Read Hrangkhol IRPHUTNA 30 Bible Online

IRPHUTNA 30 - Hrangkhol bible

IRPHUTNA 30

¹Khan Rakili’n chu Jakoba leh nâi nei thei loiin an om ti an hriat suakin chu, a unu a hnarsa tâka; Jakoba kuang khan, “Nâi ni pe ro, khano’nchu, ki ithi hrang kêng,” a tia.

²Khanchu Jakoba chu voikhat zelin Rakili chunga a ning an mur pea; “Ni rîla ra phal loitu Pathian mo ni ni sôn?” a tia.

³“En ro, ki siahlonu Bilhaii hi irpôlpuiin lân, khan kêng nâi nei a ta, ama ata nâi ki nei theina hrangin ki malchunga hin nâi a inei hrang a ni,” a tia.

⁴Khanchu a siahlonu Bilhaii chu a dôngma hrangin a phala, khan Jakoba’n a’rpôlpuia.

⁵Khan Bilhaii khan Jakoba leh nâipasal an nei ta.

⁶Khan Rakili’n, “Pathianin a ni ngaituaa, ki’rhâi inhriatin nâipasal a ni ipêk a ni,” a tia: khasikin a’rhming khom Dana a tia.

⁷Khan Rakili suaknu Bilhaii chu an râi nôka, Jakoba kha nâipasal dang a neipui nôka,

⁸khan Rakili’n, “Pathian irbuanpui angin ka unu ki’rbuanpuia, kin hnê ta,” a tia. Khanchu a’rhming khom Naftalia a ti ta.

⁹Khan Leaii chu nâi dang khom nei ual loiin a la om mai iti a’rhriat suaka, a siahlonu Zilpaii chu a hruaia Jakoba dôngma hrangin a pêk nôka.

¹⁰Khanchu Leaii siahlonu Zilpaii leh nâi an nei nôka.

¹¹Khan Leaii chu “A sân ki dormu a sa!” a tia: a’rhming khom Gada a phua ta.

¹²Khan Leaii suaknu Zilpaii khan Jakoba leh nâipasal dang a neipui nôka,

¹³khan Leaii chu “A sate’n ar iama, nupanghaiin a sân ar iam ta ni ti an ti,” a tia; a’rhming khom Asera a phua ta.

¹⁴Khan bu ât laitakin Reubena’n an loia khan Zolaidi a hmua, a nu Leaii a pêka; khanchu Rakili’n, Leaii kuang khan, “Lungkham takin ni nâipa Zolaidi ni sem ro,” a tia. (Zolaidi omzia chu hloi chi khat, irnêng insatirna le hur, nghalna’n, an hmang ngai a ni.)

¹⁵Khan a kuang khan, “Ki pasal ni ni irchupui lua hi a tôm mo ni insit? ki nâipa Zolaidi khom hi mo nir chupui ni la itum?” a tia. Khan Rakili khan, “khano’nchu, ni nâipa Zolaidi irthûl hin a vuan zân nang zâlpui nôk a ti,” a tia.

¹⁶Khan khohloi tiang chu Jakoba loi hong tung chu Leaii’n a va dona, “A vuan zân ni ni irpôlpui hrang kêng ki nâipa Zolaidi leh nang ki’rchôk tâk,” a tia. Khanchu zâna chu hmunkhatin an zâl suam tâka.

¹⁷Khan Pathianin Leaii chongchaina chu a sâma, an râi nôka, Jakoba nâi ringana a neipui nôk ta.

¹⁸Khan Leaii’n chu “Ki siahlonu chu ki pasal kuang ki pêk sikin, Pathianin lômman a ni ipêk a ni ta,” a tia: khanchu a’rhming khom Isakara a phua ta.

¹⁹Khan Leaii chu an râi nôka, Jakoba chu nâipasal kiruk a neipui nôka,

²⁰khan Leaii’n, “Pathianin irchonhlu a ni ipêk a nih a tia; atûn ata chu nâipasal kiruk ki neipui tâk sikin ki pasal khom ki kôla om nuam ta a ti,” a tia. Khanchu a’rhming khom Zebulun a tia.

²¹Kha zoiin chu nâinupang a nei nôka, a’rhming chu Dinaii a phua ta.

²²Khan Pathianin Rakili chu an hriat maia, khanchu a chongchaina a sâm pea, a sul an hong pe tâka;

²³khanchu an râia, nâipasal a neia: khan, “Pathianin keima irhming sâmin a ni ipêk a ni ta,” a tia.

²⁴Khan, “RENGPA’N, nâipasal dang ni pe nôk ri se,” a tia. Khanchu a’rhming khom Josefa a phua ta.

²⁵Khan, hiang hi a nia, Rakili khan Josefa a nei zoiin chu, Jakoba’n Labana kuang khan, “Ki omna hmun ngêta, kin ram tiang nin fetir ta ro, a tia:

²⁶ni sin ki thôna man ki dôngma le ki nâihai ni pe’n lân, nin fetir ta ro, ni sin ki itho lam laka nin hriat tâka,” a tia.

²⁷Khanchu, Labana’n a kuang khan, “Lung nin khamin lân ni la ompui ual ro ba: RENGPA’N nangma zâra sat a ni vur ti tasânin kin hriat kêng,” a tia.

²⁸Khan ama ngêtin, “Ni hlo hrang bîk inkungin lân, ni hril ro, khanchu nang pe ki ti,” a tia.

²⁹Khan ama’n a kuang khan, “Itin mo ni sin ki itho, itina mo ni’rchon sial, kêlhai ki kuang an om ti ni inhriat;

³⁰ki hong mân khan chu a tômte kêng ni inei, atûn chu a sate’n an hong punga, an tam tâk hi te: ki fena hmun tina RENGPA’N satvurin a inpung mai a ni: khannisianlân itika mo keima in sûngkua ta hrangin ki la isin ta hrang?” a tia.

³¹Khan ama khomin, “Imo nang ki ipêk hrang?” a tia. Khan Jakoba’n, “Ni sial, kêlhai khom nang enkol pe mai ki ti, hi ki thil indit ni zôm nuamin chu, a tia.

³²A vuan chu ni kêl le belrahai va enhai ki ta, belrahai laia a duk murdi le a râng murdi, le kêl laia khom a duk le a râng murdi a bingin zêkhai ki ta; kha hnung, atûn ata chu hianga duk le a râng irzir murdi chu ki ta ni hrangin keima hlo hrang chu ni ri se, a tia.

³³Khasikin atûn ata ni mithmua ki ihlo le ki thu zômna chu ki hlo chukna ni ihmu hrang a ni. Belra mo kêl mo a duk loi mo a râng loi mo ni hmu’n chu, ni ta kin rûkin nin tum ro,” a tia.

³⁴Khan, Labana’n, “Irngai ro, ni iti ang takin ni ta ri se,” a tia.

³⁵Khanchu hi nî sûna hin chu kêl duk le a râng murdi, belra duk le a râng murdihai chu a bingin an hruai indanglamhaia, a nâipa kuta enkol hrangin a pêka;

³⁶khanchu, ama le Jakoba kâra sûn thum fena lam hlataka an omtirhaia. Khan Jakoba’n Labana kêlhai chu an thâhai tâka.

³⁷Khan, Jakoba’n theikung le thingkung irzar chi khianghrol hring a lâka, a hmor irzumin khianghrol chu irtêk langin a siama.

³⁸Khan khianghrol a isunna, kêlhai tui hong inna ngai khêng, tui luangna kôlhaia khan tui in hrangin an hongin chu an inrâi ngaia.

³⁹Khanchu kêlhai kha inrâiin an têhai chu chial rekruk le râng bekbukin an suaka.

⁴⁰Khan Jakoba’n kêltehai kha a bingin a siahaia, khan kêl têhai chu Labana kêl hranga irhoi murdi a duk le a rânghai irhmu theiin, a bingin ama ta hai a siahaia, Labana kêl leh irzêltir loiin.

⁴¹Khan hiang hi a hong nia, kêl a hrât ualhai pâl an fâk hrang rikipa, khianghrol omna hmun tiang a hôlhaia; Jakoba’n tui luangna hmun, kêlhai irhmu theina hrang hmuna a khianghrol a sia ngaia.

⁴²Khannisianlân kêl irchi sarak loihai kôla chu sia nuam ma: khasikin a sa ok loihai kha Labana ta an nia. A sa, a hrâthai chu Jakoba ta an ni.

⁴³Khanchu Jakoba kêl chu a sate zelin an pung pea, kêl rual, satak tak hai, suaknu, suakpa, saringsei le sakuartunghai a nei tâk a ni.