Read Hrangkhol IRPHUTNA 29 Bible Online

IRPHUTNA 29 - Hrangkhol bible

IRPHUTNA 29

¹Kha zoiin chu Jakoba chu a fe zêla, nisua tianga mihai omna hmun a tunga.

²Khanchu a hei en vêla, hmun ôla khan tuisunsuak hi a oma, a kôla khan belra pâl thum hi an oma; kha tuisunsuak ata belrahai kha tui an pêkhai ngaia; tuisunsuak fena lama lung lianpa a oma.

³Kha hmuna khan belrahai an irbukkhôm ngaia; khan tuisunsuak kôla lung chu an khâi pehaia, belrahai tui an pêkhaia. Lung leh khan an tuisunsuak kha an khâr pehai nôka.

⁴Khan Jakoba’n an kuanga khan, “Urênghaio, kho tianga mi mo nin ini,” a tia. Anni khan, “Haran khuaa mi kin ni,” an tia.

⁵Khan an kuang khan, “Nahora nâipa Labana kha nin inhriat mo?” a tia. Anni khan, “O kin inhriat,” an tia.

⁶Khan ama’n an kuang khan, “A dam laitak chu ma ni?” a tia. Anni khomin, “O a dam laitak a ni, va en roh a nâinu Rakili khom belra pâl hruaiin a hong mai,” an tia.

⁷Khanchu ama khan, “Irngai roi, misa lak a la’rsânga, an lûthai zoro la ni ma, belrahai hi tui in intirhai unglân, van suahai nôk roi,” a tia.

⁸Khan anni khan, “Thei ta no ni ung, belrahaiin tuisunsuak kôla lung irkhârna hi kêlhaiin an bingin an inhlumpai mâka chu, a’rhlum zoi le vai kêng tui kin in intir theihai hrang a ni,” an tia.

⁹Annihai leh an chong lai takin, Rakili chu a pa belrahai hruaiin a hong tung tâka.

¹⁰Khan hiang hi a nia, Jakoba’n a nu nuchapa Labana nâinu Rakili le, a nu nuchapa Labana belrahai a hmu’n chu, Jakoba’n a va panhaia, tuisunsuak kôla lung inkhâr kha an hlum paia, a nu nuchapa belrahai tui an intirhaia.

¹¹Khan Jakoba’n Rakili kha a tuma, in ring takin a chap ta.

¹²Khan Jakoba’n a pa tupa a ni thu le Rebeki nâipa a nih ti Rakili kha a hrila; khan Rakili chu an tâna a pa a va hril tâka.

¹³Khanchu hiang hi a nia, Labana’n a farnu nâipa Jakoba thurchi an hriatin chu, a don hrangin a van tân zôia, pominkuain a tuma, a in tiang a hruai tâka. Khan Jakoba khan thil murdihai kha Labana kha a hril pe vinga.

¹⁴Labana’n a kuang khan, “Khano’nte ki thisen kêng ni ni hi te,” a tia: khan tha khat a kuang khan a om tâka.

¹⁵Khan, Labana’n Jakoba kuang khan, “Ki tupa ni nih sikin a man boi rengin mo sin ni itho hrang? idôr mo ni hlo nuam? nin hril roh,” a tia.

¹⁶Khan Labana’n nâinupang inhni a neia: a uliannu irhming chu Leaii a nia, a nâipang ualnu chu, Rakili a ni.

¹⁷Khan Leaii chu a mit a pôla, Rakili chu mi intuai demnaboi hmêl satak a ni.

¹⁸Khan Jakoba’n Rakili hi an dit uala. Khanchu, “Ni nâi nâipangnu Rakili hi a lua ki nuam sikin kum sari ni sinthoin samâk chang ki ti,” a tia.

¹⁹Khan Labana khomin, “Mi dang lua nêkin chu ama ki inluatir hi kêng sa ual a ti duah: khasikin ki kôla om mai ta ro,” a tia.

²⁰Khanchu Jakoba chu Rakili neiin kum sari samâk a chang tâka; a indit tak a ni sikin zoro sôtnote angin a bê tâka.

²¹Khan Jakoba’n Labana kuang khan, “Ki’rpôlpui theina hrangin ki dôngma chu ni pe ta ro, a kum khom a chuk tâk sikin,” a tia.

²²Khanchu Labana’n a khuaa mihai koi khômin hruai an thepui tâka.

²³Khan hiang hi a nia, a zîng a hong irphut le chu a nâinu Leaii kha a hruaia; Jakoba kuang a hruai lûta, a pêka, khan Jakoba’n a lei irpôlpui tâka.

²⁴Khan Labana’n a siahlonu Zilpaii chu a nâinu Leaii suak hrangin a pêka.

²⁵Khan, hiang hi a hong nia, zîng khua a vârin chu Leaii kha kêng a ni pe tâka; khanchu Jakoba chu Labana kuang khan, “Ki chunga ni thil tho hi imo a omzia a ini tâk? Rakili lua hrangin samâk ki ichang mo ni ma? Itho sika ni ni ihuang mo?” a tia.

²⁶Khanchu, Labana’n, “Kin rama hin hianga nâipang ualin an uhai khêl hi dân a ni no sikin.

²⁷A unu ata sûn sari hi ser zoi unglân, kha zoi ata chu mi dang khom ni lua nôk thei,” a tia.

²⁸Khanchu Jakoba khomin kha dân zômin a oma, sûn sari a ser zoi hnungin; a nâinu Rakili chu a dôngma hrangin a pêk nôka; kum sari dang samâk chang nôk hrangin.

²⁹Khan Labana’n a siahlonu Bilhaii chu a nâinu Rakili suaknu chang hrangin a pêka.

³⁰Khan, Rakili khom a’rpôlpui tâka, Leaii nêk khomin an dit ual a nia, Labana sintho hrangin kum sari dang samâk a chang nôk ta.

³¹Khan, RENGPA’N Leaii chu hmumâk a om ti inhriatin, nâi nei tamna hrisêlna a pêka, Rakili chu nâi boiin chingin a oma.

³²Khan Leaii chu an râia, nâipasal a neia, a’rhming chu Reubena a tia: “RENGPA’N ki dengtheizia a ni hmu sika a ni; atûn ata chu ki pasalin lung ni thung ta a ti,” a tia.

³³Khan an râi nôka, nâipasal a nei nôk tâka; “RENGPA’N hmumâkin ki om ti an hriat sikin hi nâi khom hi a ni ipêk a ni,” a tia, a’rhming khom Simeona a tia.

³⁴Khan, an râi nôka, nâipasal a nei nôka; “Atûn chu nâipasal inthum ki neipui tâk sikin, ki pasalin ni donsui nuam ta a ti,” a tia; khasikin a’rhming khom Levia a tia.

³⁵Khan, an râi nôka nâipasal a nei nôka, “Atûna nâi hi chu RENGPA inpâkna’n hmang ki ti,” a tia. Khasikin a’rhming khom Juda a tia; kha zoiin chu nâisalu a bâng ta.