Read Hmong Njua 1 Xamuyees 27 Bible Online

1 Xamuyees 27 - Hmong Njua bible

1 Xamuyees 27

¹Daviv xaav has tas, “Muaj ib nub twg Xa-ules yuav muab kuv tua povtseg xwb. Qhov zoo ces kuv yuav tau tsiv moog nyob huv tebchaws Filitees kuas Xa-ules tso tseg tsi nrhav kuv tua huv lub tebchaws Yixalayees nuav lawm, kuv txhaj yuav tau nyob tso sab lug.”

²Yog le ntawd, Daviv hab nwg cov tuabneeg rau pua leej txhaj moog cuag Ma-aus tug tub Akhises kws ua vaajntxwv kaav lub nroog Nkas.

³Daviv cov tuabneeg hab puab cov quaspuj mivnyuas nyob huv lub nroog Nkas. Daviv coj nwg ob tug quaspuj kws yog Ahinau-as kws nyob huv lub nroog Yexelees hab Anpinkayis kws yog Nanpaas tug quaspuj kws nyob huv lub nroog Kalemees nrug nwg moog hab.

⁴Thaus Xa-ules nov has tas, Daviv tsiv moog nyob huv lub nroog Nkas, nwg txawm tso tseg tsi moog caum Daviv tua lawm.

⁵Daviv has rua Akhises has tas, “Yog koj txaus sab rua kuv, thov koj pub ib thaaj aav rua kuv ua nroog nyob. Tsi xob ca kuv nrug koj nyob huv lub tuamceeb nroog nuav.”

⁶Yog le ntawd, Akhises txhaj muab lub nroog Xikelas rua Daviv, tub yog vim le ntawd, lub nroog Xikelas txhaj yog tug vaajntxwv kws kaav tebchaws Yudas tug lug txug naj nub nua.

⁷Daviv nyob huv tebchaws Filitees tau ib xyoos hab plaub hlis.

⁸Lub sijhawm ntawd Daviv hab nwg cov tuabneeg tau moog tua cov Nkesus, cov Nkixis hab cov Amalej kws ibtxwm nyob cheebtsaam ntawd tau ntau tam lug lawm. Daviv pheej tua hab fuab puab tej tebchaws le ntawd moog txug rua Sus hab moog ti nkaus nraag cov Iziv tug nrimteb,

⁹Daviv muab tej quaspuj hab tej txivneej tua tuag taag, hab nteg tej yaaj, tej nyuj, tej neeg luav, tej ntxhuav caab hab nqaa puab tej tsoog tsho huv tuabsi lug. Daviv rov lug cuag Akhises,

¹⁰Akhises nug Daviv has tas, “Nub nua koj moog fuab tej nuav qhov twg lug?” Daviv qha rua Akhises has tas, “Kuv moog rua tebchaws Yudas saab qaabteb, moog rua huv xeem Yelamees cheebtsaam aav hab moog rua cheebtsaam kws cov Kenais nyob.”

¹¹Daviv muab tej quaspuj txivneej tua tuag taag, kuas tsi muaj leejtwg moog qha tej kws Daviv ua ntawd rua huv lub nroog Nkas. Tej nuav yog tej kws Daviv ua thaus nwg nyob huv tebchaws Filitees.

¹²Akhises ntseeg Daviv sab hab has tas, “Nwg tsaav tuabneeg Yixalayees ntxub nwg heev, mas nwg yeej yuav ua num rua kuv moog taag nwg simneej le.”