Read Hrangkhol IRPHUTNA 34 Bible Online

IRPHUTNA 34 - Hrangkhol bible

IRPHUTNA 34

¹Khan, Leaii nâinu Dinaii, Jakoba ineipui chu, a ram mihai hmu nuamin a va lêng suaka.

²Khan Hiv mi Hamora kha, kha rama rêng nâipa Sekema’n a lei hmua, a chelthunga, a lei zâlpui tâka.

³Khanchu, a milung kha Jakoba nâinu Dinaii ringot an sâp tâka, kha dôngmatenu kha a sân an dita, chonghoi ta takin a chongpuia.

⁴Khanchu, Sekema’n a pa Hamora chu a hrila, “So dôngmate so ki dôngma hrangin ni ti pe ro,” a tia.

⁵Khan Jakoba’n a nâinu Dinaii chu Sekema’n a lei châipui ti an hriata, a nâihai lak ram tianga sahai enin an oma: a nâihai hong mâka chu a dâihreka.

⁶Khanchu, Sekem pa Hamora chu Jakoba chongpui hrangin a honga,

⁷Jakoba nâihaiin an inhriatin chu ram rengata an honga! khan Jakoba nâinu zâlpuiin Israelhai laia thil saloi tho loi hrang ti a ni sikin an char a donga, a sate’n an ning khom an mur pehaia.

⁸Hamora’n a chongpuihaia; “Ki nâipa Sekem lungrîl lak nin nâinu chunga a om rak tâka: lungkham takin nin luatir pe roi.

⁹Khanchu irlua irhlôm ta ei ti, nin nâinu nin luatir unglân, kin nâinuhai khom luahai nin ti.

¹⁰Khanchu kin kuang om nin ta; ram lak a la lian zapa, hi rama hin omin sin tho nin ta irfûk takin om nin ti,” a tia.

¹¹Khan Sekema’n dôngmatenu pa le nuchahai kuang khan, “Nin ren unglân, nin inuam tak hril roi, nangni pe zel ki ti.

¹²Man le tui thilpêk chu nin inuam dôr ti roi nangni pe zel ki ti, i khom nisianlân nin farnu vai dôngma’n nin luatir ngêt roi,” a tia.

¹³Khan Jakoba nâi pasalhaiin an farnu Dinaii irhming a le’nsiat tâk sikin, Sekem le a pa Hamora chu vârtakin huang irtêlin an hrila,

¹⁴an kuanga khan, “Hi thil ser tanloi mi hi kin farnu pe thei no ni ung, kin pêkin chu kin irhming siatnabul a ni hrang sikin:

¹⁵hiang hin chong nin inkung vaiin kêng nin iti angin a ini thei hrang: nin laia pasal murdi’n ser tan unglân, keini angin om roi;

¹⁶khan vai kêng kin nâinuhai nin iluahai thei hrang, keini khomin nin nâinuhai kin iluahai thei hrang. Khanchu nin kuang om kin ta, irchikhat ei ini thei hrang an tia.

¹⁷Khannisianlân ser tan thua kin hê nin lâk no’n chu, kin farnu chu hruai kin ta, fepui kin ti,” an tia.

¹⁸Khan an thu kha Hamora le a nâipa Sekem chu a sate’n an lôma.

¹⁹Khanchu ruathartepa chu Jakoba nâinu an dit hrai sikin, kha thil kha zoro sôt loiin a tho zela: ama hi a pa in sûng mihai laia chu mi inza le ingîk tak a nia.

²⁰Khanchu, Hamora le a nâipa Sekem chu, an khua dâimitzîng an va tunga an khuahai an hrilhaia,

²¹“So mihai son an nir fûkpui tâka, khasikin hi rama omin irvaihai sian, ram khom a la lian tôk sikin, an nâinu so dôngma’n nei ei ta, ei nâinuhai khom nei an ti.

²²Khannisianlân irchi hmunkhat ei ni theina hrangin, ei kôla omin, ei irfûk theina hrangin, hi thil hi ei tho’n kêng ei irfûk thei hrang, ser tan nam an ini angin eini khom pasal murdi’n ser tan ni thei inlân.

²³An sahai, an sumhai, an inei murdi ei ta a ichang ving hrang mo ni ma? khasikin an thu hi a sa ti puihai ei ti, khan kêng ei kuang an iom hrang,” an tia.

²⁴Khanchu Hamora le a nâipa thu chu an khuaa mi murdi’n an zôma; pasal murdi’n an ser an tantirhai ving ta.

²⁵Khanchu, hiang hi a hong nia, sûn thum tena, an irh pehai lai takin, Jakoba nâihai pasal hni, Dinaii nuchapa Simeona le Levia haiin an chemhai chôiin, dâihrekin an khua kha an rûna, pasal om murdi an thatpaihai vinga.

²⁶A hnung taka Hamora le a nâipa Sekem khom chem ngaih takin an thathaia: Sekem in rengata Dinaii chu an hruai suaka.

²⁷Jakoba nâihai mi that nasan chu an farnu irhming an insiat sikin, khua kha an irûn a ni.

²⁸An belra pâlhai, an sehrât le an sakuartunghai an khuaa thil om murdi, le an loimâna neinunhai an lâk pehaia.

²⁹An sum nei murdi, an nâitehai le dôngmahai chu an bukkhômhaia.

³⁰Khan, Jakoba’n Simeona le Levia kuang khan, “Nangni’n hi rama omhai laia, Kanaan le Periz-hai laia hin ni hmumâkna sin nin thoa, ei tôm sikin pungkhôm an ta an ni idoi hrang a ni, ni that an ta ki’rchihai leh irhmang vingin kin iom hrang a ni,” a tia.

³¹Khan anni’n, “Kin farnu hi notizuar angin mo an ibe hrang?,” an tia.