsi muaj tuabneeg vwm los caag? Ua caag mej tseem coj dlua ib tug tuabneeg vwm le nuav tuaj huv kuv tsev hab taabkaum kuv?”