Read Hrangkhol IRPHUTNA 42 Bible Online

IRPHUTNA 42 - Hrangkhol bible

IRPHUTNA 42

¹Khanchu Jakoba’n Aigupta rama bu a om ti an hriata, khanchu a nâihai kuanga khan, “Itho mo ite ngaitua loia nin iom? a tia.

²Irngai roi, Aigupta rama bu a om ti kin hriat, khasikin phîngchâma ei thi loina hrangin fe unglân, zu’rcho roi,” a tia.

³Khanchu Josefa uhai pasal sôm chu Aigupta rama bu irchôk hrangin an fea.

⁴Josefa sangpa Benjamina chu a pa Jakoba’n a uhai kha inzuitir maka; “Ama khom thil saloi a zu tong rêkin te,” ti’n an sâp sika a ni.

⁵Khaangin Israel nâihai chu mipui dang a fehai leh hmunkhatin an irzuia bu irchôk hrangin, Kanaan rama khom châm a tâk sikin.

⁶Khan Josefa chu kha rama khan hruaitu tak a lei nia; ama ti loiin tûte ram dang mihai bu pêk thei ni maka: khanchu a uhai an honga irnênga khûksadelin ama chubai an mûka.

⁷Josefa’n a uhai kha a lei hmuhaia, a la’nhriathai maia, khannisianlân an inhriat thei loina irbelin a’rvoa, henhrum tak takin a chongpuihaia, an kuang khan, “Kho rengata hong mo nin ni?” a ti pehaia. Anni khan, “Bu irchôk hrangin Kanaan ram rengata zuang kin ni,” an tia.

⁸Josefa’n chu a uhai kha a la’nhriathai maia, anni’n chu inhre ta mahaia.

⁹Khanchu Josefa’n anni thurchi irmanga a iphan kha an hriat suaka, “A ni zuar dîpa hong kêng nin ni dua, kin ram sa le siat thu inhriat nuama,” a tia.

¹⁰Anni’n, “Ka pu ni ma ung ni siahlohai hi ni kuanga bu irchôk hranga zuang kêng kin ini.

¹¹Mi inkhat nâi, mi diktak nâi kin ni, khasikin ni siahlohai hi nang a’rdîpa zuang chu ni viat ma ung,” an tia.

¹²Khanchu Josefa’n, “Nangni iam ma ung, ram en irdîpa hong kêng ni nin ti,” a tia.

¹³“Keini urêng hi Kanaan rama om mi inkhat nâi sômhleihni kin ni; kin sangpa mitumtak chu atûn hin kin pa kuang a lei oma, inkhat chu om ta ma,” an tia.

¹⁴Khan Josefa’n an kuanga khan, “Ni’rdîpa zuang nin ni ki iti hi a dik a ni hi te:

¹⁵khasikin hiang hin fiain om nin ti; nin mitumtakpa kha nin hong hruai mâka chu hi hmuna hin Faroa kôla ikhumin nin iom hrang a ni.

¹⁶Nangni hi mi dik le mi fel, minlak nin tho le tholoi inhrena hrangin, nin laia mi inkhat tîr unglân, nin sangpa chu zuang hruai bak roi; khano’nchu mi irdîpa zuang nangni ki iti tâk ang khan fe thei loiin ikhumin nin iom hrang a ni,” a tia.

¹⁷Khanchu an rêngin sûn thum a khumhaia.

¹⁸Sûn thum ni sûn chu Josefa’n “Kei lak Pathian ki chia, hiang hin tho unglân, khan kêng nin izôk thei hrang a ni.

¹⁹Mi diktak lele nin niin chu nin urêng laia hin inkhat suak hrangin masan unglân, a danghai chu nin in mihai châm an lei zôk theina hrangin bu pêl unglân fe roi:

²⁰khan nin mitumtakpa chu ki kuang zuang hruai roi; khan kêng nin thurchi chu a ifel hrang, thi ual no chin ni,” a tia. Khaang khan a hê lâkin an thoa.

²¹Khanchu an sangpa chunga an sinsiat tho kha an inhriat suaka, “Lungkham taka sansuak hrangin a ni ngên tih ei inhriat khoma ei idonsui loihai kha, khasikin kêng eini khom hianga thil ei itong a ni ta,” an irtia.

²²Reubena’n, “Kha nâipang chunga thil saloi tho no roi nangni ti loi mo ki ni? ite bêin ni bê pe mak chêia, atûn teh hi a thisen phuba a ni ilâk a ni ta,” a ti pehaia.

²³Josefa’n an thuhrilhai kha inhre loi hrang angin chong irhlettu kuang an iti a nia,

²⁴Josefa chu an ihrilhai kha inhriatin a’rngai a siatin a’rheia, a chap tâka; khanchu hiang hin a ti pehaia, an laia Simeona chu a hruai suaka, an mithmua a khit pehaia.

²⁵Khanchu Josefa’n an phurhai siam pehai unglân an sumhai khom an hmarsa sûnga siain, lampuia an nêk hrang bufûn khom siam pehai roi, tiin thu a pêkhaia:

²⁶khanchu an phurhai chu an sakuartunghai chunga bângin khatak ata kha an fe tâka.

²⁷Mi inkhatin riakbuk an tunga a sakuartung bu pe hrangin a hmarsa a phonga sum kha a hmarsa sûnga khan a hmua,

²⁸khanchu a urênghai kuang khan, “Ki sum kha an ni isiam pe nôk kêng a ni ta, ki hmarsa sûnga a om,” a tia. An phûk an thing pehai raka, “Itina mo Pathianin hianga a ni ilo tâk hi te?” tiin chipumin an ir-en rum tâka.

²⁹Khanchu an pa omna Kanaan ram chu an tunga, an thil tong murdi an hrila;

³⁰an ram hruaitupa’n henhrum takin a ni chongpuia, mi en irdîptu pôlin an ni bêa,

³¹keini’n chu, “Mi diktak kin ni; mi en irdîptu chu ni ma ung:

³²urêng sômkhat inhni kin nia, pa inkhat sûnga mi kin ni; inkhat chu om ta maka; kin mitumtak chu atûn hin Kanaan rama kin pa kuang a om,” kin tia.

³³Khanchu an ram hruaitupa khan kin kuang, “Hiang hin mi dik nin ni le ni loi thu chu nangni inhria ki ti, nin urêng laia mi inkhat masan unglân, nin in mihai bu hong thakhai roi.

³⁴Khan nin mitumtakpa kha ki kuang zuang hruai roi; khan kêng mi en irdîptu pôl ni mak chêi ti inhriatin, mi dik nin nih ti ki inhriat thei hrang; kha zoiin kêng nin urêngpa khom hi nin ihruai nôk hrang, hi rama hin om nin ta, nin ihring thei hrang a ni ti,” an tia.

³⁵Khanchu an hmarsahai an inronga ni’n chu an sumhai an rêngin hmarsa sûnga an hmu vinga, an rêngin an pa khomin a hmua a sate’n a chi nôk tâka.

³⁶Khanchu an pa Jakoba’n chu, “Nangni hin ki nâihai nin ni inchântir zoi hrang kêng; Josefa lak om ta maka, Simeona khom om nôk ta maka, Benjamina tena hruai nin tum nôk ta, beidongin nin ni isia a ni ta,” a tia.

³⁷Reubena’n a pa kuang khan, “Ni kuang ki hong tuanghai nôk no’n chu ki nâi pasal hnihai hi thathai zel ro, ama chu ki kuta bângin lân ni kuang hong tuang nôk ngêt ki ti,” a tia.

³⁸Khanchu ama’n, “Ki nâipa hi nangni intuangtir viat no ning; a upa a thia, nin fena lama buaina zu tong nin ta keima tar luchuak tâk hi beidongin thânkhur nin zongtir kêng nin itum a ni,” a tia.