Read Hrangkhol IRPHUTNA 13 Bible Online

IRPHUTNA 13 - Hrangkhol bible

IRPHUTNA 13

¹Khan Abrama chu Aigupta ram ata a suaka, Kanaan ram sim tiang a oma, a dôngma le an neinun murdi le Lota hai khom an rêngin an om suama.

²Khan Abrama chu sahai, sum le puan, rângachakhai a nei intamin a sân a’rchonga.

³Khan sim tiang ata irthonin Bethel hmun dênin a fea. Bethel le Ai khua kâra a phuta a puan in sungna hmun khan:

⁴a phuta a maichâm siamna hmuna khan RENGPA irhming sâmin a om nôka.

⁵Khan Lota, Abrama zuitu khom khan belra pâl, sehrât pâl le puan in a nei saa.

⁶Khan hmunkhata omsuam hrangin chu a ram a chîn tâk sikin; an neinunhai lak an pung pehai sikin, om suam thei ta mahaia.

⁷Khanchu Abrama sa enkoltuhai le Lota sa enkoltuhai kâra irsêlna a suak tâka; kha lai khan Kanaan mihai le Periz-hai khom, kha rama om an nia.

⁸Khanchu Abrama’n Lota kuanga khan, “Lungkham takin, nang le keima kâra ei sa enkoltuhai laia khom irsêlna ite om no ri se, ulenâi ei ni sikin.

⁹Ram irzât tak lak hin a iom mo ni ma? Lungkham takin keima kuang ata a bingin om ta ro: nangma vei tiang ni omin chu, keima chang tiang, nang chang tiang ni fe le keima vei tiang,” a tia.

¹⁰Khanchu Lota chu ram a en vêla, Zoar khua tiang pan balamin, Jordan phâizôl murdi chu RENGPA irhuan ang le Aigupta ram anga tui tamna hmun a nih ti an hriata; Sodom le Gomora khom kha RENGPA’N a la insiat mân kha a nia.

¹¹Khanchu Lota khan Jordan phâizôl kha an thang tâka; khan nisua tiang depin a oma; an irsen tâka.

¹²Abrama chu Kanaan rama khan a oma, Lota chu phâizôl khuaa a oma, a puan in chu Sodom khua dênin a son zêla.

¹³Khan, Sodom khua mihai chu RENGPA mithmua a satêrenga sual sin tho an nia.

¹⁴Khan Lota a bingin a om zoi ata chu RENGPA’N Abrama kuanga, “Thîrin lân, ni omna rengata sim, hmâr, nisua, nitâk envêl ro:

¹⁵ni ram hmu murdi hi nang le ni’rchihai a vuan ata kumkhuain nang pe ki ti.

¹⁶Khan ni’rchihai khom irnêng chunga la tam an ta, tûte itep zoi loiin om an ti.

¹⁷Thoiin lân ram hi a dung a khang irfang suak ro: nang ki ipêk hrang a ni,” a tia.

¹⁸Khanchu Abrama’n a puan in a sona, Hebron-a om, Mamre saso thing kôla khan omhmun a khuara; khataka khan RENGPA hrangin maichâm a siam ta.