Read Hrangkhol IRPHUTNA 32 Bible Online

IRPHUTNA 32 - Hrangkhol bible

IRPHUTNA 32

¹Khan Jakoba chu a fe zêla, Pathian vântirtônhaiin an le’rtokpuia.

²Jakoba’n a hmuhaiin chu, “Hi kêng hi Pathian ihruaihai pâl an ni hi te,” a tia: khanchu kha hmun irhming kha Mahanaim a ti tâka.

³Khan Jakoba chu, Seir rama, Edom phâia a upa Esaua kuanga mi a lei tîrhai baka,

⁴an kuang khan, “Ki rêngpa Esaua kuang khan hiang hin nin iti hrang a ni, ni sinthotu Jakoba’n hiang hin a ti: Labana kuang ata chu ki hong zôk tâka, hi hmun hin ki bingin ki om ta;

⁵ki sial, ki sakuartung le ki belrahai, ki suaknu le suakpahai khom neiin ki om ta; khanchu ni mit ki tung theina hrangin, nang ki rêngpa hril hrangin mi ki hong itîrhai an ni,” tiin.

⁶Khanchu a mi tîrhai chu Jakoba kuang an hong kîr nôka, “Ni upa Esaua kuang kin va tunga, ama khom mi irzaminli tuangin nang irtongpui hrangin a hong,” iti thu an hrila.

⁷Khanchu Jakoba chu a sate’n a lei chia, chardong a le’rlâka: khanchu a kôla mi a iompuihai kha pâl hniin a lei semhaia, a kêl, sakuartung le belrahai khom buk hniin a lei siahai tâka;

⁸Esaua’n buk khat a hmua a that khoma buk khat an zôk theina hrangin a tia.

⁹Khan Jakoba ngêtin, “Ka pu Abrahama Pathian, ka pa Isaka Pathian, o RENGPA ni omna rama le ni sûngsuakhai tianga fe hranga ni tîrtu le nin thâ loi hranga ni hriltu,

¹⁰kei ni sinthotu chunga hin ni thudik murdi le lungkhamna inlangtir ngai, ki’rchonhai chunga hin, a chînte khom hi hmu inruk ni ma ung; hi Jordan dung hi, ki khianghrol leh vai ki’rkâna; atûn chu pâl hnia sema inpungin ki om tâk.

¹¹Khasikin lungkham takin ka upa Esaua kut ata hi, ni saninzôk ro; nu le nâihai kin rênga ni that hrang chu ki chipuihai sikin.

¹²Nangin nang siam insa ngêt ki ta, nir chihai khom tuipuia chiai tam anga tep zoi loi nêka tamin nang siam ki ti, ni tia,” a tia.

¹³Khan, kha ni zân chu kha hmuna khan a riaka; a’rchonhai chu kêlpui irzahni le kêlchal sômhni, kêlbelrapui irzahni le belrachal sômhni, saringsei dût sôm lai a tê le sômthum, sehrâtpui sômminli le sehrâtchal sômkhat, sakuartung pui sômhni le a tê sômkhat, a upa Esaua lômna hrangin a bingin a siahaia.

¹⁶Khan a papâlin a zêkhaia; a siahlohai kha an hôltirhaia; an kuanga khan, “Ki maton tiang fe unglân, a pa pâlin nin kâr irhla vi viatin,” a tia.

¹⁷Khan maton taka fe kuang khan, “Ka upa Esaua leh nin irtoka, tu mi mo ni ini? kho tianga fe hrang mo ni ni? ni kôla omhai hi tu ta mo an ini? tia nang a’rdonin chu,

¹⁸ni sangpa Jakoba ta an ni; ka pu Esaua, nangma nang lômna hranga nang a hong ithon an ni; ama khom kin hnunga son a om; ti ro,” tiin thu a pêka.

¹⁹A hnunga la omhai khom a sial, kêl hôltuhai kuanga khan, “Esaua nin hmu’n chu, khaang khan nin iti hrang a ni.

²⁰Ni sinthotu Jakoba chu kin hnunga son a om ti ving roi” a tia. Lômman ki ipêk hin a lôm theina hrangin, kha zoi le a hmêl la hmu rong, khanchu a raifân thei ngêt a ti, iti an sâp a ni.

²¹Khaang khan an fe tâka; kha ni zân chu kha hmuna khan a riaka.

²²Khan, zâna chu a thoia, a dôngmahai ruai le a siahlonuhai ruai le a nâihai sômhleikhathai a hruaihaia, Jabok tui irkânpuihai hrangin.

²³Annihai a hruaihaia, a neinun murdi leh tui a’rkânpuihai tâka.

²⁴Khan Jakoba chu a bingin a om lai takin, mi inkhat a honga, a’rbuanpui a’rbuanpuia, khovâr mân chu.

²⁵kha mi khan inhnê ma ung ti an hriatin chu, Jakoba malru a sômkhoi pea, a’rbuanpui laiin Jakoba malpui ru chu a koi pe tâka, a’rloru a’rphêt tâka.

²⁶kha mi khan, “Nin tha ta ro; khua a vâr tâk,” a tia. “Nang intha viat no ning sat ni ni vur mâka chu,” a tia.

²⁷Khan, kha mipa khan Jakoba kuang, “Imo nir hming nin hril ro?” a tia. “Ki’rhming chu Jakoba a ni,” a tia.

²⁸Khan kha mi khan, “Ni’rhming khom Jakoba nang ti ta no nihaia; Israel nang ti ta an ti; Pathian le mihriam nir buanpuia, nin hnê tâk sikin,” a tia.

²⁹Khan Jakoba’n ama chu hiang hin a’rdona, “Lungkham takin nir hming nin hril ro,” a tia. “Khan kha mipa khan i lo hrang mo ki’rhming ni ni irdon?” a tia. Khanchu kha mi khan sat a vur tâka.

³⁰Khanchu Jakoba’n kha hmun irhming hrangin Peniel ni ri se, a tia: Pathian chu hmâi irsongin ki hmua, ki hringna a ni hôi pe sikin, a iti a ni.

³¹Khanchu Peniel hmun a khêlin chu misa a hong suaka, misa’n a hong êlin chu, a malpui koi sikin a ke an bâi tâka.

³²Khasikin atûn ten hin Israel irchihaiin chu malpui irlo ru inbâi hme fa ngai mahai. Jakoba malpui ru sa lai tak a siat pe sikin.