Read Hrangkhol IRPHUTNA 1 Bible Online

IRPHUTNA 1 - Hrangkhol bible

IRPHUTNA 1

¹Pathianin a phut taka irnêng le irvân a siama,

²rammual hi mumalboi le a korong ringot a nia; tui inthûk tak chung khom an thim khaka; Pathian irtha khan tui chunghai chu a op maia.

³Khan Pathianin, “Vâr hong om ri se” a tia; khanchu vâr a hong om ta.

⁴Khan Pathianin vâr chu a ena, a sa a ti oka; khanchu Pathianin vâr le inthim chu a’rsentir ta.

⁵Pathianin vâr chu “Sûn” a tia, inthim chu “Zân” a tia. Khanchu a sûn khatna zîng le khohloi a om tâka.

⁶Khan Pathianin, “Tui le tui kâra khan boiruak liantak om sianlân, kha khan tui le tuihai chu irsen ri se,” a tia.

⁷Khanchu, Pathianin, boiruak lian tak chu a siama, boiruak lian tak hnuaia tui omhai le boiruak lian tak chunga tui omhai chu a’rsentir tâka. Khaang tak khan a hong ni ta.

⁸Khan Pathianin boiruak lian tak chu “Irvân” a tia, khanchu khohloi a oma, zîng tiang a oma, kha kha sûn hnina.

⁹Khan Pathianin, “Irvân hnuaia tui omhai chu hmunkhata luang khôm sianlân, mual le tâng chu inlang ri se,” a tia. Khanchu khaang tak khan a hong ni tâka.

¹⁰Pathianin mual le tâng chu “Irnêng” a tia, tui om khômhai chu “Tuipuihai” a ti tâka, khan Pathianin kha kha a ena, a sa a ti zapa.

¹¹Khan Pathianin, “Irnêngin hloisûl, chîmu, thei kunghai, irnênga an chi om dân hrang anga ra, a ra sûnga a chi omhai chu hong ra suak ri se,” a tia. Khanchu, khaang tak khan a hong ni ta.

¹²Khanchu irnêngin hloisûlhai, chîmuhai an mâni chi om dân hrang anga chi neihai, thing an mâni chi om dân hranga ra, a ra sûnga a chi omhai chu an suak ta. Khan Pathianin a ena, a sa a ti zapa.

¹³Khanchu khohloi a oma, zîng a oma, kha kha sûn thumna.

¹⁴Khan Pathianin, “Sûn le zân irsentir hrangin irvân boiruak lian taka khan vârhai om sianlân; khahai kha irsinsiana hai, zoro hai, sûn hai le kumhai inhriatna hrang ni ri se,

¹⁵irnêng invâr hrangin irvân boiruak lian taka khan vârhai om ri se,” a tia. Khanchu khaang tak khan a hong ni tâka.

¹⁶Khan Pathianin vâr roiinpuitak inhni khi a siama, vâr roiinpui ual kha sûn roirêltu hrangin a tia, vâr roiinpui loi ual kha zân roirêltu hrangin; ârsihai khom khi a siam sa.

¹⁷Khan Pathianin an nihai kha irnêng invârtir hrangin irvân boiruak liantak chunga khin a siaa;

¹⁸sûn le zân chunga roirêl hrang le vâr le inthim chu irsentir hrangin, Pathianin kha kha a ena, a sa a tia.

¹⁹Khanchu khohloi a oma, zîng a oma, kha kha sûn minlina.

²⁰Khan Pathianin, “Tuihaiin thilsiam hringna nei tamtak insua mai sianlân, vatehai khom irnêng chunga irvân boiruak liantak inhonga hin vuang sup sup ri sehai,” a tia.

²¹Khanchu Pathianin tuipuia sa liantak takhai a siama, thilsiam hringna neia châng thei tinrêng, tuia insua tâkhai kha, an mâni chi om dân hrang ang takin a siama, va mitha nei tinrêng khom an mâni chi omdân hrang ang sengin a siam. Pathianin kha kha a ena, a sa a tia.

²²Khan Pathianin, “Irchi tamtak nin irchi ata hong pung unglân, tuipuihaia hong sip roi, vâhai khom irnênga pung ri sehai,” tiin sat a vura.

²³Khanchu khohloi a oma, zîng a oma, kha kha sûn ringana.

²⁴Khan Pathianin, “Irnênga thilhringhai chu an mâni chi omdân lam angin sa murdi an omdân ang chitin om ri se,” a tia. Khanchu an hong om tâka.

²⁵Khanchu Pathianin ram sa, insûng sa an chi omdân hrang siamin le irnênga bokvâka thilhring murdi a isiamhai kha a ena, khan Pathianin a sa a ti tâka.

²⁶Khanchu Pathianin, “Ama irangpuiin mihriama siam inlân, tuipui sûnga nga le chunglêng vahai, le sa murdihai chunga irnênga bokvâka thilhring murdihai chunga ircham inneitir ki ti,” a tia.

²⁷Khanchu Pathianin ama irangpuiin mihriam a siama, ama ang zekin pasal le nupang a siama.

²⁸Khanchu Pathianin sat a vurhaia, Pathian ngêtin an kuang khan, “Irchi tamtak sema pung hrangin, irnêng chung hi lua sipin, nin ircham takin inomtir roi, tuipui sûnga ngahai chunga, chunglêng vahai chunga khom, thilhring irnêng chunga bokvâka fe murdihai chunga ircham nei roi,” a tia.

²⁹Khanchu Pathian ngêtin, “Irngai roi, irnêng chunga chîmu tinrêng le thing tinrêng thing ra nei murdi nangni ki ipêk a ni, nin bu hrangin.

³⁰Khan irnênga sa murdihai kôla khom, chunglêng va murdihai laia, thil irnênga bokvâka fehai laia khom, hringna nei murdihai kuanga khom, an bu hrangin sûlhringhai ki ipêk a ni,” a tia.

³¹Khanchu Pathianin a thilsiam murdi a ena, irngai ro, a sân a sa a ti oka. Khanchu khohloi a oma, zîng khom a hong om tâk a ni, a sûn rukna chu.