Read Hrangkhol IRPHUTNA 25 Bible Online

IRPHUTNA 25 - Hrangkhol bible

IRPHUTNA 25

¹Khan, Abrahama’n dôngma dang a neia, a’rhming chu Keturi a ni.

²Khan ama leh hin Zimrana, Joksana, Medana, Midian, Isbaka le Suaha a neipuia.

³Khan Joksana’n nâipasal Seba le Dedana a neia. Khan Dedana nâipasalhai chu Asur-hai, Letus-hai, Leum-hai an ni.

⁴Khan Midian nâipasalhai chu Efa, Efera, Hanoka, Abida le Elda-hai an ni. Hihai murdi hi Keturi nâihai chu an ni.

⁵Khan Abrahama’n chu a inei murdi Isaka a pêk vinga,

⁶nu dang leh a nâihai chu a dam laiin lômmanin thil a semhai; Isaka mithmua nâi danghai chu sim tianga rama om hrangin a tîrhai ta.

⁷Khan Abrahama dam sûng kum chu 175 a nia.

⁸Khan Abrahama chu tar lupôl bianga damin a thi ta, a’rchipuihai kuanga hruaiin a om ta.

⁹Khan, a nâi Isaka le Ismaela’n Hit mi Zohara nâipa Efrona loia Mamre irdîna Makpela khura an phûm ta;

¹⁰hi loi hmun hi Abrahama’n Hit mihai kuanga a irchôk a ni: hi hmuna hin Abrahama le Sari chu phûmin an om ta.

¹¹Khan hiang hi a nia, Abrahama a thi zoiin chu Pathianin a nâipa Isaka chu sat a vura; khan Isaka chu Beer-lahai-roi kôla a oma.

¹²Khan, hihai hi Abrahama nâipa Ismaela, Sari suaknu, Aigupta mi Hagari’n Abrahama irchi hranga nâihai chu an ni:

¹³an irhming le an irchi ang taka Ismaela nâipasalhai chu an ni: Ismaela nâilutîr tak chu Nebaiota a nia; a sanghai chu Kedara, Adbeela, Mibsama,

¹⁴Misma, Duma le Masa, an ni;

¹⁵Hadada le Tema, Jetura, Nafisa le Kedema-hai an ni:

¹⁶hihai hi Ismaela nâihai chu an ni, an khua le an omna hmun ang zêla irziak a ni, an irchi ang takin chu rêng sômkhat inhni an ni.

¹⁷Khan, Ismaela dam sûng kum chu, kum 137 a ni: khanchu a thi tâka, a’rchihai kuang hruaiin a om tâk a ni.

¹⁸Khan a nâihai chu Havila ram ata Assuria ram panin Aigupta ram irdîn Sur dênin an oma.

¹⁹Khan, hi hi Abrahama nâipa Isaka irchihai chu an ni.

²⁰Isaka’n Padana-ram-ah mi Suria mi Bethuela nâinu Labana farnu Rebeki leh an irlua lai hin kum 40 mi a nia. (Padana ti chu Mesopotamia ram le hmunkhat a ni.)

²¹Khan, a dôngma kha nâi nei loiin a chinga, khasikin Isaka’n RENGPA kuanga nâi a zong pea. Khan, RENGPA’N a zongna chu sat a vura, a dôngma Rebeki chu an râi tâka.

²²Khan a nâi vonghai chu a phîng sûnga an irsuala; khan ama’n chu itho mo hianga om hrangin teh ki hringa? a tia, khanchu RENGPA irdon hrangin a fea.

²³Khan RENGPA’N a kuang khan, “Ni sul sûnga khan mi nam hni an om, nangma sûnga ngêt mi nam hniin irsen an ti: nam khat hrât a ta, nam khat dok a ti: khan, a ulian ualpu khan a sangpa sin tho pe a ti,” a tia.

²⁴Khan, a nâi nei zoro a hong nâiin chu, a sûnga khan inphîr an nia.

²⁵Khan a nâi ulian ual chu a senin, puan irmul anga irmul neiin a suaka; khanchu a’rhming khom Esaua an phuaa,

²⁶kha zoiin chu a sangpa a hong suak nôka, a kut leh Esaua keârtui a chela; khanchu a’rhming khom Jakoba an tia; khan Rebeki’n annihai a nei zoro hin Isaka chu kum 60 mi a ni.

²⁷Khan nâipanghai kha an hong lian tâka, Esaua chu sa kâp thei mi a nia; Jakoba rêk chu mi phûkdâi, puan ina om ngai a nia;

²⁸khan Isaka chu sakhi hme fâk ngai a ni sikin, Esaua chu a’rngaiinat uala; Rebeki’n chu Jakoba a’rngainat uala.

²⁹Khan, Jakoba’n sûn khat chu bu anh a lei suanga, khan Esaua chu ram ata châmsôl irveiin a hong lûta:

³⁰khan Esaua’n Jakoba kuang khan, “Lungkham takin ni bu anh suang kha nin netir ro ba; a sân ki sôl tâk,” a tia. Khasikin kêng a’rhming khom Edoma an iti a ni.

³¹Khan Jakoba’n, “Ni nâilutîr nitna nir chotir bak ro,” a tia.

³²Khan Esaua’n, “Irngai ro, ki ithi va vâng kêng a ni ta, ki nâilutîr nitna ringotin ite a’rfena om ma!” a tia.

³³Jakoba’n, “Ki kôla khomâk irsâm bak ro,” a tia. Khanchu khomâk a’rsâm tâka; a nâilutîr nitna chu Jakoba kuang a zuar tâka.

³⁴Khan, Jakoba’n Esaua kha bai le a dâl suang kha a pêka; khanchu a fâkin a nêka, kha zoiin a thoia, a fe ta: hiang hin Esaua’n a nâilutîr nitna hi ite bea a ibe loi a ni.