Read Hrangkhol IRPHUTNA 2 Bible Online

IRPHUTNA 2 - Hrangkhol bible

IRPHUTNA 2

¹Kha zoiin chu irnêng irvân le a sûnga om hrang murdi siam zoi a ni tâka.

²Khanchu Pathianin sûn sari nî tena chu a thilsiam hranghai siam zoiin, a sûn sari nî chu a thilsiam mâkin a’rngam tâka.

³Khanchu Pathianin sûn sari nî sûn chu sat a vurin a ser ir-up tâka. Kha nî sûn chu Pathianin a thilsiamhai thu ringot le a kuta a isiamhai mâkin a’rngamsanhai tâk sikin.

⁴Irnêng le irvân siam dân chu hiang hin a ni, RENGPA Pathianin irnêng le irvân a siam lai khan.

⁵Irnênga sûl hringhai hi ite la om maka, irnênga anhringhai khom ite la mông thei maka. RENGPA Pathianin irnêng chunga rua a la’nthotir no sikin, irnêng tuk hrang mihriam khom an la om no sikin;

⁶khannisianlân irnêng ata sûm a hong suaka irnêng pumpui a bit zoi tâka.

⁷Khan RENGPA Pathianin irnêng pilin mihriam a siama, a hnâra hringna phûk a mût inlûta, khanchu mihriam kha mihriam hring a hong ni tâka.

⁸Khan RENGPA Pathianin nisua tiang Eden irhuan a siama; a mihriam siam kha an omtira.

⁹Khan irnêng ata RENGPA Pathianin thing satak tak le fâk thei zât tinrêng a inmôngtira, hringna thingkung a laitaka a inmôngtira, a sa le a sia inhriatna thing.

¹⁰Khan Eden irhuan ata tuidung, irhuan irziltir hrangin a inluangtira, khatak ata irsem darin, iva minliin a’rsem suak ta.

¹¹Inkhat irhming chu Pison a ni; Havila ram pumpui hual suaktu a ni, kha khan rângachak a oma;

¹²kha rama rângachak kha a satak a ni, kha khan Bedolak le berul lung khom a om.

¹³Vadung inhnina irhming chu Gihon a ni, hi hi Kus ram pumpui hualtu a ni.

¹⁴Vadung inthumna irhming chu Hiddekal a nia; Assuria ram nisua tianga luang a ni. Khan vadung minlina chu Eufrates a ni.

¹⁵Khan RENGPA Pathianin mihriam kha a hruaia, Eden irhuan enkola hrung hrangin a siaa.

¹⁶Khan RENGPA Pathianin mihriam kuang khan, “Irhuana thing murdi ra ni fâk thei ving ni inuam murdi,

¹⁷khan a sia le sa inhriatna thing ra hi chu ni ifâk hrang ni ma: ni fâkin chu, ni fâk nî sûn le zoro taka ni ithi ngêt hrang a ni,” tiin thu a pêka.

¹⁸Khan RENGPA Pathianin, “Mihriam a bing doka om chu a sa ti maka, ama chanpui hrangin, a’rhloppui thei hrang irhoi mi siam pe ki ti,” a tia.

¹⁹Khan RENGPA Pathianin, irnêng pilin ramsa tinrêng le chunglêng vahai tinrêng a siama; khan an irhmingin imo a iti hrang ti inhriatna hrangin Adama kuang a hruaihaia; thilhring murdi Adama kuanga hong murdi chu, a iti ang takin irhming an nei ving ta.

²⁰Khan Adama’n ramsa murdi, chunglêng vahai tinrêng irhming an neitirhai vinga; khannisianlân Adama chu a changpui hrang le a’rkoppui hrang ite a’rhloppui hrang om maka.

²¹Khanchu RENGPA Pathianin Adama kha inmu irhnik taka inzâlin an intira, a in kârin a kângru inkhat a lâk pea, kha irthûla khan taksa’n an bittir tâka;

²²Khan RENGPA Pathianin Adama ata a ilâk kângru kha nupangin a siama, Adama kuang a hruai tâka.

²³Khan Adama’n, “Hi ngêt hi keima ru ang ru neia, ki taksa anga taksa nei ngei chu a ni: Pasal ata lâksuak a ni sikin. ‘Nupang’ ti hrang ni a ti,” a tia.

²⁴Khasikin pasalin a nu le a pa masan a ta, a dôngma chel a ti: khanchu taksa pumkhat hong ni ta an ti.

²⁵Khan Adama le a dôngma kha korongboiin an oma, inzak ual mahai.