Read Hrangkhol IRPHUTNA 20 Bible Online

IRPHUTNA 20 - Hrangkhol bible

IRPHUTNA 20

¹Khan, Abrahama chu kha ram ata kha sim tiang a’rsona, Kades le Sur khua kâra omhmun a khuara, Gerar khuaa om pumin.

²Khan a dôngma Sari kha Abrahama’n, ki farnu a ni a tia: khanchu Gerar khuaa rêng Abimeleka’n mi a tîra, Sari a van hruaitira.

³Khannisianlân, Pathianin zâna a’rmangin Abimeleka kuang khan hiang hin a hrila, “Irngai ro, ni nupang hruai sikin mithi ni ni ta, mi dôngma kêng a ini,” a tia.

⁴Abimeleka’n chu la’rpôlpui maka: “Khanchu RENGPA mi felhai khom hih ni ithathai hrang ma ni?

⁵ama rengin ki nuchapa a ni a tia. Lungrîl fel le porinche loiin hi thu hi nang ki ihril a ni,” a tia.

⁶Khan Pathianin a’rmang tiang, “A lungrîl porinche loia hi thu hi ni iti a ni, nang kin hriat, keima khomin ki chunga sin saloi tho loi hrangin nang ki ikhap a ni; khasikin, hi nu hi inthem hrang khomin nang phal ma ung.

⁷Khasikin atûn zel mi dôngma kha pepai nôk ta ro; ama chu deipu kêng a ni, khan kêng nang chongchai pe a ta, ni hong idam hrang: ni pêk kîr nôk no’n chu ni ithi ngêt hrang a nih ti inhre ro, nang le ni inei murdihai le,” a tia.

⁸Khanchu Abimeleka chu zînga a thoia, a sin thotuhai a bukhai zita, anni inhriatin thil tung murdi a hrilhaia; khan mihaiin an chi tak taka.

⁹Khanchu Abimeleka’n Abrahama kha a koia, a kuang khan, “Kin chunga hin itho mo hiang sin hi ni itho? i ang sin mo ni chunga kin inchâina om, kei le kin khua kin tuihai chunga thil saloi tak ni hong intungtir hi? Thil tho loi hrangtak ni itho tâk hi,” a tia.

¹⁰Khan Abimeleka’n Abrahama kuang, “Imo ni ihmu, hi thil ni itho ngam hi?” a ti nôka.

¹¹Khan, Abrahama’n, “Hi kho sûnga hin Pathian chitna nei mi nin om viat no sikin, ki dôngma ki ti’n teh kei nin ni ithat ngam hrang a nih ti kin hriat sika a ni.

¹²Khakhêla, ka pa tianga ki farnu khom a ni. Ka pa farnu nâi a nia, dôngma’n ki inei a ni ta:

¹³khan hiang hi a nia, Pathianin ka pa in ata kin vâi lai khan, hiang hin ni lungthungna chu ki chunga ni inlangtir hrang a ni, ei tungna in hmun tina; ki nuchapa a ni, ni iti mai hrang a ni, ki iti pe tâk kêng,” a tia.

¹⁴Khan Abimeleka’n belrahai, sehrâthai le suaknu le suakpahai a hruaihaia, Abrahama kha a pêka, a dôngma Sari khom a pêk kîr nôka.

¹⁵Khan Abimeleka’n, “En ro, ram lian tak ki nei, ni iom nuamna taka om ro,” a tia.

¹⁶Khan Sari kuang khan, “En ro, ni nuchapa hi sum sângkhat ki pêk ta: a ni hmutuhai murdi mithmua, mi dikloi ni loiin, mi dik ni nih ti inhriatna hrangin, nangma chunga ite dik loina om ma,” a tia.

¹⁷Khanchu Abrahama kha Pathian kuang a chongchaia; khan Pathianin Abimeleka le a dôngma le a suakhai khan damna an chang zela; nâi an hong nei tâka.

¹⁸Abrahama dôngma Sari sikin Abimeleka in sûng mihai chu nâi boiin an iching tâk a ni.