Read Hrangkhol IRPHUTNA 12 Bible Online

IRPHUTNA 12 - Hrangkhol bible

IRPHUTNA 12

¹Khan RENGPA’N Abrama kuanga khan, “Ni khua ata ni urêng sûngsuakhai le ni pa in ata suakin lân, ram nang ki irhmûna hranga fe ro:

²khanchu irchi tamtakin nang siam ki ta, sat tinrêng nang vur ki ti, ni’rhming inthangtir ki ti; khan, nang satvurna ni ro.

³Khan sat nang vurtu murdihai satvurhai ki ti. Khua nang sâltu chu khuasâlhai ki ti, nangmaa khan irnênga nam tin satvurin la om an ti,” a tia.

⁴Khan Abrama khomin RENGPA iti pe lam angin a fe tâka; Lota khom a fe saa, khan Abrama chu Haran khua ata a suaksan laiin kum 75 mi a ni.

⁵Khan Abrama dôngma Saraii le a sangpa nâi Lota le an sum nei murdi le Haran khuaa an mi nei takhai a hruaia: Kanaan rama fe hrangin an suaka; Kanaan ram chu an tung tâka.

⁶Khan Abrama chu, kha rama Sekem hmun dênin, More tâng seso thing hmun dênin a fe zêla; kha zoro khan Kanaan mihai chu kha rama khan an lei oma.

⁷Khan RENGPA kha Abrama kuang an lâra, “Hi ram hi ni’rchihai la pehai ki ti,” a tia. khanchu a kuanga inlârtu RENGPA ta hrangin maichâm a siama.

⁸Khan khatak ata Bethel nisua tiang tânga a’rsona, kha khan puan in a sunga, nisua tiang Bethel a oma. Nitâk tiang Ai khua a oma: kha hmuna khan RENGPA ta hrang maichâm a siam nôka; RENGPA irhming koiin a oma.

⁹Khan Abrama chu sim tiang ram panin a’rson nôk thiaia.

¹⁰Khan kha rama khan châm a hong tâka: kha rama châm kha a nahrai sikin, Abrama chu Aigupta rama zu om viat hrangin a suak tâka.

¹¹Khan hiang hin a nia, Aigupta rama an lût hrangin a dôngma Saraii kuanga khan, “Irngai ro, nupang hmêl satak ni nih ti kin hriat.

¹²Khanchu hiang hin ni a ti, Aigupta mihaiin an ni hmuin chu, hi hi a dôngma a ni, ti an ta; keima chu an ni ithat hrang a ni, nang chu nang hruaipai an ti.

¹³Nangma sikin a dama ki om theina hrangin, a farnu ki ni, lungkham takin ni irti mai hrang a ni,” a tia.

¹⁴Khan hiang hi a hong nia, Abrama khan Aigupta ram a lûtin chu, Aigupta-haiin nupangnu kha an hmua, a hmêl a sa pehai hraia an indita.

¹⁵Faroa milianhai khomin an hmua, Faroa ina an hruai inlûta.

¹⁶Khan, ama’n chu Saraii sikin Abrama chu satakin a dona, belra, sehrât, sakuartunghai, suaknu suakpa le saringseihai a neipui tâka.

¹⁷Khan RENGPA’N Abrama dôngma Saraii sikin Faroa le a in mihai chu a sate’n dengtheiin a soisakhai sabaka.

¹⁸Khanchu Faroa’n Abrama kha a koia, “Ki chunga hin i sin tak mo ni itho tâk? Ni dôngma a nih ti itho mo ni ni inhril loi?

¹⁹ki farnu kêng, itho mo ni iti? Ni ti no sika kêng dôngma’n ki inei a ni hi te: a dik atûn chu ni dôngma hi hruaiin lân, fe pat roi,” a tia.

²⁰Khanchu hi thu sikin Faroa’n a mihai kuang thu a pêkhaia, hi mihai hi hong thakhai ta roi, a dôngma le an neinun nei murdihai leh a tia.