Read Hrangkhol IRPHUTNA 22 Bible Online

IRPHUTNA 22 - Hrangkhol bible

IRPHUTNA 22

¹Khan, hiang hin a nia, zoro sôtloite hnunga chu, Pathianin Abrahama chu a fiaa, “Abrahama,” a tia; khanchu ama’n “Hin ki om,” a tia.

²Khan ama’n, “Ni nâi, ni nâikhât neisun, ni inrentak Isaka kha hruaiin lân, Moria rama khan fe ro, kha hmuna nang ki ihril hrang tâng inkhata khan hâlirvôm thilinhlan ro,” a tia.

³Khan Abrahama chu zînga a thoia, thing a tuka, a neinun pêlna sakuartung le a siahlo ompuihai inhni leh a nâi Isaka a hruaihaia; Pathianin a ihril pena tiang khan a fe tâka.

⁴Khan, sûn thum ni tena chu Abrahama kha a hong tanga, a fena hrang hmun chu hlavitin a la hmua.

⁵Khanchu Abrahama’n a siahlohai ruai kuang khan, “Hi hmuna hin sakuartung leh hin lei om roi, kei le nâipang hi so hmuna son va fe kin ta, Pathian chubai va mûk kin ta, kha zoiin nin kuang hong kîr nôk kin ti,” a tia.

⁶Khan Abrahama’n hâlirvôm thilinhlanna thing kha a lâka; a nâipa Isaka a’rputtira; ama’n mei le chemte chôiin a nâipa leh an fea.

⁷Khan Isaka’n a pa Abrahama kha hiang hin a ti pea, “Ka pa,” a tia; khan ama’n, “Ki nâipa hin ki om,” a tia. Khanchu Isaka’n, “En ro, mei le thing chu a oma; khannisian hâlirvôm thil inhlan hrang belra tuai teh khôn mo a om?” a tia.

⁸Khan Abrahama’n, “Ki nâipa, Pathianin ama ta hranga thilinhlan hrang chu a zoro taka ni pe a ti,” a tia. Khaang khan an irzui maia.

⁹Khan, Pathianin a inhrilna hmun chu an va tunga; Abrahama’n maichâm a siam irfûka, thing a tana a buka, a nâipa Isaka kha a khita maichâm chunga an zâltira.

¹⁰Khan, Abrahama’n chem an bana a nâipa thatna hrangin.

¹¹Khan, RENGPA vântirtônin irvân ata a zuan sama, “Abraham, Abraham,” a zuang tia: khan ama’n, “Hin ki om,” a tia.

¹²Khan Pathianin, “Nâipang chunga khan ni kut insum no’n lân, ite tôn viat no ro: ni nâi neisun khom pêk hrangin nin hroi ta no sikin, Pathian ni chi ti kin hriat ta,” a tia.

¹³Khan Abrahama khan a hnung a’rheia, a en vêla, a hnung tiang belrachal a’rki thinga inôk hi a ngîr pea; khanchu Abrahama’n belra kha a chela, a nâipa irthûlin hâlirvôm thilinhlanna hrangin a hmang tâka.

¹⁴Khasikin Abrahama’n kha hmun irhming kha Jehova Jire a phua tâka; a vuan sûn tena, RENGPA tânga ngaitua ni a ti, an iti ngai ang hin.

¹⁵Khan RENGPA vântirtônin voihnina irvân ata a zuan sam nôka,

¹⁶“Hi thil hi ni tho tâk sikin, ni nâi neisun nin hroi ta no sikin, sat nang vur ngêt ki ti.

¹⁷Irvâna ârsi zât le tuia chiai tam nêkin ni’rchihai la’npung ngêt ki ti, nir chihaiin an irdoipuihai kul mikot khom la nei an tih ti le.

¹⁸Ki hê ni lâk tâk sikin, ni’rchi lai ata rammuala chi tin vânsatna la dong an ti; mâni le mâni irtiin thu ki inkung a ni ta, RENGPA’N a ti,” a zuang tia.

¹⁹Kha zoiin chu Abrahama chu a siahlo pasal hnihai omna khan a kîr nôka, khanchu Beerseba khan Abrahama chu a om ngai tâka.

²⁰Khan hiang hi a hong nia, Abrahama kuang khan, “Irngai ro, Milkaii khomin ni sangpa Nahora kha nâi a neipui ta,” iti an hrila.

²¹A nâilutîr chu Uza a ni, a sangpa chu Buza a ni, Kemuela, Arama pa le;

²²Kheseda hai, Hazova hai, Pildasa hai, Jidlafa hai, Bethuela hai hi an nia.

²³Khan, Bethuela’n chu nâinupang Rebeki a neia, hi mi kiriathai hi Milkaii, Abrahama sangpa Nahora nâihai an ni.

²⁴Meithâinu irhming Reumi nu khomin Teba hai, Gahama hai, Tahasa hai, Maaka hai, a ineihai a ni.