Read Hrangkhol IRPHUTNA 44 Bible Online

IRPHUTNA 44 - Hrangkhol bible

IRPHUTNA 44

¹Khan Josefa’n a in enkoltupa kuang khan, “Kha ki mihai puak kha an inhnê hrang ang dôr chitin bu siam pehai unglân, an sumhai khom an hmarsaa khan siam ro,

²khan ki tangkarua khilât satak kha an mitumtakpa puaka siamin lân, a sum leh khan,” tiin thu a pêka; khanchu Josefa iti angin a tho pea.

³Khua a hong vârin chu an sakuartunghaia chuangin a tîrhaia.

⁴Khanchu an fea, zoro sôtnote hnunga chu Josefa’n a in enkoltupa kuang khan, “Thoiin lân, kha mihai kha va’rzûlhaiin lân, ni va phâkhaiin chu, itho sika mo thil sa teh thil saloiin nin ithuan?

⁵kha thil kha chu ka pu uain inna le a tasânna ngai kêng? Hianga thil nin itho hi chu, nin inchâi ok a nih va ti ro,” a tia.

⁶Khanchu a va phâkhai tena chu kha thu kha a ti pehaia;

⁷“Ka pu i thu mani tâk, khaang khan teh ni ni ti lik tâka? Ni siahlohai hin khaanga thil kha tho le mo ni nir hoitir.

⁸Irngai ro, kin phura sum kin ihmuhai lua khom Kanaan ram ata, ni kuang kin zuang chôi nôk kha te: itin mo ni pu in ata sum mo, rângachak mo kin inrûk ngam hrang?

⁹khasikin ni siahlohai laia hin enin lân, tu phura mo ni man, ni imantakpu chu thi dênin kin pu suak chang ri se,” an tia.

¹⁰“A ni nangni iti lam tak ni ri seh duah, ki imanpu tak chu keima suak chang ri se, a tia. a danghai chu ite nangni ti no ning,” a tia.

¹¹Khanchu an phurhai insumin an kêlsuahaia;

¹²khanchu a ulian dônin a zonga, khanchu kha tangkarua khilât kha Benjamina phura a hmua.

¹³Khanchu an songkolhai an ir-ekthêra, an sakuartunghai chunga chuangin kho sûng tiang an kîr nôka.

¹⁴Khan Juda le a sanghaiin Josefa in an va tungin chu, a lei om maia, kûnin chubai an va mûka.

¹⁵Josefa’n an kuanga khan, “I zât thil mo nin itho tâk hi? keima anga mi hin tâ a sân thei nin ni isôn loi ma ni?” a tia.

¹⁶“Ka pu ni kuanga imo kin ihril ta hrang? I ang tak ngân mo kin ihril thei ta hrang? Pathianin ni siahlohai sualna chu a ihmu a ni ta. Ka pu kin rêngin ni suak kin ni ta,” an tia.

¹⁷“Khaang khan chu nangni sia thei no ning; a kuta tangkarua khilât an ihmupu tak vai kêng ki suak ni a ta; nangni chu nin pa ina fe roi,” a tia.

¹⁸Juda khan Josefa a va nâia, “Ka pu lungkham takin nangma inhriata thu bâi khat ki hril nuam a tia, khannisianlân ni ning an mur khomin a’rngai ni thei ngêt ni ti; nang chu Faroa anga mi lian ni nia.

¹⁹Ka pu, nangin pa le urêng dang mo nin nei? tiin ni nir dona.

²⁰Ka pu keini’n chu ni kuanga khan, o kin pa chu tar tak a ni tâka, a tar hnunga nâi, nâipangte kin neia, ama chungapu chu a thia, a nu inkhat le nâi chu ama vai kêng a ni ta, a pa khan ama chu an hlu dor dor a ni: kin tia.

²¹Khan nangma’n kin kuanga khan, ‘Ama kha ki mithmua hin zuang hruai roi,’ ni tia,

²²ka pu, keini’n chu tôia chu zuang hruai thei no ni ung kin tia; a pa a mâksanin chu a pa beidongin a ithipui hrang kêng kin tia.

²³Khan nangma’n kin kuang nin mitumtak nin zuang hruai no’n chu ki hmêl hmu thei no chin ni, ni tia.

²⁴“Khanchu ka pa kuang ki hong tungin chu, ni thurchi kha ka pa kin insîr pea;

²⁵Kin pa khan, ‘Fe nôk unglân bu zu’rcho nôk ta roi,’ a tia.

²⁶Keini’n chu zu fe thei ta no ni ung; kin mitumtakpa hi kin hruai vaiin kêng kin zu ife thei hrang, khano’nchu ni hmêl hmu thei no ni ung, kin tia.

²⁷Khan ni siahlo mi kin pa khan, ki dôngma’n nâi inhni vai a ni neipui ti khom nin inhriat.

²⁸Inkhat chu ki kuang ata a suaka, ramsa’n an isê that ni a tih tiin ki oma, khatak ata hmu ta loiin ki oma;

²⁹khaang khan hi mi khom hi nin hruaiin chu thil saloi zu tongin om a ta, keima tar luchuak tâk hi beidong pumin kêng thânmual nin ni inliamtir hrang a tia.

³⁰Khasikin tôia hi kin hruai no’n chu kin pa hringna le tôia hi a sate’n a’rzompui sikin,

³¹hiang hin kêng a ini hrang, tôia chu hong suak nôk ta mah ti an hriatin chu, a ithipui hrang kêng, kha tena chu keini ni siahlohai khom hin kin pa chu beidong pumin thânmual inliamtir kêng kin ichang hrang;

³²kei, ni siahlo hin kin pa kuang ata nuamloi puma ni kuanga zuang hruaitu hin kumtuangin a mô ki iphur hrang tiin, ka pa kin thêmin a bultumtu ki ni tâk sikin.

³³Khasikin keima hi tôia irthûlin, ni suaka nin omtirin lân, tôia chu ni tîr pe nôk roh.

³⁴Tôia ki hruai no’n chu ka pa hmêl itin mo ki ihmu thei ta hrang? ka pa chunga siatna hong tung hrang ki ihmu a ni,” a tia.