Read Hrangkhol IRPHUTNA 35 Bible Online

IRPHUTNA 35 - Hrangkhol bible

IRPHUTNA 35

¹Khanchu, Pathianin Jakoba kuang khan, “Thoiin lân, Bethel-a fe ro, kha hmuna khan omin lân; ni upa Esaua kuang rengata ni rotsan laia, ni kuanga inlâr Pathian ta hrangin maichâm siam ro,” a tia.

²Khanchu, Jakoba’n a in mihai kôla omhai kuang khan, “Nin kôla mi dang pathian biakhai kha paihai unglân; irthiang takin nin tukfamhai thûl roi.

³Thoi ei ta, Bethel-a fe ei ti, ki chardong le lungzîng laia ki kuanga om ngai Pathian ta hrangin maichâm siam ki ti,” a tia.

⁴Khanchu mi dang pathian an kut le mikuara kuarkâia an ibet ngaihai kha an sûta Jakoba an pêka; khanchu Jakoba’n Sekem kho kôla sesua thing bula a thupa.

⁵Khanchu an fea, an khua vêla mihaiin an lei chihaia, ite Jakoba nâihai chu irzûl ngam ta mahaia.

⁶Khaang khan Jakoba leh a kuanga om murdihai chu Kanaan ram Luz khua chu an tung ta, Luz khua chu atûna Bethel hmun hi a ni.

⁷Khanchu maichâm a siama, a upa kuang ata a rot lai khan Pathian a inlâr pena hmun a ni sikin a hmun chu El-Bethel a ti tâk a ni.

⁸Khan Rebeki donsuitu Debori chu a thia, Bethel hmun sesua thing hnuaia an phûma; khasikin a’rhming khom Alon-bakut an iti a ni ta.

⁹Khanchu Jakoba chu Padanaram ram rengata a hongin Pathian an lâr pe nôka, sat a vura.

¹⁰Pathianin a kuanga khan, “Ni’rhming chu Jakoba a nia; atûn chu Jakoba nang ti ta no nihaia; Israel nang ki iti a ni ta.”

¹¹Pathian ngêtin a kuanga khan, “Kei Pathian Itinrêngthotheitu ki ni: irchi tam takin hong pung ro; irchi tep zoi loi rak, nam dang dang changin hon pungtir ni ta, nir chi ata rênghai khom la hong om an ti.

¹²Khan Abrahama le Isaka, ram ki ipêkhai hi, nang pe ki ta, ni thi tena khom nir chihai pe nôkhai ki ti,” a tia.

¹³Khanchu, Pathianin Jakoba chu a mâksan nôk tâka.

¹⁴Khanchu kha hmun khan Jakoba’n lung a phuna, a chunga khan thilinhlanin, sahriak a buaka.

¹⁵Khanchu Jakoba’n Pathian leh an chongna hmun irthiang hi “Bethel” a iti a ni.

¹⁶Bethel ata an fe nôka, khan Efrat khua tungna hrangin chu a la hla tala; Rakili chu nâiha’n a sê tâka.

¹⁷A sân a na pe tâka, a kurmanu’n, “Chi no ro, nâi dang ni inei nôk hrang a ni ta,” a tia.

¹⁸Khanchu, hiang hin a nia; a’rtha suaksanin a thi tâka, a nâi irhming khom Benonia a tia; a pa khan chu Benjamina a tia.

¹⁹Khaangin Rakili chu lampuia Efrat lama an phûma (Efrat chu Bethlehem khua a ni.)

²⁰Jakoba’n a thân chunga khan lung a phuna: atûn ten hin Rakili thân lungphun a ni ta.

²¹Khaangin Israel chu a fe maia, Mig-dal-eder khêla a puan in a zar nôk ta.

²²Khanchu hiang hi a nia, Israel chu kha rama khan a om laiin; Reubena’n a pa dôngma meithâi Bilhaii kha a va zâlpuia; kha thu kha Israela’n a le’nhriat suaka. Khan, Jakoba nâihai chu sômkhat inhni an nia:

²³Leaii nâihai chu Reubena (Jakoba nâilutîr) Simona, Levia, Juda, Isakara, le Jebuluna hai an nia.

²⁴Rakili nâihai chu Josefa le Benjamina an nia:

²⁵khan Rakili suaknu Bilhaii nâi chu Dana le Naptali an nia.

²⁶Khan Leaii suaknu Zilpaii nâi chu Gada le Asera an nia: hihai hi Jakoba nâihai Padanaram-ah a ineihai an ni.

²⁷Khanchu Jakoba chu Kiriath-arba khua Abrahama le Isaka omna Mamre, a pa omna chu a tunga. (Kiriath-arba khua chu Hebron a ni.)

²⁸Khan Isaka dam sûng kum chu irzakhat sômriat a nia;

²⁹Isaka chu a’rtha’n mâksanin, upatak tar dêna damin a ithi a ni ta; a’rchipuihai laia hruaiin a om tâka; a nâihai Esaua le Jakoba’n an phûm ta.