Read Hrangkhol IRPHUTNA 3 Bible Online

IRPHUTNA 3 - Hrangkhol bible

IRPHUTNA 3

¹Khan RENGPA Pathianin ramsa a isiam murdi laia mirûl hi a vâr irlet tak a nia. Khanchu mirûlin nupangnu kuang khan, “Pathianin irhuana thing rahai hi nin ifâk hrang ni mah a iti ma ni?” a tia.

²Khan nupangnu khan mirûl kuang, “Ti ma, irhuana thing rahai hi kin fâk thei,

³irhuan lâitaka thing ra hi chu Pathianin, ‘Nin ifâk hrang ni ma, an them khom nin inthem hrang ni ma, nin inthema nin fâkin chu nin ithi hrang kêng;’ a iti a ni,” a tia.

⁴Khan mirûlin nupangnu kuang khan, “Thi viat no chin ni;

⁵nin fâk nî renga khan nin mit hong vâr a ta, a sia le a sa inhriatin Pathian hong ang nin ta, ti Pathianin nangni a inhriat chian a ni khate,” a tia.

⁶Khanchu nupangnu khan thing ra kha fâk thei zât a nih ti le mit lâktak a nih ti le, mihai invârtir theitu thing ra irzukom tak a nih ti an hriatin chu, a ra senkhat irhmalin a fâk tâka; khan, a pasal khom a pêka a fâk sa tâka.

⁷Khanchu an ruaiin an mit a hong vâra, korongboi an nih ti an irhriat suak tâka; khanchu theipui hnâ insui irkopin puanbom hrangin an siam tâka.

⁸Khan, RENGPA Pathian chu irhuan enin chohnung misa dâia a zuang irhâi an inhriata; khanchu Adama le a dôngma chu irhuana thing kâra RENGPA Pathian kha an le’rbîksan pe tâka.

⁹Khan, RENGPA Pathian khan Adama kha a koia, a kuang, “Adama khôn mo ni iom tâk? a tia.

¹⁰Khan ama khan, “Irhuana ni’rhâi kin hriata, korongboia om ki nih sikin, ki chi tâka; khasika khan ki irbîk tâk a ni,” a tia.

¹¹Khan, ama khan, “Korongboi ni nih ti tu’n mo nang a inhril? Thei ra faloi hrang tia nang ki ihril kha ni ifâk tâk ma ni?” a tia.

¹²Khan Adama’n, “Keima ni ompui hranga nupang ni ni ipêk khan thei ra a ni pêka, ki ifâk tâk a ni,” a tia.

¹³Khan, RENGPA Pathianin nupang kuang khan, “Ni sintho hi itinlama mani tâk?” a tia. Khan, nupangnu’n, “Mirûlin a ni huanga, ki ifâk tâk a ni,” a tia.

¹⁴Khan, RENGPA Pathianin mirûl kuang khan, “Hi thil hi ni tho tâk sikin ramsa le sa murdi laia le ramsa tinrêng laia chu khosâl tongin om bîk ni ta, ni boka irvâkin fe hen ni ta, ni hring sûngin vâiphin ni ifâk hrang a ni.

¹⁵Khan, nang le nupang hi nangni irdoitir ki ta, ni’rchihai le a’rchihai khom la’rdoitir ki ti: kha khan ni lu zêmirnôitir a ta, nangin a ke ârtui lei inchuk pe ni ti,” a tia.

¹⁶Nupangnu kuang khan, “Ni dengtheina le ni nâi vongna kha a saterengin nang inpungtir pe ki ta; intak takin nâi nei ngai ni ta; khannisianlân ni nuamlam chu ni pasal tiang ni a ta, ama khan ni chunga ircham nei ngai a ti,” a tia.

¹⁷Khan, Adama kuang khan, “Ni dôngma thu ni zôm ta, thing inkhat, ‘A ra ni ifâk hrang ni mah’ tia thu nang ki ipêk kha, a ra ni fâk sikin irnêng hi nangma sikin khosâl tongin a iom tâk a ni; ni dam sûngin intak taka sinin a ra kha fa ta ni ti.

¹⁸Ilhling le hloisûlhai khom nang inpung pe ki ta; khan, irnênga ansûl hloihna fâkin om ta ni ti.

¹⁹Khan, irnênga ni kîr nôk mâka chu ni hmâia irthântui luang zon zonin bu ne ta ni ti; irnêng pil ata lâksuak ni ni sikin: Pil ni nia, pila dên ni ikîr nôk hrang a ni,” a tia.

²⁰Khan, Adama khan a dôngma kha mihring murdihai nu a ni sikin a’rhminga Evi a tia.

²¹Khan, RENGPA Pathianin Adama-hai sangram hrangin savun songkol irfualhai a siam pehaia, a innghâktirhai a ni.

²²Khan, RENGPA Pathianin, “Irngai roi, mihriam chu a siat le sa inhriatin einihai ang an hong ni ta; atûn chu a kuta inbanin, hringna thing ra irhmala fâkin, kumkhua’n hring rôi a ti,” a tia.

²³Khasikin RENGPA Pathianin ama a ilâk suakna irnêng pil tuk hrangin Eden irhuan ata a tîrsuak tâk a ni.

²⁴Khanchu, mihriam kha an hnotsuak tâka; khan, hringna thing lampui kha enkol hrangin Eden irhuan nisua tiang pang cherubhai le mei khandai irvêl lop lop kha an omtir tâka.