Read Hrangkhol IRPHUTNA 4 Bible Online

IRPHUTNA 4 - Hrangkhol bible

IRPHUTNA 4

¹Khanchu Adama’n a dôngma Evi kha a’rpôlpuia an râi tâka, “RENGPA changpuina zârin nâipasal ki nei ta,” a tia. A’rhming khom Kaina a phuaa.

²Kha zoiin Abela a hong suak nôka. Abela chu belra enkolpu sin a thoa, Kaina chu loi sin thopua a om ta.

³Khanchu inhnunga chu hiang hin a hong ni tâka, Kaina’n a loimâna thil, RENGPA makunga darh hrangin a hong chôia.

⁴Abela khomin a belra pâl laia a martak le a suak masatak a hong chôia. Khan, RENGPA’N Abela leh a thilinhlan kha a lôma.

⁵Kaina le a thilinhlan kha chu lôm maka. Khanchu Kaina chu a sate’n a ning an mur pe tâka, a hmêl kha an khukhak tâka.

⁶Khanchu RENGPA khan Kaina kuanga khan, “Ithoa mo ni ning a inmur? Ithoa mo ni hmêl a inkhu tâk?

⁷Thil ni tho insa’n chu lôm ni ihlo hrang mo ni ma? Ni tho’n sa no’n chu sual chu mikot kôla a iom chian a ni: a nuam lam chu nangma nang inhnê hi a nia, a chunga thu ni inei hrang a ni,” a tia.

⁸Kaina’n a sangpa Abela kuang, “Loia fe ei ti” a tia. Khanchu hiang hin a nia, loia an om laiin a sangpa Abela kha a’rsualpuia, a thatpai tâka.

⁹Kha zoiin chu RENGPA’N Kaina kuang, “Ni sangpa Abela kha khôn mo a om tâk?” a tia. Khan ama khan “Inhre ma ung, ki sangpa enkolpu mo ni ni sôn,” a tia.

¹⁰Khanchu RENGPA’N, “Itho mo hiang sin hi teh ni tho tâka? Ni sangpa thisen irhâi khan irnêng ata a ni hong insam kêng.

¹¹Khasikin, irnêng, ni kut ata ni sangpa thisen dong hrang a bâi lei ângtu ata hi khosâl tong ni ta;

¹²irnêng ni tuk khomin a satna kha nang pe phal ta no nia; irnênga chaninvâi le inlêng hong ni ta ni ti,” a tia.

¹³Khan, Kaina’n RENGPA kuang, “Ni ni ihremna hi a sate’n a natinsatin, tuang zoi no ning.

¹⁴A vuan hin irnêng chung ata ni nin hnotsuak tâka, ni mithmu phâk loina ithuprûkin om ta ki ti, irnênga hin inlêng le chaninvâi ki hong ini hrang a ni ta; khanchu hiang hin ni a ta, mi tukhomin an ni hmupu dôrin ni that an ti,” a tia.

¹⁵Khanchu RENGPA’N, “Khaang kha ni nih tâkin chu tukhom Kaina thatpu tak chu a bâk sari’n a chunga phuba la an ti,” a tia. Khanchu mi’n an hmu khoma an that loina hrangin RENGPA’N Kaina kha a’rsinsia tâka.

¹⁶Khanchu Kaina kha RENGPA kuang ata a suaka. Eden nisua tiang Nod rama khan a om tâka.

¹⁷Khan, Kaina’n a dôngma a pôla, khanchu an inrâia, Enoka an neia. Khan, khua a chuana, a khua irhming khom a nâipa irhming chôiin Enoka a tia.

¹⁸Khan Enoka’n nâipasal Irada a neia, Irada’n nâipasal Mehujaela a neia, Mehujaela’n nâipasal Methusaela a neia, Methusaela khan nâipasal Lameka a neia.

¹⁹Khanchu, Lameka’n dôngma inhni a neia, inkhat irhming chu Adaii a nia, inkhat nôk chu Zillaii, a ni.

²⁰Khan Adaii leh khan Jabala an neia, ama chu puan ina om ngaihai sa vâi ngaihai irchibul a ni.

²¹A sangpa irhming chu Jubala a nia, ama hi chu perkhuang le theihle tum theihai irchibul a ni.

²²Zillaii khomin Tubal-kaina, dâr le thîr hriamhrei tinrêng incher ngaitu a neia; khan Tubal-kaina farnu chu Naamaii a ni.

²³Khanchu Lameka’n a dôngmahai kuang khan, “Adaii le Zillaii haio, ki’rhâi inhre unglân: Lameka dôngmahaio, ki thu’nsîr hi irngai roi, A nin phop sikin mi ki thata, A ni vîk irdul sikin ruatharte ki ithat a ni.

²⁴Kaina phuba kha a bâk sariin an lâkin chu, Lameka phuba chu a bâk sômsari le sariin an ilâk ngêt hrang kêng,” a tia.

²⁵Khan, Adama’n a dôngma a’rpôlpui nôka, nâipasal an nei nôka, a’rhming chu Setha a iphua a ni: “Pathianin Abela irthûla a ni ipêk a ni, Kaina’n a lei thatpai tâk sikin,” a tia.

²⁶Khan, Setha khomin nâipasal a neia, a’rhming khom Enosa a phuaa. Kha rengata chu mihaiin RENGPA irhming an lei isâm phut a ni ta.