Read Hrangkhol IRPHUTNA 33 Bible Online

IRPHUTNA 33 - Hrangkhol bible

IRPHUTNA 33

¹Khan Jakoba chu a hong tanga, Esaua chu mipui irzaminli leh hong a hmuhai tâka. Khanchu a nâihai kha Leaii, Rakili le a siahlonuhai ruai kuang khan a semhaia.

²Khan a siahlonuhai kha a maton tiang a siahaia; Leaii le a nâihaiin an zuia; Rakili le Josefa chu an hnungtaka an oma.

³Ama chu an matona a fea; a upa a va phâk mân voisari irnênga khûksadelin chubai a mûka.

⁴Khan Esaua chu ama lôm hrangin a van tâna, a pom inkuaa, an irtuma, an ruaiin an chapa.

⁵Khan Esaua’n a en vêla nupang le nâipanghai a hmuhaia; “So ni hong ihruaihai so tuhai mo an ini?” a tia. Khan ama’n “Pathianin lungkham taka ni sinthotu nâi ni pêkhai an ni so te,” a tia.

⁶Khanchu a siahlonu le a nâihaiin an hong nâia, kûnin chubai an mûka.

⁷Khan Leaii le a nâihai khom an honga chubai an mûka; kha zoiin chu Josefa le Rakili khom an hong nâia, kûnin chubai an hong mûk sa tâka.

⁸Khan Esaua’n, “Sa le neinun ki hong ihmuhai rêk kha te? tu ta mo an ini” a tia. Khan ama’n, “Ki rêngpa ni mit ki tung theina hranga ki ta ki hong itîrhai an ni,” a tia.

⁹Khan Esaua’n, “Kei khomin ki nei intam ki sangpa, ni inei murdi chu ni ta ni ri se,” a tia.

¹⁰Khan Jakoba’n, “Ni thei no ni, ni mit ki tungin chu lungkham takin ki thilpêkhai kha ni la pe ro: Pathian hmêl hmu angin ni hmêl ki hmua, ki chunga ni lôm ti an langa;

¹¹Pathianin a nin renna sika ki inei a ni sikin, lungkham takin ki thilpêk chu ni pom pe ro,” a tia. Khaangin an thêm an thêma, a pom pe tâka.

¹²Khan Esaua’n, “Tho fe ta ei ti, keiin nangni hruai ki ti,” a tia.

¹³Khan a kuang khan, “Nâipanghai lak an la chîna, belra le sahai khom an tê an tam ti lak nin hriata; sûn khat vêl irngam loiin ei fepuihaiin chu an ithi zoi hrang kêng.

¹⁴Ki rêngpa lungkham takin ni sinthotu hi ni masanin lân: kei chu Seir tâng tiang, ni kuang ki hong tung mâka, ki sahai fe thei lam takin zâmin hongpuihai ki ti,” a tia.

¹⁵Khan Esaua’n, “Ki hong ituanghai hi senkhat hi nang ma pe ki ti,” a tia. Khan ama’n, “Nang ual no ni duah, ni milung a chukin chu a ruk ta,” a tia.

¹⁶Kha tena chu Esaua chu Seir tâng panin a kîr nôk tâka.

¹⁷Khan Jakoba chu Sukoth hmun panin a fea, an omna hrangin in a sina; a sahai omna hrang khom a sin pehaia: khasikin kha hmun kha Sukoth an iti a ni.

¹⁸Khan Jakoba chu Padan-aram, ram rengata irtharngam takin Sekem khua, Kanaan rama a omna chu a tunga, dâimitzîng kôla khan a puan in zarin a oma.

¹⁹Khan a puan in zârna hmun chu Sekema a pa Hamora nâihai kuanga, tangka irzakhat leh a’rchôka.

²⁰Kha hmuna khan maichâm a siama, a’rhming khom El-elohe (Israel Pathian) iti a ni ta.