Read Hmong Njua 1 Xamuyees 8 Bible Online

1 Xamuyees 8 - Hmong Njua bible

1 Xamuyees 8

¹Thaus Xamuyees laug heev lawm, nwg tsaa nwg ob tug tub tu plaub ntug rua cov Yixalayees.

²Tug tub hlub hu ua Yau-ees hab tug tub yau hu ua Anpiyas; obtug tu plaub ntug huv lub nroog Npesenpas.

³Tabsis obtug tsi ua lub neej zoo le obtug txiv. Obtug tsuas ntshaw txujkev nrhav nyaj xwb, obtug txhaj yuav tej nyaj kws luas coj tuaj xab hab obtug tsi tu plaub kuas ncaaj rua suavdlawg.

⁴Cov Yixalayees cov thawjcoj tuaj sis sau hab moog cuag Xamuyees huv lub nroog Lamas,

⁵hab has rua nwg tas, “Nwgnuav koj laug heev lawm, koj ob tug tub tsi coj hab ua lawv le koj ua. Yog le ntawd, thov koj tsaa ib tug vaajntxwv kaav peb, kuas peb muaj vaajntxwv ib yaam le luas lwm tsaav tuabneeg muaj hab.”

⁶Xamuyees tsi pum zoo qhov kws cov Yixalayees thov nwg tsaa ib tug vaajntxwv kaav puab. Yog le ntawd, Xamuyees txhaj thov tug TSWV,

⁷hab tug TSWV teb has tas, “Koj ua tuab zoo noog tej lug kws cov pejxeem has rua koj. Puab tsi yog tso koj tseg xwb, tabsis puab tso kuv kws yog puab tug vaajntxwv tseg lawm hab.

⁸Txij thaus kuv coj puab tawm nraag tebchaws Iziv lug, puab yeej tsi muab sab npuab kuv hab pheej moog pe lwm tsaav tuabneeg tej vaajtswv; nwgnuav puab taabtom ua rua koj ib yaam le puab ua rua kuv ntaag.

⁹Koj ca le ua lawv le puab thov, tabsis koj yuavtsum ntuag puab tawv qhawv hab qha kuas puab paub has tas, cov vaajntxwv ntawd yuav kaav puab le caag.”

¹⁰Xamuyees txhaj qha txhua yaam rua cov pejxeem kws tuaj thov nwg tsaa ib tug vaajntxwv kaav puab, lawv le tej lug kws tug TSWV has rua Xamuyees lawm.

¹¹Xamuyees has rua puab tas, “Mej tug vaajntxwv yuav kaav mej le nuav: Nwg yuav coj mej tej tub moog ua tubrog, ibtxha yuav ua tubrog tsaav tsheb neeg, ibtxha yuav ua tubrog caij neeg hab ibtxha yuav dlha ua vaajntxwv tej tsheb neeg ntej.

¹²Nwg yuav tsaa ibtxha saib ib txheeb leej, hab ibtxha saib tsib caug leej. Mej cov tub yuav moog laij nwg tej laj tej teb hab sau nwg tej qoobloo, puab yuav ntaus ntaaj ntaus rag hab ntaus cuabyeej ua rog tiv thaiv nwg tej tsheb neeg.

¹³Mej tej ntxhais yuav moog tov tshuaj tsw qaab rua nwg, ua zaub mov hab ci ncuav rua nwg noj.

¹⁴Nwg yuav txeeb mej tej laj tej teb kws zoo, tej vaaj txiv maab hab txiv ntoo roj rua nwg cov numtswv yuav.

¹⁵Nwg yuav sau mej tej qoobloo hab tej txiv maab ib feem kaum rua nwg cov thawj tubrog hab cov numtswv.

¹⁶Nwg yuav txeeb mej tej tubkhai, tej nyuj hab tej neeg luav kws zoo moog ua nwg tej num.

¹⁷Nwg yuav sau mej tej tsaj txhu ib feem kaum rua nwg yuav hab mej yuav tau ua nwg qhev.

¹⁸Thaus ntawd mej yuav tshev hab ywg mej tug vaajntxwv kws mej xaiv, tabsis tug TSWV yuav tsi noog mej tej lug ywg le.”

¹⁹Cov pejxeem tsi noog Xamuyees has le, puab has tas, “Peb tsi noog koj has, peb xaav tau ib tug vaajntxwv,

²⁰kuas peb txhaj yuav zoo ib yaam le luas lwm tsaav tuabneeg. Peb tug vaajntxwv yuav kaav peb, coj peb moog tua rog hab tawmtsaam peb cov yeebncuab.”

²¹Xamuyees noog tej lug kws puab has ntawd, nwg coj zaaj nuav moog pav qha rua tug TSWV.

²²Tug TSWV teb has tas, “Koj ca le ua lawv le puab thov hab tsaa ib tug vaajntxwv rua puab.” Ces Xamuyees txhaj kuas cov Yixalayees rov qaab moog tsev.