Read Hrangkhol IRPHUTNA 43 Bible Online

IRPHUTNA 43 - Hrangkhol bible

IRPHUTNA 43

¹Kha rama khan châm chu a satêrengin a tâka;

²Aigupta rama an bu hong pêl laka an nêk zoi tâka; khanchu an pa khan, “Fe nôk ta unglân, a tam no khomin bu zu’rcho nôk ta roi,” a tia.

³Khanchu Juda khan a kuang, “An hruaitupa khan, nin sangpa nin zuang hruai no’n chu ki hmêl khom hmu thei no chin ni a ti, a tia.

⁴Kin sangpa hi ni nin tuangtirin chu bu zu’rcho kin ti;

⁵ni phal no’n chu a fe lua zu fe ngam ta ma ung, kha pa khan a iti chu, nin sangpa nin kuang a zuang no’n chu ki hmêl rêng hmu thei no chin nih a ti tâk sikin,” an tia.

⁶An pa Israel khan, “Itho sika mo sangpa kin la nei nin la iti kher, keima hranga thil saloitak nin ihril?” a tia.

⁷Kha pa khan, “Nin pa mo a la dam? urêng dang mo nin la nei? tiin kin thurchi a nir don hlet tâk sikin kin iti a ni ta, kin hril zoiin chu nin sangpa zuang hruai roi, ti a tih, ti tu ualin mo a sôn?” an tia.

⁸Khan Juda khan an pa Israel kuanga khan, “Tôia chu ni zui ri se, khanchu zu fe kin ta, kin nâi chîntehai le ei rênga ei dam theina hrangin.

⁹A chungchâng thu chu keima’n a bul la tum ta rong, ni kuanga hong hruai nôk ngêt ki ti, ki hong hruai no’n chu keima’n kumkhontuangin a mophur ki ti,

¹⁰hiang hin ni khap no’n lân chu voihni zu tung nôk ta kin ti,” an tia.

¹¹An pa Israela’n an kuanga khan, “Khaang kha a ni tâkin chu, hiang hin tho ta roi, nin phurhaia khan hi rama neinun sa, thinghnâi, hloihai, khuaituihai, mirimhoi le Mura, theipui rahai ama lômna hrangin chôi unglân,

¹²sum le nin hmarsaa omhai kha pe nôk unglân, a irnghil khom a ni thei:

¹³nin sangpa khom hruai unglân, ama kuanga zu fe ta roi:

¹⁴khanchu nin urêngpa le Benjamina hi an sua theihaina hrangin Pathian itinrêng tho theiin a lungrîla lungkhamin nangni hmu ri se. Ki nâihai chu an chân a ni le khom inchânhai ta ki ti,” a tia.

¹⁵Khanchu a lômna hrangin thilhai kha chôiin, sum lêthni chôiin, Benjamina khom an hruaia, Aigupta rama an fea, Josefa kuang an zu tung nôk tâka.

¹⁶Khanchu Josefa’n Benjamina kha an kôla an hruai ti a va hmuhaiin chu, a in enkoltupa kuanga khan, “So mihai so in sûnga va hruai lûthaiin lân, sa thatin lân, bu anh suang pehaiin lân, annihai leh son sûna ki kuanga bu nepuihai hrang ki ni,” a tia.

¹⁷Khanchu Josefa iti angin a thoa, Josefa’n a hruai lûthaia.

¹⁸Josefa ina a hruai lûthai sikin an chia, “Ei zuang masaa ei hmarsa sum a ni ipêk kîr sika a ina a ni ihruai ni a ti, zoro inchum zonga ei rêngin ei neinunhai le a suak chang hranga a ni ihruai lût a ni,” an tia.

¹⁹Khan Josefa in enkoltupa kuang an va nâiin chu an chongpuia,

²⁰“Ka pu kin zuang masa lai khan bu irchôk hrang piala zuang kin nia,

²¹riakbuk kin tunga, kin phurhai kin kêlsuain chu kin sumhai chu ite siat viat loiin kin phurhai khan a om vinga, khasikin kin zuang ichôi nôk a ni hi an tia.

²²khan bu irchôkna hranga sum kin zuang ichôi kha tu mo kin hmarsaa ni sia pe inhre ma ung,” an tia.

²³Khanchu kha pa khan, “Irtharngam takin om unglân: nin Pathian, nin pa Pathianin nin neinuna irchon nangni a ipêk a ni kha te, nangni kin hriatpui,” a tia. Khanchu Simeona kha a hong hruai suaka.

²⁴Khanchu Josefa’n in sûnga a hruaihaia, tui a pêkhaia, an ke irsûkin, an sakuartunghai khom bu a pêkhaia,

²⁵khanchu an lômman chôihai kha Josefa bunêk a hong mân an lei sinsiamhaia, kha hmuna khan Josefa bunêk a hong ti an inhriat sikin.

²⁶Khan Josefa ina a hong lûtin chu an lômman chôihai leh khan an va pana, irnênga khûksadelin chubai an mûka.

²⁷Khanchu an thurchihai a’rdonhaia, “Nin patar thurchi nin ni ihril kha teh hring damin mo a la om?” a tia.

²⁸“Kin pa ni siahlo chu a dam lai tak chu a ni, a dam a harin a la om mai,” an tia. Khanchu an luhai sukin chubai an mûk nôka.

²⁹Khan a enhaia, Benjamina a nu nâipa kha a hmua, “Kha pa kha mo nin mitumtak thurchi nin ni ihril kha a ini?” a tia. Khanchu “Ki nâipa, Pathianin lung nan kham ri se,” a tia.

³⁰Khan Josefa’n a sangpa a hmu nôk tâk sikin, a milung an dûk pe hraia, chapna hmun inrangtaka zongin a zâlna hmuna a lûta, kha hmun khan a chap tâka.

³¹Khan a hmâi a phî nôka, a va suaka, insum za zâmin bu thur ta roi, a tia.

³²Khanchu ama hrang a bingin annihai hrang a bingin, Aigupta mi a bunêk koppuituhai hrang a bingin an thur pehaia. (Aigupta-haiin Hebrai-hai le hmunkhatin bu nepui thei ni ma, khaanga tho’n chu Aigupta-hai hrangin chu irthiang loi tihna a ni.)

³³Khanchu a uliantak chu nâilutîr nina angin, nâipangtak chu mitumtak nina angin Josefa kôla an toia, an ir-enin chu a’rkhêl an ti oka.

³⁴Khan Josefa’n an dongtum hranghai chu semin, a bîkin Benjamina dongtum hrang chu mihai nêkin voiringa’n a tam ual bîka, khanchu uainhai inin a sân a hoi ti takin an om ta a ni.