Read Hrangkhol IRPHUTNA 15 Bible Online

IRPHUTNA 15 - Hrangkhol bible

IRPHUTNA 15

¹Kha zoiin chu Abrama kuang Pathianin, “Abram chi no ro, kei hi ni pho le lômman hlutak ki ni,” tiin RENGPA thu chu irmang angin an hriata.

²Khan Abrama’n, “O RENGPA Pathian, imo ni ni ipêk hrang, nâi nei loiin ki oma, ki’rchonhai khom hi Damaska khua mi Eliezera’n mo a ilua hrang ni ma?” a tia.

³Khan Abrama’n, “Irngai roh irchi ni pe mak chea: en roh ki ina suak hi kêng ki’rchon lua hrang a ini ta,” a tia.

⁴“Khan irngai ro, kha mi khan ni’rchon lua thei no ni; nangma rîla ra ngêtin kêng nir chon chu a ilua hrang,” tiin RENGPA thu an hriata.

⁵Khan pên tiang a hruaia, “Irvân khi en ro, ârsihai khi ni tep theiin chu tep ro, a tia. Khanchu RENGPA’N ni’rchihai chu khihai ang khin an la itam hrang a ni,” a tia.

⁶Khan RENGPA kha a iam zela; khanchu RENGPA’N a felna sikin mi iamomin a bêa.

⁷Khan a kuang, “Hi ram lua hranga Kaldaihai khua, Ur ata hruai suaktu RENGPA kha ki ni,” a tia.

⁸Khan Abrama’n, “O RENGPA itin mo ki ilua hrang ti ki inhriat thei hrang?” a tia.

⁹Khan ama khan, “Sehrât irla kum thuma le kêlpui kum thum mi le belrachal kum thum mi le vasu le phervalite ni hong chôi pe ta,” a tia.

¹⁰Khanchu a hong chôi pea, a laitaka a tuk tanhaia, phalkhatin a’rboptirhai vinga, vatehai chu tuk loiin.

¹¹Irmuhai saruak fâk hrangin an chuma khan, Abrama’n a le’nhnotpaihai ngai.

¹²Khan khohloi misa tâk tôn chu Abrama chu a inmusu tâka; khan irngai ro, zîng irkhêltak hin a hong zîng dela.

¹³Khan Abrama kuang Pathianin, “Ni’rchihai chu an ram ni loina hmuna chu mikhualin la om an ta, an sin an la itho pehai hrang a ni kha; kum 400 dengthei tuang an ta;

¹⁴khan an sintho pehai chungthu khom ngaitua ki ti: khanchu sumpuan tamtak neiin suak an ti.

¹⁵Nangma chu ni’rchibulhai kuang irtharngam takin fe ni ti, ni sam chuak vinga tarin nang phûm an ti.

¹⁶Khan irlo minlinahai khom hin hong an ta; Amor-hai sualna hi a la’rkip no sikin,” a tia.

¹⁷Khan, hiang hi a nia, misa a tâka rammual a hon thimin chu, irngai ro, meikhu senduk irzâmin kôlirtêk angin meichok luai luai inlôi a oma;

¹⁸kha nî tena chu RENGPA’N, “Hi ram hi, Aigupta Tui ata Tuipuilian (Eufrates) tui dênin ni’rchihai ki pêk ta,

¹⁹Ken-hai, Keniz-hai, Kadmonhai,

²⁰Hit-hai, Periz-hai, Refaim-hai,

²¹Amor-hai, Kanaan-hai, Girgas-hai le Jebus-hai khom ki pêk sa,” tiin Abrama kuanga thu a thung tâka.