Read Hrangkhol IRPHUTNA 46 Bible Online

IRPHUTNA 46 - Hrangkhol bible

IRPHUTNA 46

¹Khanchu Jakoba chu a inei murdi chôiin a suaka; Beerseba a tunga a pa Isaka Pathian kuanga khan irbôlna thil a’rhlana;

²khan Pathianin zâna a’rmang tiang Israel chu a chongpuia, “Jakob, Jakob,” a tia. Ama’n, “Hin ki om,” a tia.

³Khanchu Pathianin, “Keima hi ni pa Pathian chu ki ni. Aigupta rama fe chu chi viat no’n lân fe ro; khu hmuna khun irchi tam takin nang siam ki ti:

⁴Aigupta rama khom ni kuang om mai ki ta, hi rama hin nir chihai hong hruaisuak nôk ngêt ki ti. Khanchu Josefa khom ni thi nî dênin ni kuang om a ti,” a tia.

⁵Khanchu Jakoba chu Beerseba ata a suaka, a nâihaiin Faroa sakor hong tîra khan an pa Jakoba a dôngmahai le a tû a têhai leh an inchuangtirhaia;

⁶Khan, Jakoba le a’rchihai chu Kanaan rama an irchon neihai chôiin, Aigupta rama an tung tâka.

⁷a nâihai, a tuhai a nâinuhai, a tunuhai, an irchi pumin Aigupta ram chu a lûtpuihai tâk a ni.

⁸Hihai hi Israel irchi Aigupta rama lût Jakoba le a nâihai irhming chu a ni: Reubena Jakoba nâilutîr.

⁹Reubena nâihai chu Hanoka, Palua, Hezrona le Karmia-hai an ni.

¹⁰Simeona nâihai chu Jemuela, Jamina, Ohada, Jakina le Zohara Kanaan nupangnu le nâi Saula-hai hi an ni.

¹¹Khan Levia nâihai chu Gersona, Kohatha, Meraria-hai an ni.

¹²Juda nâihai chu, Era, Onana, Sela, Pereza le Zera-hai an ni: Era le Onana chu Kanaan rama thi an ni ta. Pereza nâihai chu Hezrona le Hamula an ni.

¹³Isakara nâihai chu Tola, Pua, Jasuba le Simrona hai an ni.

¹⁴Zebulun nâihai chu Sereda, Elona le Jahleela hai an ni.

¹⁵Hihai murdi hi Leaii nâipa, a nâinu Dinaii le Padan-aram rama Jakoba a ineipuihai chu an ni: a nâi nupang le pasal, an rêngin sômthum inthum an ni.

¹⁶Khan Gada nâihai chu Zefona, Hagia, Sunia, Ezbona, Eria, Arodia le Arelia hai an ni.

¹⁷Asera nâihai chu Imna, Isva, Isvia le Beria le an farnu Seri. Khan Beria nâihai chu Hebera ke Malkiela-hai an ni.

¹⁸Hihai hi Zilpaii Labana nâinu Leaii kuanga a nâi pêkhai chu an ni, Jakoba a ineipui sômhleirukhai chu an ni.

¹⁹Khan Jakoba dôngma Rakili nâihai chu Josefa le Benjamina an ni.

²⁰Khanchu Josefa’n Aigupta rama Manasea le Efraima a neia. Khahai kha chu On khuaa deipu Potifara nâinu Asenathi ineipuihai chu an ni.

²¹Benjamina nâihai chu, Bela, Bekera, Asbela, Gera, Naamana, Ehia, Rosa, Mupima, Hupima le Arda-hai an ni.

²²Hihai hi Rakili’n Jakoba a ineipuihai chu an ni, an rêngin sômhlei minli an ni.

²³Khan Dana nâi chu Husima a nia,

²⁴Naftalia nâihai chu Jazeela, Gunia, Jezera, le Silema hai an ni.

²⁵Hihai hi Bilhaii Labana nâinu Rakili a ipêk nâihai chu an ni, Jakoba a ineipuihai chu an rêngin mi sari an ni.

²⁶Jakoba moihai tep loiin, Jakoba le Aigupta rama lût, ama irchia suak murdi chu an rêngin sômruk le kiruk an ni;

²⁷Khan Josefa’n Aigupta rama a nâi nei chu inhni an ni. Jakoba in sûng mi Aigupta rama om chu sômsari an ni ta.

²⁸Jakoba’n Juda kha Gosen ram lei en hrangin Josefa kuang a lei tîr baka, khan Gosen rama an lûta,

²⁹khan Josefa’n a sakor chu a’rsiamtirhaia; Gosen rama a pa don hrangin a fea, khanchu hmêlirhriatna neiin, Josefa’n a pa ringa a kut leh inkuapumin zoro sôttak a chapa.

³⁰Khan Israela’n Josefa kuang khan, “A hring a dama ni la ioma, ni hmêl ki hmu nôk tâk sikin a thi khom ite irhroi ta ma ung, ki thi khomin a sa ta,” a tia.

³¹Khan Josefa’n a pa le a urênghai kuanga khan, atûn chu, “Faroa kuang hong fe ki ta, ki urênghai le ka pa in mihai ki kuang an zuang tung ta.

³²Anni chu sa vâituhai an ni sikin, belra enkoltu an nia; an belra rualhai le an inei murdi an zuang chôi zit a ni,” tiin hong hril ki ti.

³³Khanchu hiang hin hong ni a ti, Faroa’n nangni a koia, ‘Imo nin isin ual ngai? a tiin chu,

³⁴nangni’n chu ni siahlohai hi kin irchibulhai ata irthokin atûn ten hin, sa vâi ngai kin ni’ ti unglân: khan kêng Gosen rama nangni a inomtir hrang,” a tia. Belra hrungtuhai hi chu Aigupta mihai intir tak ngai a ni.