Read Hrangkhol IRPHUTNA 27 Bible Online

IRPHUTNA 27 - Hrangkhol bible

IRPHUTNA 27

¹Khan hiang hi a hong nia, Isaka a tar tâka, ite hmu thei loiin a om tena chu a nâi Esaua a koia, a kuang, “Ki nâipa,” a tia. Esaua khan, “Hin ki om,” a tia.

²Khan Isaka’n, “Irngai ro a sân ki tar ta, ki thi hrang ni lak inhre ma ung;

³khasikin atûn hin lungkham takin ni timmatuahai, chôiin lân ram va chai ro, sakhi ni va kâp pe roh.

⁴Ki thi mân ngêt sat nang ki vur theina hrangin, ki indu tak anh suangin lân nin fatir ro,” a tia.

⁵Khan Isaka’n a nâipa Esaua a chongpui lai chu Rebeki’n a lei inhriata, khan Esaua chu sakhi kâp hrangin ram chai a fe tâka.

⁶Khan, Rebeki’n a nâipa Jakoba kuang, “Irngai ro, ni pa’n chu ni upa Esaua kuang

⁷sakhi ni va kâp pe’n lân ki thi mân nin fatirin lân, Pathian kuang sat nang ki vur theina hrangin nin fatir ro, a iti kin hriat.

⁸Khasikin, ki nâipa atûn hin thu nang ki pêk ang takin ki hê la’nlân,

⁹ni kêlhai laia va fe’n lân, a sa, a mar inhni hong chôi ro, khanchu ni pa indu lam takin nang suang pe ki ta:

¹⁰khan a thi mân ngêta sat nang a vur theina hrangin, fâk hrang kha ni pa ni va ipêk hrang a ni,” tiin a hrila.

¹¹Khan, Jakoba’n a nu Rebeki kuang khan, “Irngai ro, ka upa Esaua chu mul tama irmul a nia, keima lak irmul ma ung.

¹²Ka pa’n ni le’nthem a ta a huang kêng ki ichang hrang, satvur dong nêkin khosâl tongin kêng omna ki ti,” a tia.

¹³Khan, a nu’n a kuang khan, “Ki nâi ni khosâl tong hrang chu keima’n la chang rong: ki hê lâkin lân ni va la pe ro,” a tia.

¹⁴Khanchu a fea, a va lâk pea; khanchu a nu’n a pa indu lam takin a suang pea.

¹⁵Khan Rebeki’n a upa silkai satak, in sûnga om kha a lâka, a nâipa Jakoba an nghâktira;

¹⁶khan kêl mulhai kha a kut leh a ring vêla an khop pea;

¹⁷khan a anh suang le bai kha Jakoba a pêka.

¹⁸Khan a pa kuang a fea, “Ka pa,” a tia. Khan ama’n, “Ki nâi hin ki om, ki nâi tu khôk mo nin ini?,” a tia.

¹⁹“Ni nâi ulianpa Esaua ki ni, ni ni itîr ang khan ki tho zoi ta: lungkham takin thoiin lân, sat ni vur hrangin, ki sakhi hme hi fa ta ro,” a tia.

²⁰Khan Isaka’n a nâipa kuang khan, “Ki nâi itina mo ni va man inrang bâka?” a tia. Khan, ama’n, “RENGPA ni Pathianin hlo a nin chuka a ni,” a tia.

²¹Khan Isaka’n Jakoba kuang khan, “Ki nâi lungkham takin ni hong nâi ro, nang le’nthem rong, ki nâi Esaua chu ni inih ma ni,” a tia.

²²Khan Jakoba’n a pa Isaka a va nâia; a le’nthema, “A’rhâi chu Jakoba a nia, a kut chu Esaua kut a nia,” a tia.

²³Khanchu a upa Esaua kut angin a’rmul pe sikin inhre thei maka; khanchu sat a vur tâka;

²⁴khan “Ki nâipa Esaua lele chu ni ni mo?” a tia. Khan ama’n, “O ki ni lele,” a tia.

²⁵“Ni hong nai ual ro, khan kêng sat nang ki vur theina hrangin ni sakhi hme kha fa ta ki ti,” a tia. Khan a pêka, a fâk tâka: Uain khom a pêka a in tâka.

²⁶Khan a pa Isaka’n a kuang khan, “Ki nâipa hong nâiin lân ni tum ro,” a ti pea,

²⁷khan a va nâia a tuma; khan ama’n a silkai mirim inhriatin sat a vur tâka. “Irngai ro, ki nâipa mirim hi RENGPA satvurna ram mirim ang a ni:

²⁸Khanchu Pathianin irvân irdo leh irnêng satna le, bu tamtak le uain tamtak nang pe ri se:

²⁹nam tinin ni sin thohai sianlân; chi dang danghaiin chubai nang mûk ri sehai. Ni urênghai laia rêng angin omin lân; ni nu nâihaiin chubai nang mûk ri sehai: Khua nang sâltu chu khosâlin om sianlân, sat nang vurtu chu satvurin om ri se,” a tia.

³⁰Khan, hiang hi a nia, Isaka’n Jakoba sat a vur zoiin chu Jakoba chu a pa kuang ata a lei suak zoi chakin, a upa Esaua chu sakhi sa pêlin a hong tunga.

³¹Ama khomin irhnik takin a suang pea, a pa kuang a hong chôia; a pa kuang khan, “Ka pa thoiin lân, satvurna ni pe hrangin, ni nâipa sakhi anh suang hi fa ta ro,” a tia.

³²Khan a pa Isaka’n a kuang khan, “Tu mo ni ni?,” a tia.

³³Khanchu Isaka chu a satêrenga inthingin a oma, “Sakhi kâpa, ki kuanga a hme hong chôia, ni hong tung mân ki lei fâka sat ki lei ivur tâk kha tu mo nin ini tâk? a ni khate, ama lak satvurin a lei iom hrang kêng a ni ta,” a tia.

³⁴Esaua’n a pa thuhril kha an hriatin chu a milung siat chita inhriatin a chap khup khup a, a pa makunga khan, “O ka pa, kei hi, keima khom hi sat ni ni ivur ngêt hrang kêng,” a tia.

³⁵Khan ama’n, “Ni sangpa’n a ni hong huanga, nangma dongtum satvurna chu nang a isutpai tâk kêng,” a tia.

³⁶Khan Esaua’n chu, “A’rhming khom Jakoba an tia, nin phua indik chu a ni hi te? hi voihni a ni khêl ta; ki nâilutîr nitna khom a ni lâk pea, irngai ro, atûn hin, ki satvur dongtum a ni sutpai nôk a ni ta,” a tia. Khan ama ngêtin, “Satvurna chu ni hôi viat ta mak che mo?” a tia.

³⁷Khan Isaka’n hiang hin a tia, Esaua kuang khan, “Irngai ro, ama chu nangma rêng ni hrangin ki siama, a urêng murdihai khom a sinthotu hrangin ki pêk ta; bu le uain khom nei tah a ta; ki nâipa nangma hrangin imo nang ki ipêk ta hrang,?” a tia.

³⁸Khan Esaua’n a pa kuang khan, “Ka pa satvurna chu inkhat vai mo a ini? O ka pa kei khom satvurna chu nin dong ngêt ro,” a tia. Khan, inring takin Esaua chu a chapa.

³⁹Khan a pa Isaka’n a kuang khan, “Irngai ro, ni omna hrang chu irnêng sa chu hlataka, le irvân irdo khom hlataka, a iom hrang a ni.

⁴⁰Ni chemin a ni, ni ihring hrang a ni, ni sangpa sin ni hong itho pe hrang a ni, khan, hiang hin, ni zoro hnungkhôn tiang chu a ringkol chu ni ring ata ni ipai hrang a ni,” a tia.

⁴¹Khan a pa satvurna sikin Esaua’n chu Jakoba kha en nuam ta maka; Esaua lungrîlin, “Ka pa lak idôr dam sôt ta no nia, a thi zoiin chu ki sangpa Jakoba chu thatpai ki ti,” a tia.

⁴²Khan Esaua thuhril chu Rebeki an inhrila; khanchu mi a tîra, Jakoba an koitirhaia; a kuanga khan, “Irngai ro, ni upa Esaua’n ni chungchânga hin, nang that hrang tumin a om mai a ni.

⁴³Khasikin, ki nâipa ki hê hi la’nlân, atûn thoiin lân, Haran khuaa ki nuchapa Labana kuang rot ta ro;

⁴⁴ni upa ningmur a chum mâka chu a kuang lei va om ro;

⁴⁵ni upa ningmur hi a chum tena, ni chunga a ithotum a’rnghil tena. Mi hong tîrhai ki ta; nang hong hruai nôk an ti. Itho sikin mo nin ruaia sûn khat sûngin nangni ki itheisam hrang?” a tia.

⁴⁶Khan Rebeki’n Isaka kuang khan, “Hit nâinuhai nun hi ki hnônghai: Jakoba hin hiang rama dôngmate Hit nâihai ang hi dôngma’n a neihaiin chu keima hrangin ite a’rfêna om no ni” a tia.