Read Hrangkhol IRPHUTNA 37 Bible Online

IRPHUTNA 37 - Hrangkhol bible

IRPHUTNA 37

¹Khan Jakoba chu a pa omna Kanaan rama khan a oma.

²Hiang hi Jakoba irchihai thurchi chu a ni, Josefa chu kum sômhleisari mi a nia, a uhai kêl hôl a zuihaia; nâipang a la ni sikin, a pa dôngmahai Bilhaii le Zilpaii nâihai kôla a om ngai a ni. Khan Josefa’n an isêl lam a pa kuang an hrila.

³Khan a pa Israela’n Josefa chu a tar hnunga nâi a ni sikin a nâi danghai nêkin an ren uala: songkol khom satak takin an sui pea.

⁴Khan, an pa’n an ren ual bîk ti a uhaiin an inhriata; khanchu a sate’n an hnarsa tâka, chongbâi hoi zel irhmu ta mahaia.

⁵Khan Josefa’n irmang a neia; a uhai kuang a hrila: khatak ata kha an hnarsa ual nôk tâka.

⁶Ama’n chu “Irngaihoi takin ki’rmang hi ni’rngaipui roi, a tia:

⁷irngai roi, loia bu ei âta, keima bumût kha a thoia; nin bumûthaiin an irhuala; ki bumût kha chubai an hong mûka,” a tia.

⁸A uhaiin a kuang khan, “Nangma tê hin mo kin chunga roi ni irêl hrang?” an tia. Khanchu a’rmang thu a hril pehai khan a sân an hmumâk nôk ual tâka.

⁹Khan, zân khat chu irmang dang a phan nôka, a uhai a hrilhai nôka, “Irngai roi, irmang ki phan nôka; misa, le thahai, ârsi sômkhat inkhathai khin chubai an ni mûka,” a tia.

¹⁰Khan, a pa le a uhai a hrila, khanchu a pa’n hiang hin a’rchua a kuang khan, “Irmang ni iphan hi i zât irmang mo a ini? kei le ni nu le ni uhai hin mo khûksadelin chubai nang kin imûk hrang?” a tia.

¹¹Khanchu a uhaiin an hnarsaa; a pa rêkin chu a thuhril kha a lungrîla a vong chiana.

¹²Khan, a uhai chu Sekem-ah an pa kêl hôlin an fea;

¹³khan a pa Israela’n Josefa kuanga khan, “Ni uhai chu Sekem-ah kêng kêl hôl an ife? hongin lân, nang khom nang tîr ki ti,” a tia. Ama khomin, “Ni tîr ro,” a tia.

¹⁴Khanchu, “Va fe’n lân, ni uhai chu an dam le damloi thu, kêlhai khom va eninfelin lân, an thurchi ni hon hril nôk ro,” a tia. Khanchu Hebron phâi ata a tîr suaka Sekem chu a va tung ta.

¹⁵Khan, mi tu’n mani, loia a uhai zongin a chai lai kha a hmua: khanchu kha mi khan, “Imo ni izong?” tiin a’rdona.

¹⁶Ama’n, “Ka uhai ki izonghai, irngaihoi takin kêl an ihôlna hmun nin hril ro,” a tia.

¹⁷Kha pa khan hitak ata chu an lei suak nôk ta, “Dothan-a fe ei tih an iti chu kin hriat,” a tia. Khanchu Josefa chu a uhai kha a’rzûlhaia Dothan-a a hmuhaia.

¹⁸Anni khomin hlatak ata an lei hmua, khanchu a va tung mânin ama that hrang lam an lei ngaituaa.

¹⁹Irngai roi, so irmang neipa a hong;

²⁰tho thatpai ei ta, khurpadop inkhata inthapai ei ti, khanchu ramsain a that ti ei ta. Khanchu a’rmang kha itin mo a om pe inhre ta a ti, an irtia.

²¹Khan Reubena’n a le’nhriata, “A that chu thatpai no ih,” tiin a lei sansuaka.

²²Reubena’n chu a pa kuanga a hruai theina hrang lam zongin an kuang khan, “Thisen chu insuaktir no roi, ramchâr khurpadop inkhata intha unglân, nin kut chu ban no roi,” a tia.

²³Khanchu hiang hin a hong nia, Josefa chu a uhai omna a va tungin chu; Josefa songkol rông satak kha an lei khekpai pea;

²⁴khanchu an hruaia, khurpadopa an inthâka, kha khur kha tui om ta loi, a rong a ni.

²⁵Khanchu bu nêkin an irbuka, an hong thîra, irngai roi, Ismaela khual fe mihai Gilead ram ata saringsei, mirimhoi, thinghnâi, hloi le Mura pêlin Aigupta ram fe hranghai an honga,

²⁶khan Juda khan a urênghai kuang, “Ei sangpa ei thata, a thisen suak thup hin imo a’rfêna om hrang?

²⁷tho kha nêkin ama that loiin Ismaela hai kuang son zuar ei ti; ei sangpa chu rîlbong khata nâi eini sikin,” a tia.

²⁸Khanchu Midian irvai mihai an honga, Josefa kha khurpadop ata an kaisuaa, Ismaela hai kuang khan tangka sômhniin an zuara. Khanchu Josefa chu Aigupta rama an hruaipai ta.

²⁹Khan Reubena kha a honga khurpadop a va ena, Josefa kha lei om pe ta maka, khanchu ningmurin a puan le diarhai a ir-ek seta.

³⁰A urênghai kuang a va fea; “Tôite kha lei om ta ma! kei te kho tiang mo fe ta ning?” a tia.

³¹Khan Josefa songkol kha a lâka, kêlchal an thata, songkol kha kêl thisen an pola.

³²Khanchu songkol rông Josefa ta chu, an pa kuang an chôia, “Hi hi kin hmu, ni nâipa songkol a ini mo eninfel ro,” an tia.

³³Ama’n chu an hriat zôia, “Ki nâipa songkol teh ni a ti ro; ramsain a ithat kêng a ni ta hi te, Josefa chu a ifâk inhekchit ni ta a ti na,” a tia.

³⁴Khanchu Jakoba chu a puan le diarkaihai a ir-ek seta, bora puan silin zoro sôttak a chûlpuia.

³⁵Khan a nâi pasal le nupang murdi’n irtharngam an saka, khannisianlân a’rtha irngam pe thei maka, “Ki nâipa thâna chûl chûlin kei khom ki va ithi hrang kêng,” a tia. Khaangin an pa chu ama irngaiin a chap mai ngaia.

³⁶Khan Midian-haiin Josefa kha Aigupta rama a lupuitak Faroa hnuaia hruaitu inkhat, enkoltu pôl hruaitu Potifara kuanga khan an zuara.