Read Hrangkhol IRPHUTNA 24 Bible Online

IRPHUTNA 24 - Hrangkhol bible

IRPHUTNA 24

¹Khan, Abrahama chu a hong tar ok tâk sikin, RENGPA’N Abrahama kha bor tinrêng pêkin sat a vur tâka.

²Khan, Abrahama’n a siahlopahai laia, a in mihai laia a uliantak, a neinunhai chunga ircham neitu kuanga khan, “Lungkham takin ni kut kha ki teêl hnuaia hin thun ro;

³khanchu RENGPA irvân Pathian le irnêng Pathian irhming sâmin, ki omna rama Kanaan mi dôngmatehai hi ki nâipa Isaka dôngma inluatir hrangin ni iphal hrang ni mah:

⁴kin rama, ki sûngsuakhai kuanga fein ki nâipa Isaka dôngma ni izong pe hrang a ni,” a tia.

⁵Khan, a siahlopa khan a kuang, “Nupangnu hin hi rama om hrangin ni zui nuam ual ni moa? ni nâipa hi ni suakna ram tiang ki ihruai lût a inang kher mo?” a tia.

⁶Khan Abrahama’n a kuang, “Ki nâipa hi, kha rama khan chu hruai kîr nôk loi hrangin irdîn ro.

⁷RENGPA vân Pathian, ka pa kuang ata le ki suakna ram ni hruai suaktu le a ni donsuitu le, hi ram hi nir chihai la pehai ki ti,” a tia. Ki kuanga chong le’nkungtu hin, “Ama ngêtin a vântirtôn chu ni kôla inlôitir a ta, kha ni rengata chu ki nâipa Isaka dôngma ni inneitir hrang a ni.

⁸Khan, nupangin nang a zui nuam no’n chu, ki kuanga ni chonginkung ata ni izôk a ni, i khom nisianlân ki nâipa chu kha rama khan ni ihruai kîr nôk viat hrang ni ma,” a tia.

⁹Khanchu a siahlopa khan a kut chu a pu Abrahama teêl hnuaia a rola, hi thua hin chong an kung tâka.

¹⁰Khan a siahlopa khan a pu saringsei laia sômkhat a tuanghaia, a pu neinun sahai chôiin a fe ta: khanchu Mesopotamia ram Nahor-hai khuaa a fea.

¹¹Khan khohloi tiang dôngmatehai tui chôi zoro laitaka khan tuisunsuakna hmun kho kôla khan a saringseihai chu an kualtirhaia;

¹²Khan “O RENGPA, ka pu Abrahama Pathian, lungkham takin a vuan hin hlo nin chuktir ro, ka pu Abrahama chunga hin ni lungkhamna inlangtir roh.

¹³Ni en ro, tuikuang kôla omin, hi khuaa mi dôngmatehai tui chôi hrangin an izuang a ni:

¹⁴khan hiang hin ni sianlân, dôngmate tu kuang khom ni ri se, ‘Ki in theina hrangin lungkham takin nin tuibêl kha ni’rhnuai pe ro,’ ki tia. Khan ama’n, ‘In ro, ni saringseihai khom in hrang pe ki ti,’ titu ka chu, kha mi kha ni nâi Isaka hranga inkung ni ri se; khanchu kha nu kha ka pu chunga lungkhamna inlangtir ti kin inhriat thei hrang a ni,” a tia.

¹⁵Khan hiang hi a nia, a hril zoi mân reng, irngai ro, Abrahama nâi Nahora dôngma Milkaii nâipa Bethuela nâinu Rebeki chu a dârsuama tuibêl tiangin a hong suaka.

¹⁶Kha mi kha a hmêl khom a satak taka, dôngmate irthiang a nia, tu pasal khomin an la ichâipui dop loi a nia; tuikuanga a fea, a tuibêl inbitin a fe nôka.

¹⁷Khan, a siahlopa chu irtongpui hrangin an tâna, “Lungkham takin ni tuibêla tui kha nin intir ro ba,” a tia.

¹⁸Khan ama khomin, “In ro ba, ka pu,” a tia. Khan inrang takin tuibêla tui a kut leh luakin tui an intir tâka.

¹⁹Khan, tui a in zoiin chu, “Ni saringseihai khom tui an khop mâka chu tui chôi mai ki ti,” a tia.

²⁰Khan inrang takin a tuibêl kha an ronga, tui chôi hrangin tuisunsuak tiang a kîr nôka, saringseihai in hrangin tui a’rthak pehaia.

²¹Siahlopa khan a en maia, RENGPA’N a fe nasan hlo an chuk le chukloi inhriatna hrangin a dâihreka.

²²Khan, a saringseihai khom an khop ti an hriatin chu, siahlopa khan rângachak irthei a hnâra inkhâi zât le a kuta sum bânhrial inhni a kêlsuaa.

²³Khan a kuang khan, “Tu nâinu mo ni ini, nin hril theiin mo?. Ni pa inah kin riakna hrang hmun mo om ni?” a tia.

²⁴Khan kha nu khan a kuang, “Bethuela Milkaii nâipa Nahora hranga a inei pe nâinu ki ni,” a tia.

²⁵Khan ama ngêtin a kuang khan, “Fapôl le sa bu fâk hrang chu kin nei ngai, riakna hmun khom kin nei,” a ti pea.

²⁶Khanchu siahlopa khan a lu a suka, RENGPA chubai mûkin

²⁷khan, “Ka pu chunga chu a lungkhamna danglam ngailoi le a dikna khom irsamloi, RENGPA ka pu Abrahama Pathian chu inpâkin om ri se, kei khom hi RENGPA’N chu, ka pu urênghai in tiang a ni hruai a ni hi te,” a tia.

²⁸Khanchu dôngmatenu chu an tâna, kha thu kha a nu urênghai a hrilhaia.

²⁹Rebeki’n nucha a neia, a’rhming chu Labana a ni: khanchu Labana a suaka, tuikuang kôla mi ompa tiang a fea!

³⁰hiang hi a ni tâka, irthei le sum bânhrial a farnu kuta a hmua, “Mihaiin an ni irkôk sup supa,” a tia, a farnu Rebeki thuhril an hriatin chu, mihai kuang a fea, irngai roi, hi mi hi tuikuang kôla omin saringseihai leh khan.

³¹Labana’n, “Nang RENGPA satvur dongtu hongin lân, ki ina hong lût ro, itho mo pên tianga ni iom? in le saringseihai hrangin hmun ki sinsiam zoi ta kêng,” a tia.

³²Khanchu kha ina khan a lûta, Labana’n saringseihai neinun kha a sûta; khan saringseihai hrang fapon le bu anh a pêkhaia; an kehai irsûkna hrang tui a pêkhaia,

³³khan Abrahama siahlopa kuang khan, fâk hrang an dôn pea; khannisianlân, “Ki hongna bitak thu ki hril mâka ite fâk fa no ning,” a tia. Khan ama’n, “Hril ro,” a tia.

³⁴Khan ama’n, “Kei Abrahama siahlopa ki ni,

³⁵khan RENGPA’N ka pu chu a sate zelin sat a vura, mi irchongtak a nia: RENGPA’N a kuang belra rual, sehrât rual, sum tamtak, rângachak hai, siahlonu le siahlopahai, saringseihai tamtak a pêka.

³⁶Ka pu dôngma Sari’n a tar hnungin, ka pu nâipasal a neipuia! ama kuanga a inei a’rchon lua hrangtu a nia.

³⁷Khan, ka pu’n, ‘Ki omna ram Kanaan dôngmatehai hi ki nâipa dôngma’n ni inneitir hrang ni ma,’ a tia.

³⁸Ka pa in tiang, ki urêng le ki sûngsuakhai laia mi kêng a dôngma hrang ni inneitir hrang tiin chong a nin kungtira,

³⁹khan keima’n chu, ‘Nupangin a ni zui nuam no duaiin te’? ki tia.

⁴⁰Khan ama’n ki kuang, ‘RENGPA kuang ki omna hmun tina a vântirtôn chu ni kuang hong tîr a ta, ni ifena bi khom manchang nang insuatir ngêt a ti; khan kêng ka pa urênghai laia mi a dôngma hrang ni inneitir hrang a ni.

⁴¹Ki sûngsuakhai kuang ni tung tena kêng ki kuanga ni khomâk irsâm chong hi a irkât hrang, dôngmate nang an pêk no khomin ni khomâk irsâm chu irkât a ti,’ a tia.

⁴²“Khaangin, a vuan hin tuikuang chu ki hong itung a ni ta, O RENGPA, ka pu Abrahama Pathian, ki kalchôina hi hlo ni nin chuk pe hrangin chu,

⁴³en ro, tuikuang kôla ki om chian, hiang hin ni sian chu, dôngmate tui chôi hranga zuang tukhom ni ri se, ‘lungkham takin in hrangin nin tuibêla tui tômte ni pe ro,’ ki tia.

⁴⁴Khan ama’n ki kuang, in ro, ni saringseihai hrang khomin tui irthak ki ti, titu takin chu, ka pu nâipa hranga RENGPA’N nupang a inkung ni ri se, ki tia.

⁴⁵Ki lungrîla ki sua zoi mân reng Rebeki hi tuibêl chôiin a honga, tui a zu thâl zoiin a honga: khan a kuang, ‘Lungkham takin tui nin intir ro ba,’ ki tia.

⁴⁶Khan inrangtakin a tuibêla tui chu a thâla, a nin intira, ‘Ni saringseihai khom hi tui pehai ki ti,’ a tia. Khanchu tui ki ina ki saringseihai khom an ina.

⁴⁷Khan keima’n, ‘Tu nâinu mo ni ni?’ tiin ki’rdona. khan ama’n, ‘Bethuela Nahora nâipa Milkaii inei nâinu ki ni,’ a tia: khan hnâra bet zât chu kin bettira, sum bânhrial khom a kuta kin buntira.

⁴⁸Khan ki lu kûnin chubai ki mûka, RENGPA, ka pu Abrahama Pathian, ka pu sangpa nâinu hi a nâipa dôngma ni thei hranga lam dik ni’rhmutu kin pâka.

⁴⁹Khasikin atûn ka pu nin inrena, nin nuam pe hrangin chu nin hril roi; khan kêng ki vei tiang mo ki chang tiang mo ki ipan thei hrang,” a tia.

⁵⁰Khan Labana le Bethuela’n hiang hin an sâma, “Hi thil hi RENGPA bâia suak a ni hi te: a sia le a sa ite ni kuanga ti thei no ni ung.

⁵¹En roh Rebeki chu ni kôla om a ni, hruaiin lân, fepui ro, RENGPA’N a iti angin, ni pu nâipa dôngma chang ri se,” an tia.

⁵²Khan hiang hin a nia, Abrahama siahlopa khan an nuampui ti thu an hriatin chu, khûksadelin RENGPA chubai a mûk tâka.

⁵³Khan Abrahama siahlopa chu sumru irvôna hai, rângachak irvôna hai, puandiar sahai kêlsuain, Rebeki a pêka; a nuchahai le a nu khom thil man tam takhai a pêka.

⁵⁴Khan ama le a rualhai khomin an fâkin an nêka, an riaka; zînga an thoia, “Ka pu kuanga nin fetir ta roi,” a tia.

⁵⁵Khan a nuchapa le a nu’n, “Tôinu hi zoro sôtloite sûn sôm vêl chu la om ri se, kha zoi hong a ti,” an tia.

⁵⁶Khan ama’n an kuang khan, “Ni khap inhnung ta no roi, RENGPA’N ki hongna hi hlo a nin chuktir ta; ka pu kuang ki kîr thei nôk latna hrangin nin fetir ta roi,” a tia.

⁵⁷Khan anni khomin, “Tôinu chu koi ei ta ama la’rdon rei,” an tia.

⁵⁸Khanchu Rebeki kha an koia, “Hi mipa kuanga hin ni fe nuam mo?” an tia. Khan ama khomin, “O ki fe nuam” a tia.

⁵⁹Khanchu an farnu Rebeki le an tîrtônnu le Abrahama siahlopa le a rualhai chu an fe an phalhaia.

⁶⁰Khan, Rebeki chu bor a pêka, a kuang khan, “Kin farnu nang chu a sîng a sâng tamtak nu hong ni’n lân, nir chihai khom a doituhai ram khom lua zit ri sehai,” an tia.

⁶¹Khanchu Rebeki chu a thoia, a siahlonu le saringsei chunga chuangin, kha mi kha an zuia. Khaang khan Abrahama siahlopa’n Rebeki kha a hruaia, a fepui ta.

⁶²Khan Isaka chu Berla-hai-roi tiang ata a lei honga, sim tianga om a ni sikin,

⁶³khan Isaka chu khohloi tiang chu kholâi a va chaia: rammual a hei thîr vêla, en ro, saringseihai hong a hmua,

⁶⁴khan Rebeki’n Isaka a hei hmu’n chu, a saringsei ata a chum thâka.

⁶⁵Khan Abrahama siahlopa kuang khan, “So phâia a ni don hranga hong so tu ma ni?” a tia. Khan siahlopa khan, “Ka pu a ni so te,” a tia: khanchu irkhûna puan a lâka a sil irkhum nôka.

⁶⁶Khan siahlopa khan a va itong murdi chu Isaka kha a hrila;

⁶⁷khan Isaka’n Rebeki chu a nu puan ina a hruaia, Rebeki chu a lua tâka; a dôngma a ni ta; khan a sate’n lung a thunga; khasikin Isaka chu a nu thia beidong khom kha a’rtha a’rngam pe ta.